ಬುಡಕಟ್ಟು ಜನರ ನೃತ್ಯಕ್ಕೆ ಹೆಜ್ಜೆ ಹಾಕಿದ ಸೋನಿಯಾ

ಖಮ್ಮಂ, ಫೆ. 28 : ಸದಾ ಗಂಭೀರವಾಗಿರುವ ಎಐಸಿಸಿ ಅಧ್ಯಕ್ಷೆ ಸೋನಿಯಾ ಗಾಂಧಿ ಹೆಜ್ಜೆ ಹಾಕುವುದು ಸರಳವಲ್ಲ, ಸುಲಭದ ಮಾತೂ ಅಲ್ಲ. ವಿದೇಶಿ ಮಹಿಳೆಯಾಗಿರುವ ಅವರು ಭಾರತದ ಘನ ಕುಟುಂಬದ ಸೊಸೆಯಾಗಿ ಬಂದ ನಂತರ ಇಟಲಿಯ ಅಷ್ಟೂ ಸಂಸ್ಕೃತಿಯನ್ನು ಕಟ್ಟಿಟ್ಟು, ಭಾರತೀಯ ಮಹಿಳಾ ಸಂಸ್ಕೃತಿ ಮೈಗೂಡಿಸಿಕೊಂಡು ಅದನ್ನು ಚಾಚು ತಪ್ಪದೇ ಆಚರಿಸಿಕೊಂಡು ಬರುತ್ತಿದ್ದಾರೆ. ಇಷ್ಟೆಲ್ಲದರ ಮಧ್ಯೆ ಬಿಜೆಪಿ ಪಾಲಿಗೆ ಅವರಿನ್ನೂ ವಿದೇಶಿ ಮಹಿಳೆ. ಅದಿರಲಿ ಶುಕ್ರವಾರ ಖಮ್ಮಂನಲ್ಲಿ ಏರ್ಪಡಿಸಲಾಗಿದ್ದ ಕಾಂಗ್ರೆಸ್ ಸಮಾವೇಶದಲ್ಲಿ ಬುಡಕಟ್ಟು ಜನಾಂಗದ ಸಾಂಪ್ರಾದಾಯಕ ಗೊಮ್ಮು ಕೋಯಿ ನೃತ್ಯಕ್ಕೆ ಹೆಜ್ಜೆ ಹಾಕಿರುವುದು ರಾಷ್ಟ್ರೀಯ ಸುದ್ದಿಯಾಗಿದೆ.

ಕೇಂದ್ರ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ಸಚಿವೆ ರೇಣುಕ ಚೌಧುರಿ ಪ್ರತಿನಿಧಿಸುವ ಆಂಧ್ರಪ್ರದೇಶದ ಖಮ್ಮಂ ಜಿಲ್ಲೆಯ ಕೊತ್ತಗೂಡೆಂನಲ್ಲಿ ಏರ್ಪಡಿಸಲಾಗಿದ್ದ ಕಾಂಗ್ರೆಸ್ ಸಮಾವೇಶದಲ್ಲಿ ಎಐಸಿಸಿ ನಾಯಕಿ ಸೋನಿಯಾ ಗಾಂಧಿ, ಮುಖ್ಯಮಂತ್ರಿ ವೈ ಎಸ್ ರಾಜಶೇಖರರೆಡ್ಡಿ ಸೇರಿದಂತೆ ಅನೇಕ ಪ್ರಮುಖರು ಭಾಗವಹಿಸಿದ್ದರು. ಕಾರ್ಯಕ್ರಮದ ಮುನ್ನ ಬಡಕಟ್ಟು ಜನಾಂಗದ ಗೊಮ್ಮುಕೋಯಿ ನೃತ್ಯಕ್ಕೆ ಅವಕಾಶ ಮಾಡಿಕೊಡಲಾಗಿತ್ತು.

ಬುಡಕಟ್ಟು ಜನರ ನೃತ್ಯ ಆರಂಭಿಸುತ್ತಿದ್ದಂತೆಯೇ ನೆರೆದಿದ್ದ ಜನ ಹುಚ್ಚೆದ್ದು ಕುಣಿಯಲು ಆರಂಭಿಸಿದರು. ಈ ಮಧ್ಯೆ, ಬುಡಕಟ್ಟು ಮಹಿಳೆಯರು ವೇದಿಕೆ ಮೇಲೆ ಕುಳಿತಿದ್ದ ಮುಖ್ಯಮಂತ್ರಿ ರಾಜಶೇಖರರೆಡ್ಡಿ, ಸೋನಿಯಾಗಾಂಧಿ ಹಾಗೂ ರೇಣುಕಾ ಚೌಧರಿ ಕಡೆ ಕೈಬೀಸಿ ತಮ್ಮೊಂದಿಗೆ ಕುಣಿಯಲು ಆಹ್ವಾನಿಸಿದರು. ರಾಜಶೇಖರರರೆಡ್ಡಿ ನೃತ್ಯ ಮಾಡಲು ನಿರಾಕರಿಸಿದಾದರೂ, ಸೋನಿಯಾ ಗಾಂಧಿ ಹಾಗೂ ರೇಣುಕಾ ಚೌಧರಿ ಸೀರೆಗಳನ್ನು ಬಿಗಿದುಕೊಂಡು ಹೆಜ್ಜೆ ಹಾಕತೊಡಗಿದರು. ಇದರಿಂದ ಸೇರಿದ್ದ ಜನರು ಕೇಕೆ ಹಾಕತೊಡಗಿದರೆ, ಸ್ಥಳೀಯ ಕಾಂಗ್ರೆಸ್ ನಾಯಕರು ಒಂದು ಕ್ಷಣ ಅವಾಕ್ಕಾದರು.

(ಏಜೆನ್ಸೀಸ್)