ಬೆಂಗಳೂರಲ್ಲಿ ಸ್ವಿಟ್ಜರ್ಲ್ಯಾಂಡ್ ಆಹಾರ ಮೇಳ-2003
ಬೆಂಗಳೂರು : ಇದು ಊಟದ ಸಮಯ. ದಿನೇದಿನೇ ಗಾಢವಾಗುತ್ತಿರುವ ಚಳಿಯ ಹವೆ ರುಚಿಪ್ರಿಯರಿಗೆ ಹೇಳಿ ಮಾಡಿಸಿದಂತಿದೆ. ಇದಕ್ಕೆ ತಕ್ಕಹಾಗೆ, ಸ್ವಿಟ್ಜರ್ಲ್ಯಾಂಡ್ ಆಹಾರ ಮೇಳ ಬೆಂಗಳೂರಿನಲ್ಲಿ ಪ್ರಾರಂಭವಾಗಿದೆ.
ಡಿ.4 ರ ಬುಧವಾರದಿಂದ ಪ್ರಾರಂಭವಾಗಿರುವ ಸ್ವಿಸ್ ಆಹಾರ ಮೇಳ-2003, 10 ದಿನಗಳ ಕಾಲ ನಗರದ ವೆಸ್ಟ್ ಎಂಡ್ ಹೊಟೇಲ್ನಲ್ಲಿ ನಡೆಯಲಿದೆ. ಸ್ವಿಸ್ ಶೈಲಿಯ ರುಚಿರುಚಿ ಖಾದ್ಯ, ಅತ್ಯುತ್ತಮ ವೈನ್ ಹಾಗೂ ಸ್ವಾದಿಷ್ಟ ಚಾಕಲೇಟ್ಗಳ ಮಹಾಪೂರವೇ ಇಲ್ಲಿದೆ ಎಂದು ವೆಸ್ಟ್ ಎಂಡ್ನ ಪ್ರಧನ ವ್ಯವಸ್ಥಾಪಕ ಪೆಪ್ ಕುಮಾರ್ ಹಾಗೂ ಸ್ವಿಸ್ ರಾಯಭಾರಿ ಇಲಾಖೆಯ ಅಧಿಕಾರಿ ಜೋಸೆಫ್ ಕೋಚ್ ತಿಳಿಸಿದ್ದಾರೆ.
ಹೊಟ್ಟೆ ತುಂಬಿಸುವುದಷ್ಟೇ ಆಹಾರ ಮೇಳದ ಉದ್ದೇಶವಲ್ಲ. ಮನಸ್ಸಿಗೆ ಉಲ್ಲಾಸ ನೀಡುವ ಸಂಗೀತವೂ ಮೇಳದಲ್ಲಿದೆ. ರಾತ್ರಿ ಊಟದ ವೇಳೆ- ವಾಟರ್ ಟವರ್ ಬ್ಯಾಂಡ್ ಸುಶ್ರಾವ್ಯ ಸಂಗೀತದ ಕಾರ್ಯಕ್ರಮ ನೀಡಲಿದೆ. ಈ ಸಂಗೀತ ಕಾರ್ಯಕ್ರಮ ನೀಡಲಿಕ್ಕಾಗಿಯೇ ಸ್ವಿಟ್ಜರ್ಲ್ಯಾಂಡ್ನಿಂದ ಪ್ರಸಿದ್ಧ ಸಂಗೀತಗಾರ ಸ್ಟೀಫನ್ ವಾಲ್ನರ್ ತಂಡ ಬೆಂಗಳೂರಿಗೆ ಆಗಮಿಸಿದೆ.
(ಇನ್ಫೋ ವಾರ್ತೆ)
ಮುಖಪುಟ / ಇವತ್ತು... ಈ ಹೊತ್ತು...