ಹೊಸ ವರ್ಷ: ಬೆಂಗಳೂರ ಕೆಲ ರಸ್ತೆಯಲ್ಲಿ ವಾಹನ ಸಂಚಾರಕ್ಕೆ ತಡೆ

ಹೊಸ ವರ್ಷ: ಬೆಂಗಳೂರ ಕೆಲ ರಸ್ತೆಯಲ್ಲಿ ವಾಹನ ಸಂಚಾರಕ್ಕೆ ತಡೆ
ಡಿ.31ರ ಮಧ್ಯಾಹ್ನ ನಾಲ್ಕು ಗಂಟೆಯಿಂದ ಜ.1ರ ಬೆಳಗ್ಗೆ 5ಗಂಟೆವರೆಗೆ ನಿರ್ಬಂಧ ಜಾರಿ

ಹಳೆಯ ವರ್ಷ ಕಳೆದು ಹೊಸ ವರುಷ ಬರುತ್ತಿದೆ. ಸುನಾಮಿ ಸೂತಕದ ನಡುವೆಯೂ ಹೊಸ ವರುಷದ ಸ್ವಾಗತಕ್ಕೆ ಎಲ್ಲೆಡೆಯೂ ಸಿದ್ಧತೆ ನಡೆದಿದೆ. ಉಳ್ಳವರ ಸ್ವರ್ಗ ಬೆಂಗಳೂರಿನಲ್ಲಿ ಕೇಳಬೇಕೆ?

ಹೊಸ ವರುಷದ ಆಚರಣೆಗೆ ಸಹಸ್ರಾರು ಮಂದಿ ಭೇಟಿ ನೀಡುವ ಬೆಂಗಳೂರಿನ ಪ್ರಮುಖ ರಸ್ತೆಗಳಲ್ಲಿ ಸುರಕ್ಷತೆಯ ದೃಷ್ಟಿಯಿಂದ ವಾಹನಗಳ ಸಂಚಾರವನ್ನು ನಿರ್ಬಂಧಗೊಳಿಸಿದೆ. ನಗರದ ಮಹಾತ್ಮಗಾಂಧಿ ರಸ್ತೆ ಮತ್ತು ಬ್ರಿಗೇಡ್‌ ರಸ್ತೆಗಳ ಸುತ್ತಮುತ್ತಲ ಪ್ರದೇಶಗಳಲ್ಲಿ ವಾಹನ ಸಂಚಾರ ಮತ್ತು ನಿಲುಗಡೆಗೆ ನಿರ್ಬಂಧ ಹೇರಲಾಗಿದೆ.

ವಾಹನ ಸಂಚಾರ ನಿರ್ಬಂಧ ಎಲ್ಲೆಲ್ಲಿ ?

• ಮಹಾತ್ಮಗಾಂಧಿ ರಸ್ತೆಯ ಅನಿಲ್‌ ಕುಂಬ್ಳೆ ಜಂಕ್ಷನ್‌ನಿಂದ ಮೇಯೋ ಹಾಲ್‌ ಜಂಕ್ಷನ್‌ವರೆಗೆ.
• ಬ್ರಿಗೇಡ್‌ ರಸ್ತೆಯ ಕಾವೇರಿ ಎಂಪೋರಿಯಂ ಜಂಕ್ಷನ್‌ನಿಂದ ಒಪೆರಾ ವೃತ್ತದವರೆಗೆ.
• ಚರ್ಚ್‌ ಸ್ಟ್ರೀಟ್‌ ರಸ್ತೆಯ ಬ್ರಿಗೇಡ್‌ ಜಂಕ್ಷನ್‌ನಿಂದ ಮ್ಯೂಸಿಯಂ ರಸ್ತೆಯವರೆಗೆ.
• ಮ್ಯೂಸಿಯಂ ರಸ್ತೆಯಲ್ಲಿ ಎಂ.ಜಿ. ರಸ್ತೆ ಜಂಕ್ಷನ್‌ನಿಂದ ಮದ್ರಾಸ್‌ ಬ್ಯಾಂಕ್‌ ರಸ್ತೆವರೆಗೆ.
• ರೆಸ್ಟ್‌ ಹೌಸ್‌ ರಸ್ತೆಯಲ್ಲಿ ಮ್ಯೂಸಿಯಂ ರಸ್ತೆ ಜಂಕ್ಷನ್‌ನಿಂದ ಬ್ರಿಗೇಡ್‌ ರಸ್ತೆಗಳಿಗೆ ಮತ್ತು ಕಾಮರಾಜ ರಸ್ತೆಯಲ್ಲಿ ಕಾವೇರಿ ಎಂಪೋರಿಯಂನಿಂದ ಕಬ್ಬನ್‌ ರಸ್ತೆಯವರೆಗೆ ವಾಹನ ಸಂಚಾರ ಮತ್ತು ವಾಹನ ನಿಲುಗಡೆ ನಿಷೇಧಿಸಲಾಗಿದೆ.
• ಈ ನಿರ್ಬಂಧಗಳು ಪೊಲೀಸ್‌ ಮತ್ತು ಅಗತ್ಯ ಸೇವೆಗಳನ್ನು ಪೂರೈಸುವ ವಾಹನಗಳನ್ನು ಹೊರತುಪಡಿಸಿ ಇತರೆಲ್ಲಾ ವಾಹನಗಳಿಗೆ ಡಿಸೆಂಬರ್‌ 31ರ ಮಧ್ಯಾಹ್ನ ನಾಲ್ಕು ಗಂಟೆಯಿಂದ ಜನವರಿ 1ರ ಬೆಳಗ್ಗೆ 5ಗಂಟೆಯವರೆಗೆ ಅನ್ವಯಿಸುತ್ತವೆ ಎಂದು ನಗರದ ಪೊಲೀಸ್‌ ಕಮಿಷನರ್‌ ಕಚೇರಿಯ ಪ್ರಕಟಣೆ ತಿಳಿಸಿವೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು