ಅಮೆರಿಕೆ ವಿಜ್ಞಾನಿಗಳಿಂದ ಮಾನವ ಭ್ರೂಣದ ಕ್ಲೋನಿಂಗ್
ವೊರ್ಸೆಸ್ಟರ್ : ಮಾನವ ಭ್ರೂಣವನ್ನು ಪ್ರಪ್ರಥಮ ಬಾರಿಗೆ ಕ್ಲೋನ್ ಮಾಡಿದ್ದೇವೆ ಎಂದು ಅಮೆರಿಕೆ ಕಂಪನಿಯ ವಿಜ್ಞಾನಿಗಳು ಹೇಳಿಕೊಂಡಿದ್ದಾರೆ.
ಪರ್ಕಿನ್ಸನ್ ಕಾಯಿಲೆ ಸೇರಿದಂತೆ ವಯಸ್ಸಿಗೆ ಸಂಬಂಧಿಸಿದ ಬೇನೆಗಳ ನಿವಾರಣೆಗೆ ಈ ರೀತಿ ಕ್ಲೋನ್ ಮಾಡಿದ ಭ್ರೂಣಗಳು ಉಪಯೋಗಕ್ಕೆ ಬರುತ್ತವೆ ಎಂದು ಮೆಸಾಚ್ಯುಸೆಟ್ಸ್ನ ವೊರ್ಸೆಸ್ಟರ್ನಲ್ಲಿರುವ ಅಡ್ವಾನ್ಸ್ಡ್ ಸೆಲ್ ಟೆಕ್ನಾಲಜಿ ಇನ್ಕಾರ್ಪೊರೇಷನ್ ಹೇಳಿದೆ. ಕ್ಲೋನಿಂಗ್ ತಂತ್ರಜ್ಞಾನದಿಂದ ಸಿದ್ಧಪಡಿಸಿದ ಈ ಚೆಂಡಿನಾಕಾರದ ಕೋಶಗಳು ಕಾಂಡ ಕೋಶ (ಸ್ಟೆಮ್ ಸೆಲ್)ಗಳಾಗಿ ಕೆಲಸ ಮಾಡಬಲ್ಲವು. ಮಾನವ ದೇಹದ ಯಾವುದೇ ಕೋಶದಲ್ಲಿ ಇವು ಬೆಳೆಯಬಲ್ಲವು.
ಕೋಶದಾನಿಗಳಿಂದ ಕೋಶಗಳನ್ನು ಸ್ವೀಕರಿಸಿ, ಅವುಗಳ ಡಿಎನ್ಎಯನ್ನು ಮಾನವ ತತ್ತಿ ಕೋಶಗಳಿಗೆ ವರ್ಗಾಯಿಸಲಾಗುವುದು. ಅವು ಭ್ರೂಣವಾಗಿ ರೂಪುಗೊಳ್ಳುತ್ತವೆ. ಇದೇ ಕ್ಲೋನ್ಡ್ ಭ್ರೂಣ. ಒಂದೇ ಮಾತಲ್ಲಿ ಹೇಳುವುದಾದರೆ, ಮಾನವ ಕ್ಲೋನಿಂಗ್ನ ಇನ್ನೊಂದು ಮಾದರಿ. ಈಗಾಗಲೇ ಮಾನವ ಕ್ಲೋನಿಂಗ್ ಸಾಕಷ್ಟು ವಿವಾದಕ್ಕೆ ಗ್ರಾಸವಾಗಿದೆ. ಇಂಥಾದರಲ್ಲಿ ವಿಜ್ಞಾನಿಗಳ ಈ ಸೃಷ್ಟಿಕ್ರಿಯೆಗೂ ಪ್ರತಿರೋಧ ಬರುವ ನಿರೀಕ್ಷೆಯಿದೆ. ಆದರೆ, ಈ ಸುದ್ದಿಯ ಬಗ್ಗೆ ಶ್ವೇತಭವನ ಇನ್ನೂ ಪ್ರತಿಕ್ರಿಯೆ ನೀಡಿಲ್ಲ.
(ಇನ್ಫೋ ವಾರ್ತೆ)
ಮುಖಪುಟ / ಇವತ್ತು... ಈ ಹೊತ್ತು...