ಬೆಳಗಾವಿಯ ಎಸ್‌ಬಿಐ ಬ್ರಾಂಚ್‌ನಲ್ಲಿ 12 ಲಕ್ಷ ದರೋಡೆ

ಬೆಳಗಾವಿ : ಏಳು ಮಂದಿ ದರೋಡೆಕೋರದ ತಂಡ ಸುಮಾರು 10ರಿಂದ 12ಲಕ್ಷ ರೂಪಾಯಿಗಳನ್ನು ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾದ ರಾಣಿ ಚನ್ನಮ್ಮ ನಗರದ ಬ್ರಾಂಚ್‌ನಲ್ಲಿ ಶುಕ್ರವಾರ ಲೂಟಿ ಮಾಡಿದೆ.

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಹೇಮಂತ್‌ ನಿಂಬಾಳ್ಕರ್‌ ಸುದ್ದಿಗಾರರಿಗೆ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಗ್ರಾಹಕರಂತೆ ಈ ದರೋಡೆಕೋರರು ಬ್ಯಾಂಕ್‌ನೊಳಕ್ಕೆ ಬಂದರು. ಬಲವಂತದಿಂದ ಬ್ಯಾಂಕ್‌ ವ್ಯವಸ್ಥಾಪಕರ ಕೋಣೆಗೆ ನುಗ್ಗಿದರು. ವ್ಯವಸ್ಥಾಪಕರಿಗೆ ರಿವಲ್ವಾರ್‌ ತೋರಿಸಿ ಬೆದರಿಸಿ, ಹಣವನ್ನು ದೋಚಿದ್ದಾರೆ. ನಂತರ ಪರಾರಿಯಾಗಿದ್ದಾರೆ ಎಂದು ನಿಂಬಾಳ್ಕರ್‌ ಹೇಳಿದ್ದಾರೆ.

ದರೋಡೆಕೋರರು 25ರಿಂದ 35ವರ್ಷದೊಳಗಿನವರು ಎನ್ನಲಾಗಿದೆ. ಶ್ವಾನದಳ, ಬೆರಳಚ್ಚು ತಜ್ಞರು ಶೋಧನಾ ಕಾರ್ಯವನ್ನು ನಡೆಸುತ್ತಿದ್ದಾರೆ.

(ಯುಎನ್‌ಐ)