34 ಪೋಲಿಯಾ ಪ್ರಕರಣ ಪತ್ತೆ ; ಜ.4ರಿಂದ ಪಲ್ಸ್‌ ಪೋಲಿಯಾ !

34 ಪೋಲಿಯಾ ಪ್ರಕರಣ ಪತ್ತೆ ; ಜ.4ರಿಂದ ಪಲ್ಸ್‌ ಪೋಲಿಯಾ !
2005ರ ಅಂತ್ಯದೊಳಗೆ ಪೋಲಿಯಾ ನಿರ್ಮೂಲಗೊಳಿಸಲು ರಾಜ್ಯ ಸರ್ಕಾರದ ಸಂಕಲ್ಪ

ರಾಜ್ಯದ ಕೆಲವು ಪ್ರದೇಶಗಳಲ್ಲಿ ಮರುಕಳಿಸಿರುವ ಪೊಲೀಯೋ ರೋಗವನ್ನು ಬುಡಸಮೇತ ನಿರ್ಮೂಲಗೊಳಿಸಲು ನಿರ್ಧರಿಸಿರುವ ರಾಜ್ಯ ಸರ್ಕಾರ, ಮಹತ್ವಾಕಾಂಕ್ಷೆಯ ಪಲ್ಸ್‌ ಪೋಲಿಯಾ ಆಂದೋಲನವನ್ನು ಜನವರಿ 4ರಿಂದ ಮತ್ತೆ ಪ್ರಾರಂಭಿಸುತ್ತಿದೆ.

ಐದು ಸುತ್ತುಗಳ ಪಲ್ಸ್‌ ಪೋಲಿಯಾ ಕಾರ್ಯಕ್ರಮ ಜ.4ರ ಭಾನುವಾರದಿಂದ ಪ್ರಾರಂಭವಾಗುತ್ತಿದ್ದು , ಸುಮಾರು 1.3 ಲಕ್ಷ ಮಂದಿ ಈ ಆಂದೋಲನದಲ್ಲಿ ಭಾಗವಹಿಸುವರು ಎಂದು ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಕಾಗೋಡು ತಿಮ್ಮಪ್ಪ ಶುಕ್ರವಾರ ಸುದ್ದಿಗಾರರಿಗೆ ತಿಳಿಸಿದರು.

ಜನವರಿ 4 ರಂದು ಪ್ರಥಮ ಸುತ್ತು , ಉಳಿದಂತೆ- ಫೆಬ್ರವರಿ 22 ರಂದು ಹಾಗೂ ಏಪ್ರಿಲ್‌, ಅಕ್ಟೋಬರ್‌, ನವಂಬರ್‌ ತಿಂಗಳ ನಿಗದಿತ ದಿನಾಂಕಗಳಂದು ಪಲ್ಸ್‌ ಪೋಲಿಯಾ ಆಂದೋಲನ ನಡೆಯಲಿದೆ. ಈ ಆಂದೋಲನದಲ್ಲಿ 5 ವರ್ಷದೊಳಗಿನ ಎಲ್ಲಾ ಮಕ್ಕಳಿಗೂ ಪೋಲಿಯಾ ಲಸಿಕೆ ಹಾಕಲಾಗುವುದು ಎಂದು ಸಚಿವ ತಿಮ್ಮಪ್ಪ ಹೇಳಿದರು.

2002-2003ರಲ್ಲಿಯೇ ಪೋಲಿಯಾ ಮುಕ್ತ ಕರ್ನಾಟಕ ಎಂದು ರಾಜ್ಯ ಸರ್ಕಾರ ಘೋಷಿಸಿತ್ತು . ಆದರೆ 2003ನೇ ಇಸವಿಯಲ್ಲಿ ಕನಿಷ್ಠ 34 ಪೋಲಿಯಾ ಪ್ರಕರಣಗಳು ಬಳ್ಳಾರಿ, ಬಾಗಲಕೋಟೆ, ಚಿತ್ರದುರ್ಗ, ರಾಯಚೂರು, ಗುಲ್ಬರ್ಗಾ ಮತ್ತು ಕೊಪ್ಪಳಗಳಲ್ಲಿ ಪತ್ತೆಯಾಗಿವೆ. ಮೊದಲ ಪೋಲಿಯಾ ಪ್ರಕರಣ ಬಳ್ಳಾರಿಯಲ್ಲಿ ವರದಿಯಾಗಿದ್ದು , ವೈರಸ್‌ ತಗುಲಿದ ಮಗುವಿನ ಕುಟುಂಬ ಮೀರತ್‌ನಿಂದ ಬಳ್ಳಾರಿಗೆ ವಲಸೆ ಬಂದಿತ್ತು ಎಂದು ತಿಮ್ಮಪ್ಪ ತಿಳಿಸಿದರು.

2005 ಡಿಸೆಂಬರ್‌ ಅಂತ್ಯದೊಳಗೆ ರಾಜ್ಯವನ್ನು ಪೋಲಿಯಾ ಮುಕ್ತಗೊಳಿಸುವ ಗುರಿಯನ್ನು ರಾಜ್ಯ ಸರ್ಕಾರ ಹೊಂದಿರುವುದಾಗಿ ಸಚಿವ ಕಾಗೋಡು ತಿಮ್ಮಪ್ಪ ಹೇಳಿದರು.

(ಪಿಟಿಐ)

ಮುಖಪುಟ / ವಾರ್ತೆಗಳು