ಆ ಪಕ್ಷ ಈ ಪಕ್ಷ ಎನಲಾರೆ, ಎಲ್ಲರೂ ಎನಗೆ ಒಂದೇ ಎಂದ ಕಪಿಲ್‌

ಆ ಪಕ್ಷ ಈ ಪಕ್ಷ ಎನಲಾರೆ, ಎಲ್ಲರೂ ಎನಗೆ ಒಂದೇ ಎಂದ ಕಪಿಲ್‌
ಒಳ್ಳೆಯ ಜನರ ಗುಂಪಿಗೆ ಮಾಜಿ ಕ್ರಿಕೆಟ್‌ ತಾರೆ ಕಪಿಲ್‌ದೇವ್‌ ಬೆಂಬಲ

ಕ್ರಿಕೆಟಿಗರು ಹಾಗೂ ಸಿನಿಮಾ ಕಲಾವಿದರು ವಿವಿಧ ರಾಜಕೀಯ ಪಕ್ಷಗಳ ಚುಂಗು ಹಿಡಿದು ಓಡಾಡುತ್ತಿರುವ ಸಂದರ್ಭದಲ್ಲಿ , ತಾವು ಯಾವುದೇ ರಾಜಕೀಯ ಪಕ್ಷದ ಪರವಾಗಿ ಮುಂಬರುವ ಲೋಕಸಭಾ ಚುನಾವಣೆಗಳಲ್ಲಿ ಪ್ರಚಾರ ಮಾಡುವುದಿಲ್ಲ ಎಂದು ಖ್ಯಾತ ಕ್ರಿಕೆಟ್‌ ತಾರೆ ಹಾಗೂ ಭಾರತ ಕ್ರಿಕೆಟ್‌ ತಂಡದ ಮಾಜಿ ನಾಯಕ ಕಪಿಲ್‌ದೇವ್‌ ಸ್ಪಷ್ಟಪಡಿಸಿದ್ದಾರೆ.

ಇಲ್ಲ , ನಾನು ಯಾವುದೇ ಪಕ್ಷಕ್ಕೆ ಸೇರಿಲ್ಲ . ಯಾವುದೇ ಪಕ್ಷವನ್ನು ಚುನಾವಣೆಯಲ್ಲಿ ಬೆಂಬಲಿಸುವುದೂ ಇಲ್ಲ ಎಂದು ಶುಕ್ರವಾರ ಬೆಂಗಳೂರಿನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಕಪಿಲ್‌ದೇವ್‌ ಹೇಳಿದರು.

ನನಗೆ ಯಾವ ಪಕ್ಷದ ಕುರಿತೂ ಪಕ್ಷಪಾತವಿಲ್ಲ . ಲೋಕಸಭೆಗೆ ಒಳ್ಳೆಯ ಜನ ಪ್ರವೇಶಿಸಬೇಕು ಎನ್ನುವುದಷ್ಟೇ ತಮ್ಮ ಬಯಕೆ. ಪಕ್ಷ ಮುಖ್ಯವಲ್ಲ ; ಜನರು ಮುಖ್ಯ ಎಂದು ಕಪಿಲ್‌ ಹೇಳಿದರು. ಒಂದುವೇಳೆ ಗೆಳೆಯರು ಚುನಾವಣೆಯಲ್ಲಿ ಸ್ಪರ್ಧಿಸಿದರೆ ಅವರ ಪರ ಪ್ರಚಾರ ಮಾಡುವುದಿಲ್ಲವೇ ಎನ್ನುವ ಸುದ್ದಿಗಾರರ ಪ್ರಶ್ನೆಗೆ ಕಪಿಲ್‌ ಬಳಿ ಉತ್ತರವಿರಲಿಲ್ಲ .

ನನ್ನ ಪಾಲಿಗೆ ಎಲ್ಲರೂ ಒಂದೇ. ಯಾವುದಾದರೂ ಒಂದು ನಿಖರ ಪಕ್ಷವನ್ನು ಬೆಂಬಲಿಸುವುದು ಸರಿಯೆನ್ನಿಸುತ್ತಿಲ್ಲ . ಆದರೆ, ಒಳ್ಳೆಯ ಜನರ ಒಂದು ಗುಂಪನ್ನು ಬೆಂಬಲಿಸಲಿಕ್ಕೆ ಅಡ್ಡಿಯಿಲ್ಲವೆನ್ನಿಸುತ್ತದೆ ಎಂದು ಕಪಿಲ್‌ ಮಾತುಗಳನ್ನು ತೂಕ ಮಾಡುತ್ತಾ ಹೇಳಿದರು.

ದೇಶ ಸರಿಯಾದ ದಿಕ್ಕಿನಲ್ಲಿ ಸಾಗುತ್ತಿದೆ. ಈ ಕುರಿತು ತಮಗೆ ತೃಪ್ತಿಯಿದೆ ಎಂದು ಕಪಿಲ್‌ ಹೇಳಿದರು. ಕಳೆದ ಐದು ವರ್ಷಗಳಲ್ಲಿ ಬಿಜೆಪಿ ನೇತೃತ್ವದ ರಾಷ್ಟ್ರೀಯ ಪ್ರಜಾ ಸತ್ತಾತ್ಮಕ ಒಕ್ಕೂಟದ ಕಾರ್ಯವೈಖರಿಯ ಕುರಿತು ಪ್ರತಿಕ್ರಿಯಿಸಲು ನಿರಾಕರಿಸಿದ ಕಪಿಲ್‌- ಈ ಕುರಿತು ಸ್ಪಷ್ಟವಾಗಿ ಏನನ್ನೂ ಹೇಳಲಾರೆ. ಆದರೆ ಸರ್ಕಾರವನ್ನು ಗೌರವಿಸುತ್ತೇನೆ ಎಂದರು.

(ಪಿಟಿಐ)

ಮುಖಪುಟ / ವಾರ್ತೆಗಳು