ನ.29ರಿಂದ ಮಾಯಾ ಕಾಮತ್ರ ಕಾರ್ಟೂನ್ ಪ್ರದರ್ಶನ
ಬೆಂಗಳೂರು : ಎರಡು ದಶಕಗಳ ಕಾಲ ಬಿಳಿ ಹಾಳೆ ಮೇಲೆ ಮಾಯಾ ಕಾಮತ್ ಮೂಡಿಸಿದ ಕಾರ್ಟೂನ್ ಗೆರೆಗಳ ಭಿನ್ನ ಭಿನ್ನ ನಮೂನೆಗಳ ಪ್ರದರ್ಶನಕ್ಕೆ ನವೆಂಬರ್ 29ರಂದು ಚಾಲನೆ. ಪ್ರದರ್ಶನದ ಶೀರ್ಷಿಕೆ- ದಿ ವರ್ಲ್ಡ್ ಆಫ್ ಮಾಯಾ. ಸ್ಥಳ- ಅಲಯನ್ಸ್ ಫ್ರಾಂಚೈಸ್.
ಕ್ಯಾನ್ಸರ್ ರೋಗಕ್ಕೆ ತುತ್ತಾಗಿದ್ದ ಮಾಯಾ ತಮ್ಮ ಜೀವನದ ಕೊನೆ ದಿನವಾದ ಅಕ್ಟೋಬರ್ 27ರಂದೂ ಏಷಿಯನ್ ಏಜ್ ಪತ್ರಿಕೆಗೆ ಕಾರ್ಟೂನ್ ಬರೆದು ಕಳುಹಿಸಿದ್ದರು. ಅವರದು 16 ವರ್ಷಗಳ ತಪಸ್ಸು. ಡೆಕ್ಕನ್ ಹೆರಾಲ್ಡ್ ಪತ್ರಿಕೆಯಲ್ಲಿ ಕಾರ್ಟೂನಿಸ್ಟ್ ವೃತ್ತಿ ಪ್ರಾರಂಭಿಸಿದ ಮಾಯಾ ಅವರ ಗೆರೆಗಳು ಫ್ರೀ ಪ್ರೆಸ್ ಜರ್ನಲ್, ದಿ ಇಂಡಿಪೆಂಡೆಂಟ್, ನ್ಯೂಸ್ಡೇ, ಸನ್ಡೇ- ಮಿಡ್ಡೇ, ದಿ ಇಂಡಿಯನ್ ಎಕ್ಸ್ಪ್ರೆಸ್, ದಿ ಟೈಮ್ಸ್ ಆಫ್ ಇಂಡಿಯಾ, ಎಕನಾಮಿಕ್ ಟೈಮ್ಸ್, ಡೆಕ್ಕನ್ ಕ್ರಾನಿಕಲ್ ಮತ್ತು ಏಷಿಯನ್ ಏಜ್ ಪತ್ರಿಕೆಗಳಲ್ಲಿ ಮೂಡಿದವು.
ನವೆಂಬರ್ 29ರಂದು ಸಂಜೆ 6.30ಕ್ಕೆ ಮುಖ್ಯಮಂತ್ರಿ ಕೃಷ್ಣ ದಿ ವರ್ಲ್ಡ್ ಆಫ್ ಮಾಯಾ ಉದ್ಘಾಟಿಸಲಿದ್ದಾರೆ. ಏಷಿಯನ್ ಏಜ್ ಸಂಪಾದಕ ಎಂ.ಜೆ.ಅಕ್ಬರ್ ಸಮಾರಂಭದಲ್ಲಿ ಮಾತನಾಡುವರು. ನ.30 ಹಾಗೂ ಡಿಸೆಂಬರ್ 1ರಂದು ಬೆಳಗ್ಗೆ 10ರಿಂದ ರಾತ್ರಿ 8ರವರೆಗೆ ಪ್ರದರ್ಶನ ನೋಡಲು ಅವಕಾಶವಿದೆ.
(ಇನ್ಫೋ ವಾರ್ತೆ)
ಮುಖಪುಟ / ಇವತ್ತು... ಈ ಹೊತ್ತು...