ಶತಮಾನದ ದಾಳಿಗಾರ ಮೂತ್ತೆರಡರ ಮುರಳಿಗೆ 500ರ ಸಂಭ್ರಮ

ಶತಮಾನದ ದಾಳಿಗಾರ ಮೂತ್ತೆರಡರ ಮುರಳಿಗೆ 500ರ ಸಂಭ್ರಮ
ಪಂದ್ಯ ಸೋತರೂ-ಗೆದ್ದರೂ ಹಸನ್ಮುಖಿಯಾಗಿರುವ ಮುರಳೀಧರನ್‌ಗೀಗ 500ರ ಮುಗುಳ್ನಗೆ

ಕ್ರಿಕೆಟ್‌ ಕಂಡ ಶ್ರೇಷ್ಠ ಬೌಲರ್‌ಎಂಬ ವಿಸ್ಡನ್‌ ಗೌರವಕ್ಕೆ ಪಾತ್ರರಾದ ಶ್ರಿಲಂಕಾ ಸ್ಪಿನ್‌ ಮಾಂತ್ರಿಕ ಮುತ್ತಯ್ಯ ಮುರಳೀಧರನ್‌ ಟೆಸ್ಟ್‌ ಕ್ರಿಕೆಟ್‌ನಲ್ಲಿ 500 ವಿಕೆಟ್‌ ಪಡೆದ ಸಾಧನೆ ಮಾಡಿದ್ದಾರೆ. ಆಸ್ಟ್ಟ್ರೇಲಿಯಾ ವಿರುದ್ಧದ ಎರಡನೇ ಟೆಸ್ಟ್‌ನಲ್ಲಿ ಮಾ.16ರ ಮಂಗಳವಾರ ಕ್ಯಾಸ್ಪರೋವಿಚ್‌ ವಿಕೆಟ್‌ ಪಡೆಯುವ ಮೂಲಕ ಈ ಸಾಧನೆ ಮಾಡಿದ ವಿಶ್ವದ ಎಳೆಯ ಬೌಲರ್‌ ಎಂಬ ಗೌರವಕ್ಕೆ ಪಾತ್ರರಾದರು.

ಕಳೆದ ಟೆಸ್ಟಿನಲ್ಲಷ್ಟೇ ಆಸ್ಟ್ರೇಲಿಯಾದ ಲೆಗ್‌ ಸ್ಪಿನ್ನರ್‌ ಶೇನ್‌ವಾರ್ನೆ 500 ವಿಕೆಟ್‌ ಪೂರೈಸಿದ್ದರು. ಆಫ್‌ ಸ್ಪಿನ್ನರ್‌ ಮುರಳಿ ಈ ಸಾಧನೆ ಮಾಡಿದ ವಿಶ್ವದ ಮೂರನೇ ಬೌಲರ್‌ ಆಗಿದ್ದಾರೆ.

ಈ ತನಕ ಮೂವರು ಬೌಲರ್‌ 500ರ ಸಾಧನೆ ಮಾಡಿದಂತಾಗಿದೆ. ವಿಶ್ವದಲ್ಲೇ ಅತಿ ಹೆಚ್ಚಿನ ವಿಕೆಟ್‌ (519) ಪಡೆದಿರುವ ವೆಸ್ಟ್‌ಇಂಡೀಸ್‌ನ ಕೋರ್ಟ್ನಿ ವಾಲ್ಷ್‌, ವಾರ್ನ್‌ ಹಾಗೂ ಮುರಳಿ ಈವರೆಗೆ 500ರ ಮ್ಯಾಜಿಕ್‌ ಫಿಗರ್‌ ಮುಟ್ಟಿದ್ದಾರೆ. ಸದ್ಯ ವಾರ್ನ್‌ ಮತ್ತು ಮುರಳಿ ಕಣದಲ್ಲಿರುವ ಆಟಗಾರರು.

ಈ ಟೆಸ್ಟ್‌ ಆರಂಭವಾಗುವ ಮುನ್ನ ಮುರಳಿ 496 ವಿಕೆಟ್‌ಪಡೆದಿದ್ದರು. ಇದು ಶ್ರಿಲಂಕಾ ತಂಡದ ತಮಿಳು ಮೂಲದ ಆಟಗಾರನ 87ನೇ ಟೆಸ್ಟ್‌. ಅವರು ಆಸ್ಟ್ರೇಲಿಯಾದ ಮೊದಲ ಇನ್ನಿಂಗ್ಸ್‌ನಲ್ಲಿ 48 ರನ್ನಿಗೆ 4 ವಿಕೆಟ್‌ ಕಬಳಿಸಿದ್ದಾರೆ. ಆಸ್ಟ್ರೇಲಿಯಾ 120 ರನ್ನಿಗೆ ತನ್ನೆಲ್ಲಾ ವಿಕೆಟ್‌ ಕಳೆದುಕೊಂಡಿತು.

(ಪಿಟಿಐ)

ಮುಖಪುಟ / ವಾರ್ತೆಗಳು