ಎಲ್ಲ ರಾಜ್ಯಗಳಲ್ಲೂ ವ್ಯಾಟ್‌ ಏಕರೂಪ ಅಳವಡಿಕೆ ಅಸಾಧ್ಯ

ಬೆಂಗಳೂರು: ಮೌಲ್ಯ ವರ್ಧಿತ ತೆರಿಗೆ(ವ್ಯಾಟ್‌) ನೀತಿಯನ್ನು ಎಲ್ಲ ರಾಜ್ಯಗಳಲ್ಲೂ ಏಕರೂಪವಾಗಿ ಅನುಷ್ಠಾನಕ್ಕೆ ತರುವ ಸಾಧ್ಯತೆಯನ್ನು ಕೇಂದ್ರ ಕಂದಾಯ ಕಾರ್ಯದರ್ಶಿ ಎಸ್‌.ನಾರಾಯಣ್‌ ತಳ್ಳಿಹಾಕಿದ್ದಾರೆ.

ಮೌಲ್ಯ ವರ್ಧಿತ ತೆರಿಗೆ ಬಗೆಗೆ ಸೋಮವಾರ ಬೆಂಗಳೂರಿನಲ್ಲಿ ನಡೆದ ಸಮ್ಮೇಳನದಲ್ಲಿ ಮಾತನಾಡುತ್ತಿದ್ದ ಅವರು- ವ್ಯಾಟ್‌ನ್ನು ಏಕ ಪ್ರಕಾರವಾಗಿ ಜಾರಿಗೊಳಿಸುವುದು ಸಾಧ್ಯವಿಲ್ಲ . ಪ್ರತಿಯಾಂದು ರಾಜ್ಯವೂ ತನ್ನದೇ ಆದ ಕಾನೂನನ್ನು ಹೊಂದಿದೆ ಎಂದು ಸ್ಪಷ್ಟಪಡಿಸಿದರು.

2002 ನೇ ಇಸವಿ ಏಪ್ರಿಲ್‌ 1 ರಿಂದ ಜಾರಿಗೆ ಬರುವ ವ್ಯಾಟ್‌ ಅನುಷ್ಠಾನಕ್ಕೆ 12 ರಾಜ್ಯಗಳು ಒಪ್ಪಿಕೊಂಡಿದ್ದು , 7 ರಾಜ್ಯಗಳು ವ್ಯಾಟ್‌ ಬಗೆಗಿನ ಕರಡು ಬಿಲ್‌ಗಳನ್ನು ಈಗಾಗಲೇ ಇಂಟರ್ನೆಟ್‌ಗೆ ಅಳವಡಿಸಿವೆ. ವಾಣಿಜ್ಯ ಹಾಗೂ ಕೈಗಾರಿಕೆಗೆ ವ್ಯಾಟ್‌ ವರದಾನವಾಗಿದೆ ಎಂದು ನಾರಾಯಣ್‌ ಹೇಳಿದರು. ಕರ್ನಾಟಕ, ಕೇರಳ ಹಾಗೂ ಆಂಧ್ರ ಪ್ರದೇಶಗಳ ವಾಣಿಜ್ಯ ತೆರಿಗೆ ಅಧಿಕಾರಿಗಳು ಸಮ್ಮೇಳನದಲ್ಲಿ ಭಾಗವಹಿಸಿದ್ದರು. ಭಾರತೀಯ ಕೈಗಾರಿಕಾ ಒಕ್ಕೂಟ ಸಮ್ಮೇಳನವನ್ನು ಏರ್ಪಡಿಸಿತ್ತು .

(ಪಿಟಿಐ)

ಮುಖಪುಟ / ಇವತ್ತು... ಈ ಹೊತ್ತು...