ರೋಷನ್‌ಬೇಗ್‌ ಸಂಪರ್ಕವೂ ಇಲ್ಲ ಸಂಬಂಧವೂ ಇಲ್ಲ -ತೆಲಗಿ

ರೋಷನ್‌ಬೇಗ್‌ ಸಂಪರ್ಕವೂ ಇಲ್ಲ ಸಂಬಂಧವೂ ಇಲ್ಲ -ತೆಲಗಿ
ರಾಜಕೀಯ ಕಾರಣಗಳಿಗಾಗಿ ಬೇಗ್‌-ಭುಜಬಲ್‌ ಮೇಲೆ ಆರೋಪ...

ಬೆಂಗಳೂರು : ಬಹುಕೋಟಿ ಛಾಪ ಪಾಪ ಹಗರಣದ ಪ್ರಮುಖ ಆರೋಪಿ ಅಬ್ದುಲ್‌ ಕರೀಂಲಾಲ ತೆಲಗಿ, ಕರ್ನಾಟಕದ ಮಾಜಿ ಸಚಿವ ರೋಷನ್‌ ಬೇಗ್‌ ಅವರೊಂದಿಗೆ ತನಗೆ ಯಾವುದೇ ಸಂಪರ್ಕ ಇರಲಿಲ್ಲ ಎಂದು ಹೇಳಿದ್ದಾನೆ.

ಮಾಜಿ ಸಚಿವ ರೋಷನ್‌ಬೇಗ್‌ ಹಾಗೂ ಮಹಾರಾಷ್ಟ್ರದ ಮಾಜಿ ಉಪ ಮುಖ್ಯಮಂತ್ರಿ ಛಗನ್‌ ಭುಜಬಲ್‌ ಅವರೊಂದಿಗೆ ತಾನು ಯಾವುದೇ ರೀತಿಯ ಸಂಪರ್ಕ ಹಾಗೂ ಸಂಬಂಧ ಹೊಂದಿರಲಿಲ್ಲ ಎಂದು ಕರೀಂಲಾಲ ತೆಲಗಿ ತಿಳಿಸಿದ್ದಾನೆ. ಕರೀಂಲಾಲನ ಈ ಸ್ಪಷ್ಟನೆಯನ್ನು ಶನಿವಾರ (ಜ.17) ಸುದ್ದಿಗಾರರೊಂದಿಗೆ ಮಾತನಾಡಿದ ಆತನ ವಕೀಲ ಎಂ.ಟಿ.ನಾಣಯ್ಯ ತಿಳಿಸಿದರು.

ಭುಜಬಲ್‌ ಮತ್ತು ರೋಷನ್‌ಬೇಗ್‌ ಜೊತೆಯಲ್ಲಿ ನನಗೆ ಸಂಬಂಧವಿರಲಿಲ್ಲ . ಇವರೊಂದಿಗೆ ವ್ಯಾಪಾರ ಸಂಬಂಧವನ್ನೂ ಹೊಂದಿರಲಿಲ್ಲ . ಆದರೆ ರಾಜಕೀಯ ಕಾರಣಗಳಿಗಾಗಿ ಬೇಗ್‌-ಭುಜಬಲ್‌ ಮೇಲೆ ಆಪಾದನೆ ಹೊರಿಸಲಾಗುತ್ತಿದೆ ಎಂದು ತೆಲಗಿ ಹೇಳಿರುವುದಾಗಿ ನಾಣಯ್ಯ ಹೇಳಿದರು. ಈ ಇಬ್ಬರೂ ನಾಯಕರು ಛಾಪ ಪಾಪದ ಹಗರಣದಲ್ಲಿ ತೆಲಗಿಯಾಂದಿಗೆ ಸಂಬಂಧ ಹೊಂದಿದ್ದಾರೆ ಎನ್ನುವ ಪ್ರತಿಪಕ್ಷಗಳ ಒತ್ತಾಯದ ಹಿನ್ನೆಲೆಯಲ್ಲಿ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದಾರೆ.

ತೆಲಗಿ ವಿಚಾರಣೆ : ಮಹಾರಾಷ್ಟ್ರದ ವಿಶೇಷ ತನಿಖಾ ದಳ (ಸಿಟ್‌) ಕರೀಂಲಾಲ ತೆಲಗಿಯನ್ನು ವಿಚಾರಣೆ ನಡೆಸುವುದಕ್ಕಾಗಿ ಶನಿವಾರ ಪರಪ್ಪನ ಅಗ್ರಹಾರದಲ್ಲಿನ ಕೇಂದ್ರ ಕಾರಾಗೃಹಕ್ಕೆ ಭೇಟಿ ನೀಡಿತು. ವಿಚಾರಣೆಯ ವಿವರಗಳು ತಿಳಿದುಬಂದಿಲ್ಲ .

(ಪಿಟಿಐ)

ಮುಖಪುಟ / ವಾರ್ತೆಗಳು