ಫ್ರಾಂಟಿಯರ್ ಕಂಪನಿಯಿಂದ ಕೋಟ್ಯಂತರ ರು. ವಂಚನೆ

ಬೆಂಗಳೂರು, ಫೆ. 22 : ಫ್ರಾಂಟಿಯರ್ ಗ್ರೂಫ್ ಆಫ್ ಕಂಪನೀಸ್ ಎಂಬ ಹೆಸರಿನ ಕಂಪನಿಯೊಂದರಲ್ಲಿ ಫ್ರಾಂಚೈಸಿ (ಶಾಖೆ) ನೀಡುವುದಾಗಿ ನೂರಾರು ಜನರಿಂದ ಕೋಟ್ಯಂತರ ರುಪಾಯಿ ಪಡೆದು ವಂಚಿಸಿದ ಘಟನೆ ನಡೆದಿದೆ. ಈ ಬಗ್ಗೆ ಕಮರ್ಷಿಯಲ್ ಸ್ಟ್ರೀಟ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ನಗರದ ಎಂಟು ಕಡೆ ಶಾಖಾ ಕಚೇರಿ ಹೊಂದಿರುವ ಫ್ರಾಂಟಿಯರ್ ಗ್ರೂಫ್ ಆಫ್ ಕಂಪನೀಸ್ ನ ಕೇಂದ್ರ ಕಚೇರಿ ಕಬ್ಬನ್ ರಸ್ತೆಯಲ್ಲಿದೆ. ಹೋಟೆಲ್, ಬ್ಯೂಟಿ ಪಾರ್ಲರ್, ಸಿದ್ಧ ಉಡುಪು, ಸರ್ವೀಸ್ ಅಪಾರ್ಟ್ ಮೆಂಟ್ ಮುಂತಾದವುಗಳಿಗೆ ಫ್ರಾಂಟೈಸಿ ನೀಡಲು ಕಂಪನಿ ಕೆಲ ದಿನಗಳ ಹಿಂದೆ ಪತ್ರಿಕೆಗಳಲ್ಲಿ ಜಾಹೀರಾತು ನೀಡಿತ್ತು. ಇದನ್ನು ನಂಬಿದ ನೂರಾರು ಮಂದಿ 50 ಸಾವಿರ, 1 ಲಕ್ಷ ಮತ್ತು ಮೂರು ಲಕ್ಷ ರುಪಾಯಿ ನೀಡಿ ಫ್ರಾಂಚೈಸಿ ಪಡೆದುಕೊಂಡಿದ್ದರು. ಆದರೆ, ಎರಡು ದಿನಗಳಿಂದ ಕಚೇರಿಯ ಬಾಗಿಲು ಮುಚ್ಚಲಾಗಿದೆ. ಕಂಪನಿಯ ಮಾಲೀಕ ಸುಮಂತ್ ಕುಮಾರ್ ದಾಸ್ ಎಂಬುವವರು ನಾಪತ್ತೆಯಾಗಿದ್ದಾರೆ. ಈ ಸುದ್ದಿ ತಿಳಿದ ತಕ್ಷಣ ಹಣ ಕಟ್ಟಿದ್ದ ನೂರಕ್ಕೂ ಅಧಿಕ ಮಂದಿ ಠಾಣೆಯ ಎದುರು ಶುಕ್ರವಾರ ರಾತ್ರಿ ಜಮಾಯಿಸಿ ಪ್ರತಿಭಟನೆ ನಡೆಸಿದರು.

ಕಂಪನಿಯ ವ್ಯವಹಾರ ಮೊದಲು ಚೆನ್ನಾಗಿಯೇ ನಡೆಯುತ್ತಿತ್ತು. ಆದರೆ, ಹಣವನ್ನು ರಿಯಲ್ ಎಸ್ಟೇಟ್ ವ್ಯವಹಾರದಲ್ಲಿ ತೊಡಗಿಸಲಾಯಿತು. ಆರ್ಥಿಕ ಬಿಕ್ಕಟ್ಟು ಹಿನ್ನೆಲೆಯಲ್ಲಿ ರಿಯಲ್ ಎಸ್ಟೇಟ್ ವ್ಯವಹಾರ ನಷ್ಟ ಅನುಭವಿಸಿ ಕಂಪನಿ ಬಾಗಿಲು ಮುಚ್ಚಲಾಗಿದೆ ಎಂದು ತಿಳಿದು ಬಂದಿದೆ. ಕಂಪನಿಯ ಮಾಲೀಕ ಮುಂಬೈ ಮೂಲದವರು ಎನ್ನಲಾಗಿದೆ. ವಂಚನೆ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)