ಪ್ಲಾಸ್ಟಿಕ್ ಮುಕ್ತ ನಂದಿಬೆಟ್ಟಕ್ಕೆಟೊಂಕ ಕಟ್ಟಿದ ಟೆಕ್ಕಿಗಳು

ಬೆಂಗಳೂರು, ಆ.19: ಪ್ಲಾಸ್ಟಿಕ್ ಮತ್ತಿತರ ಕಸ-ಕಡ್ಡಿಯಿಂದ ಕಲುಷಿತವಾಗುತ್ತಿರುವ ನಂದಿ ಗಿರಿಧಾಮವನ್ನು ರಕ್ಷಿಸಲು 'ಕ್ಲೀನ್ ಅಂಡ್ ಗ್ರೀನ್' ಎಂಬ ಸ್ವಯಂ ಸೇವಾ ಸಂಸ್ಥೆ 'ಕ್ಲೀನ್ ನಂದಿ-ಗ್ರೀನ್ ನಂದಿ'ಎಂಬ ವಿಶಿಷ್ಟ ಅಭಿಯಾನವನ್ನು ಆ.24ರಿಂದ ಆರಂಭಿಸಲಿದೆ.

ನಂದಿ ಗಿರಿಧಾಮದಲ್ಲಿ ಪರಿಸರಕ್ಕೆ ಹಾನಿ ಉಂಟು ಮಾಡುತ್ತಿರುವ ಪ್ಲಾಸ್ಟಿಕ್ ಮತ್ತಿತರ ಕಸ ಕಡ್ಡಿಯನ್ನು ಹೆಕ್ಕಿ ಸ್ವಚ್ಛ ಮಾಡಲು ಆ.24ರಿಂದ ಪ್ರತಿ ಶನಿವಾರ ಮತ್ತು ಭಾನುವಾರಗಳಿಂದ 10 ಸಾವಿರಕ್ಕೂ ಅಧಿಕ ಸ್ವಯಂ ಸೇವಕರು ಆಗಮಿಸಲಿದ್ದಾರೆ. ಪ್ಲಾಸ್ಟಿಕ್ ಚೀಲ/ಬಾಟಲಿ, ಐಸ್ ಕ್ರೀಂ ಕಪ್, ಗುಟ್ಕಾ ಮತ್ತು ಸಿಗರೇಟ್ ಪ್ಯಾಕೆಟ್‌ಗಳನ್ನು ಹೆಕ್ಕಿ ತೆಗೆಯುವ ಅಭಿಯಾನದಲ್ಲಿ ನೂರಾರು ಸಾಫ್ಟ್‌ವೇರ್ ಇಂಜಿನಿಯರ್‌ಗಳು ಭಾಗವಹಿಸುತ್ತಿರುವುದು ವಿಶೇಷ.

ಈ ಕುರಿತು ಕಾರ್ಯಕ್ರಮದ ಆಯೋಜಕ ದೀಪಕ್ ಮಾತನಾಡುತ್ತಾ, ಮೊದಲು ಇಂತಿಷ್ಟು ತಂಡಗಳನ್ನು ರಚಿಸುತ್ತೇವೆ. ನಂತರ ಸ್ಥಳಗಳನ್ನು ನಿಗದಿ ಮಾಡಿ ಪ್ರತಿ ತಂಡಕ್ಕು ಗೋಣಿ ಚೀಲ ಕೈಗವಸು ಕೊಡುತ್ತೇವೆ. ಪ್ಲಾಸ್ಟಿಕ್ ತೆಗೆಯುವುದರ ಜೊತೆಗೆ ಅಲ್ಲಿನ ಪ್ರವಾಸಿಗರಲ್ಲಿ ಜಾಗೃತಿ ಮೂಡಿಸಲಾಗುತ್ತದೆ. ನಂದಿ ಬೆಟ್ಟದಲ್ಲಿ ಸಂಗ್ರಹಿಸಿದ ಪ್ಲಾಸ್ಟಿಕನ್ನು ಬೆಂಗಳೂರಿನ ಕೆ.ಕೆ. ಪ್ಲಾಸ್ಟಿಕ್ ಸಂಸ್ಥೆಗೆ ಒಪ್ಪಿಸಲಾಗುತ್ತದೆ. ಇದನ್ನು ಡಾಂಬರಿನೊಂದಿಗೆ ಮಿಶ್ರಣ ಮಾಡಿ ರಸ್ತೆಗೆ ಬಳಸಲಾಗುತ್ತದೆ . ಹಾಗೆಯೇ ನಂದಿ ಗಿರಿಧಾಮದಲ್ಲಿ ಸಸಿ ನೆಡುವ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ ಎಂದು ವಿವರ ನೀಡಿದರು.

ಈ ಅಭಿಯಾನದಲ್ಲಿ ಚಿಕ್ಕಬಳ್ಳಾಪುರ ಜಿಲ್ಲಾಧಿಕಾರಿ ಕಚೇರಿ, ಅರಣ್ಯ ಇಲಾಖೆ, ಯುವಜನ ಸೇವಾ ಇಲಾಖೆ ಸಿಬ್ಬಂದಿ ಭಾಗವಹಿಸಲಿದ್ದಾರೆ. ಹೈಕೋರ್ಟ್‌ನ ಕೆಲವು ವಕೀಲರು ಕೈಜೋಡಿಸಿ ಸಹಕರಿಸಲಿದ್ದಾರೆ. ಅಭಿಯಾನದಲ್ಲಿ ಭಾಗವಹಿಸಲು ಇಚ್ಛಿಸುವ ಆಸಕ್ತರು ದೀಪಕ್ ಅವರನ್ನು 99809 40872 ಮೊಬೈಲ್ ಸಂಖ್ಯೆಯ ಮೂಲಕ ಸಂಪರ್ಕಿಸಬಹುದು.

(ದಟ್ಸ್‌ಕನ್ನಡ ವಾರ್ತೆ)