ಇತಿಹಾಸದ ಪುಟ ಸೇರಲಿರುವ ಇಂಡಿಯನ್ ಕಾಫಿ ಹೌಸ್

ಬೆಂಗಳೂರು, ಜ. 22 : ಮಹಾತ್ಮಾ ಗಾಂಧಿ ರಸ್ತೆಯಲ್ಲಿರುವ ದಿ ಇಂಡಿಯಾ ಕಾಫಿ ಹೌಸ್ ನಲ್ಲಿ ಕಾಫಿ ಹೀರುತ್ತಿದ್ದ ಕಾಫಿ ಪ್ರಿಯರಿಗೆ ಇನ್ನು ಅಂಥ ಪರಿಮಳಯುಕ್ತ ಕಾಫಿ ದೊರೆಯಲಾರದು. 52 ವರ್ಷಗಳಿಂದ ಕಾಫಿ, ತಿಂಡಿಗಳ ಸೇವೆ ನೀಡುತ್ತಿದ್ದ ದಿ ಇಂಡಿಯಾ ಕಾಫಿ ಹೌಸ್ ಫೆಬ್ರವರಿ ತಿಂಗಳಲ್ಲಿ ಇತಿಹಾಸದ ಪುಟ ಸೇರಲಿದೆ.

ಫೆಬ್ರವರಿ 20 2009ರ ಒಳಗೆ ಕಾಫಿ ಹೌಸನ್ನು ಸ್ಥಳಾಂತರಿಸಬೇಕೆಂದು ಕರ್ನಾಟಕ ಉಚ್ಚ ನ್ಯಾಯಾಲಯ ಆದೇಶ ನೀಡಿದೆ. ಎಂಜಿ ರಸ್ತೆಗೆ ಬಂದಾಗಲೆಲ್ಲ ಸ್ನೇಹಿತರೊಂದಿಗೆ ಹರಟೆ ಹೊಡೆದು ಕಾಫಿ ಹೀರಿ ಈ ಹೊಟೇಲಿನೊಂದಿಗೆ ಅವ್ಯಕ್ತ ಬಾಂಧವ್ಯ ಬೆಳೆಸಿಕೊಂಡಿದ್ದ ಅನೇಕರು ಈಗ ಗತಕಾಲದ ಪಳಿಯುಳಿಕೆ ಇತಿಹಾಸದ ಪುಟ ಸೇರಬಾರದೆಂದು ಟೊಂಕ ಕಟ್ಟಿ ನಿಂತಿದ್ದಾರೆ. ದಿ ಇಂಡಿಯಾ ಕಾಫಿ ಹೌಸನ್ನು ಹೇಗಾದರೂ ಉಳಿಸಬೇಕೆಂದು ಫೇಸ್ ಬುಕ್ ಸೋಷಿಯಲ್ ನೆಟ್ವರ್ಕಿಂಗ್ ಅಂತರ್ಜಾಲ ತಾಣದಲ್ಲಿ ಅಭಿಯಾನ ಪ್ರಾರಂಭಿಸಲಾಗಿದೆ.

ಈಗಾಗಲೆ 158 ಜನ ಈ ಅರ್ಜಿಯನ್ನು ಅನುಮೋದಿಸಿ ದಿ ಇಂಡಿಯನ್ ಕಾಫಿ ಹೌಸ್ ಉಳಿಸಬೇಕೆಂಬ ಅಭಿಯಾನಕ್ಕೆ ಬೆಂಬಲ ವ್ಯಕ್ತಪಡಿಸಿದ್ದಾರೆ. ತೆರವುಗೊಳಿಸುವುದು ಹೈಕೋರ್ಟ್ ಆದೇಶವಾದ್ದರಿಂದ ಏನೂ ಮಾಡಲಾಗದು ಎಂದು ಕೆಲವರು ಹತಾಶೆ ವ್ಯಕ್ತಪಡಿಸಿದ್ದರೆ, ಇದನ್ನು ಬೇರೆ ಜಾಗಕ್ಕೆ ಸ್ಥಳಾಂತರಿಸಲು ಸಾಧ್ಯವೇ? ಅದಕ್ಕೆ ಸ್ಥಳ ದೊರೆಯುವುದೆ ಎಂದು ಇನ್ನು ಕೆಲವರು ಚಿಂತಿಸುತ್ತಿದ್ದಾರೆ.

ಕಳೆದ ಶತಮಾನದ ಎಪ್ಪತ್ತು ಎಂಬತ್ತರ ದಶಕಗಳಿಂದ ಎಂಜಿ ರಸ್ತೆಯಲ್ಲಿ ಅಲೆದಾಡಿದವರಿಗೆ ಈಗ ಈ ರಸ್ತೆ ತಳೆದಿರುವ ಸ್ಥಿತಿ ನೋಡಿದರೆ ಕರಳು ಚುರ್ ಎನ್ನದೆ ಇರದು. ಅನೇಕ ಹಳೆ ಕಟ್ಟಡಗಳು ನಿರ್ನಾಮವಾಗಿ ಹೊಸ ಕಟ್ಟಡಗಳಿಗೆ ಜಾಗ ಮಾಡಿ ಕೊಟ್ಟಿವೆ. ಪ್ಲಾಜಾ ಥಿಯೇಟರ್ ಚಿತ್ರಪ್ರದರ್ಶನ ನಿಲ್ಲಿಸಿ ವರ್ಷಗಳೇ ಕಳೆದಿವೆ. ಇನ್ನು ಉಳಿದವು ದಿನಗಳನ್ನು ಎಣಿಸುತ್ತಿವೆ.

1940ರಲ್ಲಿ ಬ್ರಿಟಿಷರ ಕಾಲದಲ್ಲೇ ಕಾಫಿ ಬೋರ್ಡ್ ಕಾಫಿ ಹೌಸ್ ಗಳನ್ನು ರಾಷ್ಟ್ರದಾದ್ಯಂತ ಶುರು ಮಾಡಿದ್ದರೂ, 50ರ ದಶಕದ ಮಧ್ಯದಲ್ಲಿ ನಿಂತುಹೋಗಿದ್ದವು. ಮತ್ತೆ 1957ರಲ್ಲಿ ಭಾರತೀಯ ಕಾಫಿ ನೌಕರರ ಸಹಕಾರ ಸಂಘ ನಿರ್ಮಾಣವಾಗಿ ಕಾಫಿ ಹೌಸ್ ; ದಿ ಇಂಡಿಯನ್ ಕಾಫಿ ಹೌಸ್ ಹೆಸರಿನಲ್ಲಿ ಬೆಂಗಳೂರಿನಲ್ಲಿ ಪುರರ್ಜೀವನ ಪಡೆಯಿತು.

(ದಟ್ಸ್ ಕನ್ನಡ ವಾರ್ತೆ)