ಪತ್ನಿಯಿಂದ ಮೋಸ, ಪೊಲೀಸ್ ಮೊರೆಗೆ ಟೆಕ್ಕಿ

ಬೆಂಗಳೂರು, ಮಾ. 10 : ಹುಟ್ಟಿದ ಮಗುವಿನ ಪಿತೃಮೂಲದ ಬಗ್ಗೆ ಅನುಮಾನಗೊಂಡಿರುವ ಸಾಪ್ಟ್ ವೇರ್ ಇಂಜಿನಿಯರ್ ಪೊಲೀಸ್ ಠಾಣೆ ಮೆಟ್ಟಿಲೇರಿ ತನ್ನ ಪತ್ನಿ ವಿರುದ್ಧ 420 ಪ್ರಕರಣ ದಾಖಲಿಸಿರುವ ಘಟನೆ ಸೋಮವಾರ ನಡೆದಿದೆ. ನದಿ ಮೂಲ, ಋಷಿ ಮೂಲ ಅರಸಿ ಹೋದವರ ಕಥೆಗಳು ಸೃಷ್ಟಿಸಿದ ಅವಾಂತರಗಳು ಸಾಕಷ್ಟಿವೆ. ಆದರೆ, ಈ ಸಾಫ್ಟ್ ವೇರ್ ಎಂಜಿನಿಯರ್ ಪುತ್ರನ ಹುಟ್ಟಿನ ಗುಟ್ಟು ಪತ್ತೆ ಹಚ್ಚುವುದು ಮಾತ್ರ ಅಶೋಕ ನಗರದ ಪೊಲೀಸರಿಗೆ ತಲೆ ನೋವಾಗಿ ಪರಿಣಮಿಸಿದೆ.

ತಮಿಳುನಾಡು ಮೂಲದ ಸಾಪ್ಟ್ ವೇರ್ ಇಂಜಿನಿಯರ್ ತನ್ನ ಪತ್ನಿ ಹಾಗೂ ಅವರ ಹೆತ್ತವರು ತನಗೆ ವಂಚನೆ ಮಾಡಿದ್ದಾರೆಂದು ದೂರು ನೀಡಿದ್ದಾನೆ. ಅಲ್ಲದೇ, ತನಗೆ ಹುಟ್ಟಿದ ಮಗುವಿನ ಜೈವಿಕ ಅಪ್ಪ ತಾನಲ್ಲ ಎಂದು ಎಂಬುದನ್ನು ಡಿಎನ್ಎ ಮೂಲಕ ಸಾಬೀತುಪಡಿಸಿದ್ದಾನೆ.

ಹಿನ್ನೆಲೆ

ನಗರದ ಪ್ರತಿಷ್ಠಿತ ಸಾಫ್ಟ್ ವೇರ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವ ಚೆನ್ನೈ ಮೂಲದ ಇಂಜಿನಿಯರ್ ಇಳಂಗೋವನ್ (ಹೆಸರು ಬದಲಾಯಿಸಲಾಗಿದೆ) ಮೈಸೂರಿನ ಜಿ ಡಿ ಸಿಜಾ ಎಂಬುವವರನ್ನು ಜನವರಿ 22, 2007ರಂದು ಮದುವೆಯಾಗಿತ್ತು. ಹಿರಿಯರೇ ನಿಂತು ಮದುವೆ ಮಾಡಿಸಿದ್ದರು. ಆದರೆ, ಮದುವೆಯಾದ 22 ದಿನಗಳಲ್ಲಿ ಸಿಜಾ ಆರೋಗ್ಯ ಹದಗೆಟ್ಟಿತು. ಕೈಕಾಲು ನೋವು ಎಂದು ಹಾಸಿಗೆ ಹಿಡಿದಳು. ಹೀಗಾಗಿ ಇಂಜಿನಿಯರ್ ಪತ್ನಿ ಸಿಜಾ ಅವರನ್ನು ಆಸ್ಪತ್ರೆಗೆ ದಾಖಲಿಸಿದರು. ಅಲ್ಲಿ ಅಲ್ಟ್ರಾ ಸ್ಕ್ಯಾನಿಂಗ್ ಪರೀಕ್ಷೆ ನಡೆಸಲಾಯಿತು. ನೀವು ತಂದೆಯಾಗುತ್ತಿದ್ದೀರಿ ವೈದ್ಯರು ನೀಡಿದ ವರದಿ ಓದಿದ ಇಂಜಿನಿಯರ್ ಕಂಗಾಲಾಗಿ ಹೋದ. ಏಳು ತಿಂಗಳು ನಂತರ ಸಿಜಾ ಮಗುವಿಗೆ ಜನ್ಮ ನೀಡಿದಳು.

ಮನೆಯವರೆಲ್ಲರೂ ಸೊಸೆಯನ್ನು ಪ್ರೀತಿಯಿಂದ ನೋಡುಕೊಳ್ಳುತ್ತಿದ್ದರು. ಏನೂ ಅರಿಯದ ಮಗು ಉತ್ತಮ ಬೆಳಯತೊಡಗಿತು. ಆದರೆ, ಇಂಜಿನಿಯರ್ ತಲೆಯಲ್ಲಿ ಹೊಕ್ಕಿದ್ದ ಅನುಮಾನ ದೆವ್ವ ಹೈದರಾಬಾದ್ ನ ಡಿಎನ್ಎ ಕೇಂದ್ರದಲ್ಲಿ ಪರೀಕ್ಷೆ ನಡೆಸುವಂತೆ ಪ್ರೆರೇಪಿಸಿತು. ಪರೀಕ್ಷೆ ನಡೆಸಿದ್ದೂ ಆಯಿತು. ಸಿಜಾ ಹೊಟ್ಟಿಯಲ್ಲಿ ಹುಟ್ಟಿದ ಮಗು ತನ್ನದಲ್ಲ ಎಂದು ಡಿಎನ್ಎ ಕೇಂದ್ರದಿಂದ ಖಚಿತಪಡಿಸಿಕೊಂಡು ಇಂಜಿನಿಯರ್ ಪ್ರಮಾಣ ಪತ್ರದೊಂದಿಗೆ ಅಶೋಕನಗರ ಪೊಲೀಸ್ ಠಾಣೆಯಲ್ಲಿ ಪತ್ನಿ ಹಾಗೂ ಆಕೆಯ ಪೋಷಕರು ವಿರುದ್ಧ 420 ದೂರು ದಾಖಲಿಸಿದ್ದಾರೆ. ಮದುವೆ ಮುಂಚೆ ಆಕೆ ಎರಡು ತಿಂಗಳು ಗರ್ಭಿಣಿ ಆಗಿದ್ದರು ಎಂದು ತಿಳಿದು ಬಂದಿದೆ.

(ದಟ್ಸ್ ಕನ್ನಡ ವಾರ್ತೆ)