ಶಾಲೆಯಲ್ಲಿ ಹಾವುಗಳ ಸಂಸಾರ: ಹೆದರಿ ಹೌಹಾರಿದ ಹುಡುಗರು
ಮೈಸೂರು : ಮೈಸೂರು ಕಾಲೇಜಿನ ಬಳಿ ಚಿರತೆಯೂ, ಚರಂಡಿಯಲ್ಲಿ ಭಾರೀ ಗಾತ್ರದ ಮೊಸಳೆಯೂ ಪ್ರತ್ಯಕ್ಷವಾಗಿದ್ದು ನಿಮಗೂ ಗೊತ್ತಲ್ಲ. ಈಗ ಮೈಸೂರಿಗೆ ಸಮೀಪದ ತೊರವಳ್ಳಿ ಸರ್ಕಾರಿ ಶಾಲೆಯ ಕೊಟಡಿಯಲ್ಲಿ ನಾಗರಹಾವುಗಳು ಒಂದರ ಹಿಂದೊಂದರಂತೆ ಉದುರಿವೆ.
ಚಾಮರಾಜನಗರ ತಾಲೂಕು ಕುದೇರು ಬಳಿಯ ತೊರವಳ್ಳಿಯ ಸರ್ಕಾರಿ ಶಾಲೆಯಲ್ಲಿ ಗುರುವಾರ ಈ ಘಟನೆ ನಡೆದಿದೆ. ತರಗತಿ ನಡೆಯುತ್ತಿದ್ದಾಗ ಛಾವಣಿಯಿಂದ ಒಂದಲ್ಲ, ಎರಡಲ್ಲ, ಮೂರು ನಾಗರ ಹಾವುಗಳು ಬಿದ್ದಾಗ, ಹೆದರಿ ಹೌಹಾರಿದ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರು ಚೀರುತ್ತಾ, ಕಿರುಚುತ್ತಾ ಕ್ಲಾಸ್ ರೂಂನಿಂದ ಹೊರಗೆ ಓಡಿ ಬಂದರೆಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ.
ಪುಣ್ಯಕ್ಕೆ ಹಾವುಗಳು ಮಕ್ಕಳಿಂದ ಸ್ವಲ್ಪ ದೂರದಲ್ಲಿ ಬಿದ್ದ ಕಾರಣ, ಯಾವುದೇ ಅನಾಹುತ ಸಂಭವಿಸಿಲ್ಲ. ಆದರೆ, ಮಕ್ಕಳ ಶಾಲೆಯ ಕೊಠಡಿಯಲ್ಲಿ ಕಾಲಿಡಲೂ ಹೆದರುತ್ತಿದ್ದಾರೆ. ಪೋಷಕರಂತೂ ಮಕ್ಕಳನ್ನು ಶಾಲೆಗೆ ಕಳುಹಿಸುವುದೋ ಬೇಡವೋ ಎಂಬ ಆತಂಕಕ್ಕೆ ಒಳಗಾಗಿದ್ದಾರೆ. ಮೇಲ್ಛಾವಣಿಯಲ್ಲಿ ವಾಸ ಮಾಡುತ್ತಿದ್ದ ಈ ಹಾವುಗಳು ಜಗಳವಾಡಿಕೊಂಡು ಕೆಳಗೆ ಬಿದ್ದಿರಬಹುದು ಎಂದು ಶಂಕಿಸಲಾಗಿದೆ.
ಅಂದಹಾಗೆ ಹಾವುಗಳು ಬಂದ ಸಮಯದಲ್ಲಿ ಮೇಸ್ಟ್ರು ‘ನಾಗರಹಾವೆ ಹಾವೊಳು ಹೂವೆ, ಬಾಗಿಲ ಬಿಲದಲಿ ನಿನ್ನಯ ಠಾವೆ.... ’ ಪದ್ಯದ ಪಾಠ ಮಾಡುತ್ತಿರಲಿಲ್ಲವಂತೆ.
ಮುಖಪುಟ / ಇವತ್ತು... ಈ ಹೊತ್ತು...