ಹೈದರಾಬಾದ್‌ನಲ್ಲಿ ರೇಪಿಸ್ಟ್‌ ನಸ್ರು ಬಳಗದ 6 ಮಂದಿ ಬಂಧನ

ಬೆಂಗಳೂರು : ಅಸಿಸ್ಟೆಂಟ್‌ ಕಮೀಷನರ್‌ ಜಿ.ಎ.ಬಾವಾ ಹಾಗೂ ಇನ್ಸ್‌ಪೆಕ್ಟರ್‌ ಸಿದ್ಧರಾಮಯ್ಯ ನೇತೃತ್ವದ ವಿಶೇಷ ಪೊಲೀಸ್‌ ಪಡೆ ಕುಖ್ಯಾತ ಅತ್ಯಾಚಾರಿ ನಸ್ರುವಿನ ತಂಡಕ್ಕೆ ಸೇರಿದ 6 ಮಂದಿಯನ್ನು ಹೈದರಾಬಾದ್‌ನಲ್ಲಿ ಬಂಧಿಸಿದೆ.

ಬಂಧಿತರಿಂದ 1.7 ಲಕ್ಷ ರುಪಾಯಿ ನಗದು ಹಾಗೂ 17.5 ಲಕ್ಷ ರುಪಾಯಿ ಮೌಲ್ಯದ ನಗಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಈ ಕುಖ್ಯಾತರು 53 ಡಕಾಯಿತಿ ಹಾಗೂ 6 ಅತ್ಯಾಚಾರ ಪ್ರಕರಣಗಳಲ್ಲಿ ಪೊಲೀಸರಿಗೆ ಬೇಕಾಗಿದ್ದರು ಎಂದು ನಗರ ಪೊಲೀಸ್‌ ಕಮೀಷನರ್‌ ಎಚ್‌.ಟಿ. ಸಾಂಗ್ಲಿಯಾನ ಸೋಮವಾರ ಸುದ್ದಿಗಾರರಿಗೆ ತಿಳಿಸಿದರು.

ಕಳೆದ ವರ್ಷ ನಸ್ರು ಪೊಲೀಸರಿಗೆ ಸೆರೆ ಸಿಕ್ಕಿದ್ದು , ಇತರ ಆರೋಪಿಗಳಾದ ಜಮೀಲ್‌, ಮುಸ್ತಫ, ಮೊಹ್ಮದ್‌ ಶಫಿ ಹಾಗೂ ಮೊಹ್ಮದ್‌ ಅಕ್ಮಲ್‌ ಪೊಲೀಸರ ಕಣ್ತಪ್ಪಿಸಿದ್ದರು. ತಲೆ ತಪ್ಪಿಸಿಕೊಂಡ ಆರೋಪಿಗಳನ್ನು ಈಗ ಬಂಧಿಸಲಾಗಿದ್ದು, ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ನಾಗರಿಕರ ಮೇಲೆ ಹಲ್ಲೆ ಹಾಗೂ ಲೈವ್‌ಬ್ಯಾಂಡ್‌ ಗಾಯಕಿಯರಿಗೆ ಆ್ಯಸಿಡ್‌ ಎರಚುವ ಮೂಲಕ ನಸ್ರು ಬಳಗ ನಗರದ ನಾಗರಿಕರಲ್ಲಿ ಭಯ ಮೂಡಿಸಿತ್ತು ಎಂದು ಸಾಂಗ್ಲಿಯಾನ ಹೇಳಿದರು. ನಸ್ರು ಬಳಗದ ಸದಸ್ಯರ ಬಂಧನದಲ್ಲಿ ಸಾಹಸ ಮೆರೆದ ಪೊಲೀಸ್‌ ಅಧಿಕಾರಿಗಳನ್ನು ಅವರು ಶ್ಲಾಘಿಸಿದರು.

ಪಾರ್ಕಿಂಗ್‌ ನಿಷೇಧ ಪ್ರತಿಭಟಿಸಿ ಮೆರವಣಿಗೆ

ಅವೆನ್ಯೂ ರಸ್ತೆಯಲ್ಲಿ ವಾಹನ ಪಾರ್ಕಿಂಗ್‌ ನಿಷೇಧಿಸಿರುವ ನಗರ ಪೊಲೀಸ್‌ ಕಮಿಷನರ್‌ ಸಾಂಗ್ಲಿಯಾನ ಅವರ ಕ್ರಮವನ್ನು ಪ್ರತಿಭಟಿಸಿ, ಅವೆನ್ಯೂ ರಸ್ತೆಯ ವರ್ತಕರು ಸೋಮವಾರ ಮಧ್ಯಾಹ್ನ ಅಂಗಡಿ ಮುಂಗಟ್ಟುಗಳನ್ನು ಮುಚ್ಚಿ ಭಾರೀ ಪ್ರತಿಭಟನಾ ಪ್ರದರ್ಶನ ನಡೆಸಿದರು. ಆನಂತರ ಪಾರ್ಕಿಂಗ್‌ಗೆ ಅವಕಾಶ ಮಾಡಿಕೊಡುವಂತೆ ಒತ್ತಾಯಿಸಿ ಪೊಲೀಸ್‌ ಕಮೀಷನರ್‌ಗೆ ಮನವಿ ಪತ್ರ ಸಲ್ಲಿಸಲಾಯಿತು.

(ಇನ್ಫೋ ವಾರ್ತೆ)

ವಾರ್ತಾ ಸಂಚಯ
ಮುಖಪುಟ / ಸಾಂಗ್ಲಿಯಾನ ವಾಚ್‌