ಮನಮೋಹನ್ ಸಿಂಗ್ ಮೇಲೆ ಭಾರಿ ಬೆಟ್ಟಿಂಗ್

ಮುಂಬೈ, ಮಾ.14: ಲೋಕಸಭೆ ಚುನಾವಣೆಗಳು ಬಂತೆಂದರೆ ಸಾಕು ದೇಶದೆಲ್ಲೆಡೆ ಹಬ್ಬದ ಸಂಭ್ರಮ ಸಡಗರ ನೆಲೆಸುತ್ತದೆ. ಚುನಾವಣೆಯಲ್ಲಿ ಕಪ್ಪುಹಣದ ಚಲಾವಣೆ, ಪ್ರಸ್ತುತ ಆರ್ಥಿಕ ಹಿಂಜರಿತದಲ್ಲಿ ಪ್ಲಸ್ ಪಾಯಿಂಟ್ ಆಗಲಿದೆ. ಇನ್ನು ಪ್ರಚಾರಕ್ಕಾಗಿ, ಬ್ಯಾನರ್, ಬಂಟಿಂಗ್ ಗಳಿಗೆ, ಪಕ್ಷದ ಕಾರ್ಯಕರ್ತರಿಗೆ, ವಾಹನಗಳ ಬಾಡಿಗೆ... ಹೀಗೆ ಪ್ರತಿ ಹಂತದಲ್ಲೂ ಝಣ ಝಣ ಎಂದು ಕುರುಡು ಕಾಂಚಾಣ ಕುಣಿಯಲಿದೆ.

ಇವೆಲ್ಲವುಗಳಿಗಿಂತ ಮುಖ್ಯವಾಗಿ ಬುಕ್ಕಿಗಳ ಆಟಾಟೋಪ ಮೊದಲಾಗಿದೆ. ಕ್ರಿಕೆಟ್ ರೀತಿಯಲ್ಲೇ ಚುನಾವಣಾ ಸೋಲು ಗೆಲುವುಗಳ ಮೇಲೂ ಬೆಟ್ಟಿಂಗ್ ಗಳು ನಡೆಯುತ್ತವೆ. ಈ ಬಾರಿ ಬುಕ್ಕಿಗಳು ಮುಂಚಿತವಾಗಿಯೇ ಸಖಲ ಸನ್ನದ್ಧವಾಗಿ ತಯಾರಾಗಿದ್ದಾರೆ. ಪ್ರಮುಖ ಬುಕಿಗಳಾದ ಶೋಭನ್ ಮೆಹತಾ, ಲಕ್ಷ್ಮಿಚಂದ್ ತಾನಾ, ರಮೇಶ್ ಗೋಯಲ್, ಸೋನು ಚೆಂಬೂರ್ ಮುಂತಾದ ಬುಕಿಗಳು ಭಾರತ ಹಾಗೂ ಹೊರ ದೇಶಗಳಲ್ಲಿ ತಮ್ಮ ಬಂಟರನ್ನು ಬೆಟ್ಟಿಂಗ್ ಗಾಗಿ ಕಣಕ್ಕಿಳಿಸಿದ್ದಾರೆ.

ಈ ಬಾರಿ ಪ್ರಧಾನಿಯಾಗಿ ಮನಮೋಹನ್ ಸಿಂಗ್ ಅಥವಾ ಎಲ್ ಕೆ ಅಡ್ವಾಣಿ ಆಯ್ಕೆಯಾಗುತ್ತಾರಾ? ಎಂಬ ವಿಚಾರ ಮುಖ್ಯ ಬೆಟ್ಟಿಂಗ್. ಮನಮೋಹನ್ ಪರವಾಗಿ ಈಗಾಗಲೇ ಬೆಟ್ಟಿಂಗ್ ಗಳು ಜೋರಾಗಿವೆ. ಯಾವ ಪಾರ್ಟಿ ಗೆಲ್ಲುತ್ತದೆ, ಯಾವ ಪಕ್ಷ ಎಷ್ಟು ಸ್ಥಾನಗಳಲ್ಲಿ ಗೆಲ್ಲುತ್ತದೆ ಎಂಬ ವಿಷಯಗಳ ಬಗ್ಗೆ ಬೆಟ್ಟಿಂಗ್ ವ್ಯವಹಾರಕ್ಕೆ ರಂಗೇರಿದೆ.

(ಏಜೆನ್ಸೀಸ್)