ಬೆಂಗಳೂರಿನಲ್ಲಿ ಸೋದರಿಯರ ಮೇಲೆ ಸಾಮೂಹಿಕ ಅತ್ಯಾಚಾರ

ಬೆಂಗಳೂರಿನಲ್ಲಿ ಸೋದರಿಯರ ಮೇಲೆ ಸಾಮೂಹಿಕ ಅತ್ಯಾಚಾರ
ಸಿನಿಮಾ ಮಂದಿರದಲ್ಲಿ ಅತ್ಯಾಚಾರ, ಮೂವರ ಬಂಧನ

ಅಂತರರಾಷ್ಟ್ರೀಯ ಮಹಿಳಾ ದಿನದ ಸಂದರ್ಭದಲ್ಲಿಯೇ ಇಬ್ಬರು ಸೋದರಿಯರ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆದ ಘಟನೆ ರಾಜಧಾನಿ ಬೆಂಗಳೂರಿನಲ್ಲಿ ವರದಿಯಾಗಿದೆ.

ಸಿನಿಮಾ ನೋಡಲು ಹೋಗಿದ್ದ 18 ಮತ್ತು 20ರ ವಯಸ್ಸಿನ ಸೋದರಿಯರನ್ನು ಸಿನಿಮಾ ಮಂದಿರದಲ್ಲೇ ಅತ್ಯಾಚಾರ ಮಾಡಲಾಗಿದೆ. ಭುವನೇಶ್ವರಿ ನಗರದ ಈ ಸೋದರಿಯರು ಶನಿವಾರ (ಮಾ.6) ರಾತ್ರಿ ಶ್ರೀನಿವಾಸ ಚಿತ್ರಮಂದಿರದಲ್ಲಿ ಅಂಜಿ ತೆಲುಗು ಚಿತ್ರ ವೀಕ್ಷಿಸಲು ತೆರಳಿದ್ದರು. ಅವರ ಜೊತೆಯಲ್ಲಿ ಸೋದರ ಸಂಬಂಧಿಯಾಬ್ಬ ಕೂಡ ಸಿನಿಮಾ ನೋಡಲು ಹೋಗಿದ್ದ ಎನ್ನಲಾಗಿದೆ. ಯುವತಿಯರ ಹಿಂದೆ ಕೂತಿದ್ದ ಗುಂಪೊಂದು ಜಗಳಕ್ಕೆ ತೊಡಗಿದ್ದು , ಈ ಜಗಳ ಅತ್ಯಾಚಾರದಲ್ಲಿ ಪರ್ಯವಸಾನಗೊಂಡಿದೆ. ಯುವತಿಯರಿಬ್ಬರೂ ಟಾಯ್ಲೆಟ್‌ಗೆ ಹೋದಾಗ, ಶೌಚಾಲಯಕ್ಕೆ ನುಗ್ಗಿರುವ ಐವರು ಯುವತಿಯರ ಮೇಲೆ ಅತ್ಯಾಚಾರ ನಡೆಸಿದ್ದಾರೆ.

ಯುವತಿಯರು ನೀಡಿದ ದೂರಿನ ಹಿನ್ನೆಲೆಯಲ್ಲಿ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ. ಉಳಿದಿಬ್ಬರು ಇನ್ನೂ ಪತ್ತೆಯಾಗಿಲ್ಲ . ಗೌಡನಪಾಳ್ಯದ ರಾಬರ್ಟ್‌, ಅಶ್ವತ್ಥ ಹಾಗೂ ಕುಮಾರ್‌ ಎನ್ನುವವರು ಬಂಧಿತರು. ಮಹದೇವ ಹಾಗೂ ದೇವ ಎನ್ನುವವರು ತಲೆ ಮರೆಸಿಕೊಂಡಿದ್ದಾರೆ.

ಅತ್ಯಾಚಾರಕ್ಕೆ ಒಳಗಾದ ಯುವತಿಯರು ಹಾಗೂ ಐವರು ಆರೋಪಿಗಳು ಕಟ್ಟಡ ನಿರ್ಮಾಣದ ಕಾರ್ಮಿಕರಾಗಿದ್ದಾರೆ. ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು