ಕೆಎಸ್ಸಾರ್ಟಿಸಿ, ಬಿಎಂಟಿಸಿ ಬಸ್ ದರ ಇಳಿಕೆ

ಬೆಂಗಳೂರು, ಜ.31: ಬಿಎಂಟಿಸಿ, ಕೆಎಸ್ ಆರ್ ಟಿಸಿ ಬಸ್ ಪ್ರಯಾಣಿಕರಿಗೆ ಸಂತಸದ ಸುದ್ದಿ. ಡೀಸೆಲ್, ಪೆಟ್ರೋಲ್ ದರಗಳು ಕಡಿಮೆಯಾದ ಹಿನ್ನೆಲೆಯಲ್ಲಿ ಬಸ್ ಪ್ರಯಾಣ ದರಗಳನ್ನು ರಾಜ್ಯ ಸರಕಾರ ಕಡಿಮೆ ಮಾಡಿದೆ. ಇಳಿಕೆ ಮಾಡಲಾದ ಪ್ರಯಾಣ ದರಗಳು ಫೆಬ್ರವರಿ 5 ರಿಂದ ಜಾರಿಗೆ ಬರಲಿವೆ ಎಂದು ರಾಜ್ಯ ಸಾರಿಗೆ ಸಚಿವ ಆರ್ ಅಶೋಕ್ ಶನಿವಾರ ತಿಳಿಸಿದರು.

ಸಾಮಾನ್ಯ ಸಾರಿಗೆ ಬಸ್ ದರವನ್ನು ಶೇ.8 ರಷ್ಟು ಕಡಿಮೆ ಮಾಡಲಾಗಿದ್ದು, ಸುವರ್ಣ ಶೇ. 20, ಪುಷ್ಪಕ್ ಶೇ.8, ವಾಯುವಜ್ರ ಶೇ.17ರಷ್ಟು ಇಳಿಕೆ ಮಾಡಲಾಗಿದೆ. ಗ್ರಾಮೀಣ ಸಾರಿಗೆ ಪ್ರಯಾಣ ದರಗಳಲ್ಲೂ ಇಳಿಕೆ ಮಾಡಲಾಗಿದೆ. ಕೆಎಸ್ ಆರ್ ಟಿಸಿ ಬಸ್ ದರಗಳನ್ನು ಶೇ.6.7ರಷ್ಟು ಇಳಿಕೆ ಮಾಡಲಾಗಿದ್ದು ವೇಗದೂತ ಬಸ್ ದರಗಳನ್ನು ಶೇ. 7.5ರಷ್ಟು ಇಳಿಸಲಾಗಿದೆ.

ಪೆಟ್ರೋಲಿಯಂ ಉತ್ಪನ್ನಗಳ ದರಗಳನ್ನು ಕೇಂದ್ರ ಸರಕಾರ ಇಳಿಸಿರುವ ಹಿನ್ನೆಲೆಯಲ್ಲಿ ರಾಜ್ಯ ಸರಕಾರ ಈ ನಿರ್ಣಯ ಕೈಗೊಂಡಿದೆ. ಒಂದು ವಾರದಲ್ಲಿ ಆಟೋ ಪ್ರಯಾಣ ದರ ಇಳಿಕೆ ಬಗ್ಗೆ ತೀರ್ಮಾನಿಸಲಾಗುತ್ತದೆ ಎಂದು ಸಚಿವರು ತಿಳಿಸಿದರು. ಬಸ್ ಪ್ರಯಾಣ ದರಗಳನ್ನು ಕಡಿಮೆ ಮಾಡಬೇಕೆಂಬ ಪ್ರಯಾಣಿಕರ ಬಹುದಿನದ ಬೇಡಿಕೆ ಇಂದು ಈಡೇರಿದೆ.

(ದಟ್ಸ್ ಕನ್ನಡ ವಾರ್ತೆ)