ಗೊಂದಲರಹಿತ ಪರಿಸರದಿ ಸಿಇಟಿ ಕೌನ್ಸೆಲಿಂಗ್‌ ಸೆ.10ರಿಂದ ಪ್ರಾರಂಭ

ಗೊಂದಲರಹಿತ ಪರಿಸರದಿ ಸಿಇಟಿ ಕೌನ್ಸೆಲಿಂಗ್‌ ಸೆ.10ರಿಂದ ಪ್ರಾರಂಭ
ಈ ಬಾರಿ ವೈದ್ಯಕೀಯ ಪ್ರವೇಶಕ್ಕೆ ಕರ್ನಾಟಕೇತರ ವಿದ್ಯಾರ್ಥಿಗಳಿಗೆ ಕೌನ್ಸೆಲಿಂಗ್‌ ಇಲ್ಲ

ಪ್ರಸಕ್ತ ಸಾಲಿನ ವೃತ್ತಿ ಶಿಕ್ಷಣ ಕೋರ್ಸ್‌ಗಳ ಪ್ರವೇಶಕ್ಕೆ ಸಂಬಂಧಿಸಿದ ಸಿಇಟಿ ಕೌನ್ಸೆಲಿಂಗ್‌ ಸೆ.10ರಿಂದ ನಡೆಯಲಿದೆ.

ಇಂಜಿನಿಯರಿಂಗ್‌, ವೈದ್ಯಕೀಯ ಹಾಗೂ ದಂತ ವೈದ್ಯಕೀಯ ಕೋರ್ಸ್‌ಗಳ ಕೌನ್ಸೆಲಿಂಗ್‌ನ್ನು ಸೆ.10ರಿಂದ ಪ್ರಾರಂಭಿಸಲು ಸಾಮಾನ್ಯ ಪ್ರವೇಶ ಪರೀಕಾ ಘಟಕ ಸೆ.7ರಂದು ಅಧಿಸೂಚನೆ ಹೊರಡಿಸಿತು. ಈ ಬಾರಿ ವೈದ್ಯಕೀಯ ಕೋರ್ಸುಗಳಿಗೆ ಕರ್ನಾಟಕೇತರ ಕೋಟಾಕ್ಕೆ ಕೌನ್ಸೆಲಿಂಗ್‌ ನಡೆಯುವುದಿಲ್ಲ . ಆದರೆ ಇಂಜಿನಿಯರಿಂಗ್‌ ಪ್ರವೇಶಕ್ಕೆ ಸಂಬಂಧಿಸಿದಂತೆ ಶೇ.10 ಸೀಟುಗಳಿಗೆ ಕರ್ನಾಟಕೇತರ ಕೋಟಾದ ಕೌನ್ಸೆಲಿಂಗ್‌ ನಡೆಯಲಿದೆ ಎಂದು ಪ್ರಕಟಣೆ ತಿಳಿಸಿದೆ.

ಸೀಟು ಹಂಚಿಕೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರ ಹಾಗೂ ಕಾಮೆಡ್‌-ಕೆ ನಡುವಣ ತಿಕ್ಕಾಟದಿಂದಾಗಿ ಸಿಇಟಿ ಕೌನ್ಸೆಲಿಂಗ್‌ ಪದೇಪದೇ ಸ್ಥಗಿತಗೊಂಡಿತ್ತು . ಪ್ರಸ್ತುತ ಉಭಯ ಬಣಗಳು ಒಪ್ಪಂದಕ್ಕೆ ಬಂದಿರುವುದರಿಂದ ಸಮಸ್ಯೆ ಬಗೆಹರಿದಿದ್ದು , ಕೌನ್ಸೆಲಿಂಗ್‌ ದಾರಿ ಸುಗಮವಾಗಿದೆ.

ಸಿಇಟಿ ಬಿಕ್ಕಟ್ಟಿನಿಂದಾಗಿ ವಿದ್ಯಾರ್ಥಿಗಳಿಗೆ ಶೈಕ್ಷಣಿಕ ವರ್ಷದ ಸಾಕಷ್ಟು ಸಮಯ ಈಗಾಗಲೇ ನಷ್ಟವಾಗಿದೆ. ಈ ನಷ್ಟವನ್ನು ತುಂಬಿಕೊಡುವ ಉದ್ದೇಶದಿಂದ ಭಾನುವಾರವೂ ಇಂಜಿನಿಯರಿಂಗ್‌ ತರಗತಿಗಳನ್ನು ನಡೆಸುವ ಕುರಿತು ಚಿಂತನೆ ನಡೆಯುತ್ತಿದೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು