ಏ.20- 26 ರಂದು ರಾಜ್ಯದಲ್ಲಿ ಚುನಾವಣೆ, ಮೇ13 ಮತಎಣಿಕೆ

ಏ.20- 26 ರಂದು ರಾಜ್ಯದಲ್ಲಿ ಚುನಾವಣೆ, ಮೇ13 ಮತಎಣಿಕೆ
ಮಾರ್ಚ್‌ 24ರಂದು ಚುನಾವಣಾ ಅಧಿಸೂಚನೆ

ಲೋಕಸಭಾ ಹಾಗೂ ವಿಧಾನಸಭೆ ಚುನಾವಣಾ ದಿನಾಂಕಗಳನ್ನು ಕೇಂದ್ರ ಚುನಾವಣಾ ಆಯೋಗ ಪ್ರಕಟಿಸಿದ್ದು , ರಾಜ್ಯದಲ್ಲಿ ಚುನಾವಣೆಗಳು 2 ಹಂತಗಳಲ್ಲಿ ನಡೆಯಲಿವೆ. ಪ್ರತ್ಯೇಕ ವೇಳಾಪಟ್ಟಿಗಳನ್ನು ಚುನಾವಣಾ ಆಯೋಗ ಫೆ.29ರ ಭಾನುವಾರ ಪ್ರಕಟಿಸಿದೆ.ಏಪ್ರಿಲ್‌ 20 ಮತ್ತು 26ರಂದು ಎರಡು ಹಂತಗಳಲ್ಲಿ ರಾಜ್ಯದಲ್ಲಿ ಚುನಾವಣೆ ನಡೆಯಲಿದೆ. ಏಪ್ರಿಲ್‌ 20ರ ಚುನಾವಣೆಗೆ ಸಂಬಂಧಿಸಿದಂತೆ- ಮಾರ್ಚ್‌ 24 ರಂದು ಅಧಿಸೂಚನೆ ಹೊರಡಿಸಲಾಗುವುದು. ಮಾರ್ಚ್‌ 31 ನಾಮಪತ್ರ ಸಲ್ಲಿಸಲು ಕೊನೆ ದಿನ. ನಾಮಪತ್ರ ಹಿಂತೆಗೆದುಕೊಳ್ಳಲು ಏಪ್ರಿಲ್‌ 5 ಕೊನೆದಿನವಾಗಿದ್ದು , ಏಪ್ರಿಲ್‌ 20ರಂದು ಮತದಾನ ನಡೆಯಲಿದೆ.

ಎರಡನೇ ಹಂತದ ಏಪ್ರಿಲ್‌ 26ರ ಚುನಾವಣೆಗೆ ಮಾರ್ಚ್‌ 31 ರಂದು ಅಧಿಸೂಚನೆ ಹೊರಡಿಸಲಾಗುವುದು. ನಾಮಪತ್ರ ಸಲ್ಲಿಸಲು ಏಪ್ರಿಲ್‌ 7 ಕೊನೆದಿನ. ವಾಪಸ್ಸು ಪಡೆಯಲು ಏಪ್ರಿಲ್‌ 10 ಕೊನೆದಿನ. ಏಪ್ರಿಲ್‌ 26ರಂದು ಮತದಾನ ನಡೆಯಲಿದೆ.

ಏಪ್ರಿಲ್‌ 20ರಂದು ಚುನಾವಣೆ ನಡೆಯುವ ಕ್ಷೇತ್ರಗಳು : ಬೀದರ್‌, ಕಲ್ಬುರ್ಗಿ, ರಾಯಚೂರು, ಕೊಪ್ಪಳ, ಬಳ್ಳಾರಿ, ದಾವಣಗೆರೆ, ಚಿತ್ರದುರ್ಗ, ತುಮಕೂರು, ಚಿಕ್ಕಬಳ್ಳಾಪುರ, ಕೋಲಾರ, ಕನಕಪುರ, ಬೆಂಗಳೂರು ಉತ್ತರ, ಬೆಂಗಳೂರು ದಕ್ಷಿಣ, ಬಾಗಲಕೋಟೆ ಹಾಗೂ ಬಿಜಾಪುರ.

ಏಪ್ರಿಲ್‌ 26 ರಂದು ಚುನಾವಣೆ ನಡೆಯುವ ಕ್ಷೇತ್ರಗಳು : ಮಂಡ್ಯ, ಚಾಮರಾಜನಗರ, ಮೈಸೂರು, ಮಂಗಳೂರು, ಉಡುಪಿ, ಹಾಸನ, ಚಿಕ್ಕಮಗಳೂರು, ಶಿವಮೊಗ್ಗ, ಕೆನರಾ, ಧಾರವಾಡ ಉತ್ತರ, ಧಾರವಾಡ ದಕ್ಷಿಣ, ಬೆಳಗಾವಿ ಹಾಗೂ ಚಿಕ್ಕೋಡಿ.

ಏಪ್ರಿಲ್‌ 20 ರಂದು 120 ವಿಧಾನಸಭೆ ಕ್ಷೇತ್ರಗಳಿಗೆ ಹಾಗೂ ಏಪ್ರಿಲ್‌ 26ರಂದು 104 ವಿಧಾನಸಭೆ ಕ್ಷೇತ್ರಗಳಿಗೆ ಚುನಾವಣೆ ನಡೆಯಲಿದೆ. ಮೇ 13ರಂದು ಮತ ಎಣಿಕೆ ನಡೆಯಲಿದೆ.

(ಇನ್ಫೋ ವಾರ್ತೆ)

ಮುಖಪುಟ / ವಾರ್ತೆಗಳು