ಹಳಿತಪ್ಪುತ್ತಿರುವ ಲಾಲೂ ಲೆಕ್ಕಾಚಾರ
ನವದೆಹಲಿ, ಮಾ. 20 : ಬಿಹಾರದಲ್ಲಿ ಕಾಂಗ್ರೆಸ್ ಮತ್ತು ಆರ್ ಜೆ ಡಿ ನಡುವೆ ಸೀಟು ಹೊಂದಾಣಿಕೆ ವಿಷಯದಲ್ಲಿ ಉಂಟಾಗಿದ್ದ ಬಿಕ್ಕಟ್ಟು ಉಲ್ಬಣಗೊಂಡಿದ್ದು, ಲಾಲೂ ಅವರ ನಿಕಟ ಸಂಬಂಧಿ ಸಾಧು ಯಾಧವ್ ಅಲಿಯಾಸ್ ಪಪ್ಪು ಯಾದವ್ ಆರ್ ಜೆ ಡಿ ತೊರೆದು ಕಾಂಗ್ರೆಸ್ ಪಕ್ಷ 'ಕೈ' ಹಿಡಿದಿದ್ದಾರೆ. ಅಷ್ಟೇ ಅಲ್ಲದೆ ಕಾಂಗ್ರೆಸ್ ರಾಜ್ಯದ 26ಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲು ನಿರ್ಧರಿಸಿದೆ.
ಪಪ್ಪು ಯಾದವ್ ಜೊತೆ ಇಬ್ಬರು ಸಂಸದರು ಕೂಡ ಕಾಂಗ್ರೆಸ್ ಸೇರಿದ್ದು, ಇನ್ನೂ ಕೆಲವರನ್ನು ಸೆಳೆಯುವ ಯತ್ನ ನಡೆದಿದೆ. ಕಾಂಗ್ರೆಸ್ ಪಕ್ಷದ ಬಿಹಾರ್ ರಾಜ್ಯದ ಉಸ್ತುವಾರಿ ನೋಡಿಕೊಳ್ಳುತ್ತಿರುವ ಸುಶೀಲ್ ಕುಮಾರ್ ಶಿಂಧೆ ಸಮ್ಮುಖದಲ್ಲಿ ಇವರು ಕಾಂಗ್ರೆಸ್ ಪಕ್ಷ ಅಧಿಕೃತವಾಗಿ ಸೇರಿದರು.
ಲಾಲೂ ಯಾದವ್ ಮತ್ತು ರಾಂ ವಿಲಾಸ್ ಪಾಸ್ವಾನ್ ನಡುವೆ ಎರಡು ದಿನದ ಹಿಂದೆ 25 ಕ್ಷೇತ್ರದಲ್ಲಿ ಆರ್ ಜೆ ಡಿ, 12 ಕ್ಷೇತ್ರಗಳಲ್ಲಿ ಎಲ್ ಜೆ ಪಿ ಮತ್ತು 3 ಕ್ಷೇತ್ರಗಳಲ್ಲಿ ಕಾಂಗ್ರೆಸ್ ಸ್ಪರ್ಧಿಸುವುದು ಎಂದು ಲಾಲೂ ತೀರ್ಮಾನಿಸಿದ್ದರು, ಇದು ಕಾಂಗ್ರೆಸ್ ಜೊತೆಗಿನ ಮನಸ್ತಾಪಕ್ಕೆ ಕಾರಣವಾಗಿತ್ತು. ಕಳೆದ ಲೋಕಸಭಾ ಚುನಾವಣೆಯಲ್ಲಿ ಕೂಡ ಆರ್ ಜೆ ಡಿ ಕಾಂಗ್ರೆಸ್ ಗೆ ಬರೀ ಎರಡು ಸ್ಥಾನ ನೀಡಿತ್ತು.
(ದಟ್ಸ್ ಕನ್ನಡ ವಾರ್ತೆ)