ಒಲಿಂಪಿಕ್ಸ್ :ಲಾಂಗ್ ಜಂಪ್ ಪಟು ಅಂಜು ಹೊರಕ್ಕೆ

ಬೀಜಿಂಗ್, ಆ. 19 : ಭಾರತೀಯ ಭರವಸೆಯ ಲಾಂಗ್ ಜಂಪ್ ಪಟು ಅಂಜು ಬಾಬ್ಬಿ ಜಾರ್ಜ್ ಫೈನಲ್ ತಲುಪುವಲ್ಲಿ ವಿಫಲರಾಗಿ ಒಲಿಂಪಿಕ್ಸ್ ಕ್ರೀಡಾಕೂಟದಿಂದ ಹೊರಬಿದ್ದು ಭಾರತೀಯ ಕ್ರೀಡಾ ಪ್ರೇಮಿಗಳಿಗೆ ಭಾರಿ ನಿರಾಶೆ ಮೂಡಿಸಿದ್ದಾರೆ.

ಭಾರಿ ಭರವಸೆಯೊಂದಿಗೆ ಬೀಜಿಂಗ್ ತೆರಳಿದ್ದ ಭಾರತೀಯ ಕ್ರೀಡಾಪಟುಗಳು ನಿರೀಕ್ಷಿತ ಮಟ್ಟದಲ್ಲಿ ಪ್ರದರ್ಶನ ನೀಡುವಲ್ಲಿ ವಿಫಲರಾಗಿದ್ದಾರೆ. ಭಾರತಕ್ಕೆ ಇನ್ನೊಂದು ಪದಕದ ಆಸೆಯ ಭರವಸೆಯನ್ನು ನೀಡಿದ್ದ ಬಾಕ್ಸರ್ ಅಖಿಲ್ ಕುಮಾರ್ ಅವರು ಮಾಲ್ಡೋವ್ ನ ವಿಸಸ್ಲಾವ್ ಅವರೊಂದಿಗೆ ಸೋಲುವ ಮೂಲಕ ನಿರಾಶೆ ಮೂಡಿಸಿದ್ದರು.

ಇಂದು ಮತ್ತೆ ಭಾರತೀಯ ಆಟಗಾರರ ನೀರಸ ಪ್ರದರ್ಶನ ಮುಂದುವರೆದಿದ್ದು, ಅಂಜು ಜಾರ್ಜ್ ಅವರು ಲಾಂಗ್ ಜಂಪ್ ಪಂದ್ಯದಲ್ಲಿ ಆರಂಭಿಕ ಮೂರು ಅವಕಾಶಗಳಲ್ಲಿ ಮೂರರಲ್ಲಿಯೂ ಫೌಲ್ ಮಾಡುವ ಸ್ಪರ್ಧೆಯಲ್ಲಿ ಹಿನ್ನೆಡೆ ಅನುಭವಿಸಿದರು. ಅಂಜು ಜಾರ್ಜ್ ಅವರು 2003ರಲ್ಲಿ ನಡೆದ ವಿಶ್ವ ಅಥ್ಲೆಟಿಕ್ಸ್ ನಲ್ಲಿ ಬೆಳ್ಳಿ ಪದಕ ಪಡೆದಿದ್ದರು. ಈ ಮೂಲಕ ಅಭಿನವ್ ಬಿಂದ್ರಾ ಅವರ ಚಿನ್ನ ಹೊರತುಪಡಿಸಿ ಬೀಜಿಂಗ್ ಒಲಿಂಪಿಕ್ಸ್ ನಲ್ಲಿ ಭಾರತಕ್ಕೆ ಇಲ್ಲಿಯವರೆಗೂ ಯಾವ ಪದಕಗಳು ಭಾರತಕ್ಕೆ ದಕ್ಕಿಲ್ಲ. ಕುಸ್ತಿ ಪಂದ್ಯದಲ್ಲಿ ಭಾರತದ ಯೋಗೇಶ್ವರ್ ದತ್ತಾ ಜಪಾನಿನ ಎದುರಾಳಿಯ ವಿರುದ್ಧ ಸೋಲುಂಡಿದ್ದಾರೆ. ಉಳಿದಂತೆ ಪುರುಷರ ಟೇಬಲ್ ಟೆನ್ನಿಸ್ ಸ್ಪರ್ಧೆಯಲ್ಲಿ ಕಮಲ್ ಎರಡನೇ ಸುತ್ತು ಪ್ರವೇಶಿಸಿ ಭರವಸೆ ಮೂಡಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)

ಒಲಿಂಪಿಕ್ಸ್ :ಬಾಕ್ಸರ್ ಅಖಿಲ್ ಕುಮಾರ್ ಗೆ ಸೋಲು