ಭಯೋತ್ಸಾದನೆ ನಿಗ್ರಹ ಸುಗ್ರೀವಾಜ್ಞೆ ಅಪಾಯಕಾರಿ: ಕೃಷ್ಣ

ಬೆಂಗಳೂರು: ಸಂಘಟಿತ ಸಂಚಿನ ಅಪರಾಧ ಶಾಸನದ ಜೊತೆ ವಿವಾದಾತ್ಮಕ ಭಯೋತ್ಪಾದನೆ ನಿಗ್ರಹ ಸುಗ್ರೀವಾಜ್ಞೆಯನ್ನು ಹೋಲಿಸುವುದು ತರವಲ್ಲ ಎಂದು ರಾಜ್ಯದ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ತಿಳಿಸಿದ್ದಾರೆ. ಈ ಎರಡೂ ಕಾಯಿದೆಗಳನ್ನು ಒಂದೇ ತಕ್ಕಡಿಯಲ್ಲಿಟ್ಟು ತೂಗುವುದು ತಪ್ಪು ಎಂದೂ ಅವರು ಹೇಳಿದರು.

ಭಾನುವಾರ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ಅವರು, ಭಯೋತ್ಪಾದನೆ ನಿಗ್ರಹ ಸುಗ್ರೀವಾಜ್ಞೆ (ಪ್ರಿವೆನ್‌ಷನ್‌ ಆಫ್‌ ಟೆರರಿಸಮ್‌ ಆರ್ಡಿನೆನ್ಸ್‌ - ಪೋಟೋ) ಅತ್ಯಂತ ಅಪಾಯಕಾರಿಯಾಗಿದೆ ಎಂದು ಅಭಿಪ್ರಾಯ ಪಟ್ಟರು.

ಆದರೆ, ಕರ್ನಾಟಕದಲ್ಲಿ ಈಗಾಗಲೇ ಸಂಘಟಿತ ಅಪರಾಧ ಹತ್ತಿಕ್ಕಲು ಶಾಸನವಿದೆಯಲ್ಲ ಎಂಬ ಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸಿದ ಮುಖ್ಯಮಂತ್ರಿಗಳು ‘ಈ ಎರಡೂ ಶಾಸನಗಳನ್ನು ಒಂದಕ್ಕೊಂದು ಹೋಲಿಸಲು ಸಾಧ್ಯವೇ ಇಲ್ಲ. ಸಂಘಟಿತ ಅಪರಾಧ ಕಾಯ್ದೆ ಜೊತೆ ಪೋಟೋ ತುಲನಾರ್ಹವಲ್ಲ ಎಂದರು.’

ಕೇಂದ್ರದ ಹೊಸ ಭಯೋತ್ಪಾದನೆ ನಿಗ್ರಹ ಸುಗ್ರೀವಾಜ್ಞೆಯಡಿ ದೇಶದ ಎಲ್ಲ ನೂರು ಕೋಟಿ ಜನರನ್ನೂ ತರಬಹುದಾದ ಅಪಾಯವಿದೆ ಎಂದೂ ಕೃಷ್ಣ ಹೇಳಿದರು.

ಕರ್ನಾಟಕವು ಪೋಟೋವನ್ನು ಖಡಾಖಂಡಿತವಾಗಿ ವಿರೋಧಿಸುತ್ತದೆ ಎಂದೂ ಕೃಷ್ಣ ಹೇಳಿದರು. ಕೇಂದ್ರ ಸರಕಾರವು ಕಳೆದ ವರ್ಷ ಮುಖ್ಯಮಂತ್ರಿಗಳ ಸಭೆಯಲ್ಲಿ ಮಾಡಲಾದ ಶಿಫಾರಸುಗಳಿಗೆ ಅಂಟಿಕೊಂಡಿದೆ. ಇಲ್ಲಿ ಹಲವು ನೀತಿ ನಿಯಮ ಗಾಳಿಗೆ ತೂರಲಾಗಿದೆ ಎಂದೂ ಆರೋಪಿಸಿದರು.

ಭಯೋತ್ಪಾದನೆ ನಿಗ್ರಹ ಸುಗ್ರೀವಾಜ್ಞೆ ತರುವ ಮೂಲಕ ಕೇಂದ್ರ ಸರಕಾರ ಸರಿಹೆಜ್ಜೆಯನ್ನೇನೂ ಇಟ್ಟಿಲ್ಲ ಎಂದ ಕೃಷ್ಣ ತಾವು ಈ ಕ್ರಮವನ್ನು ವಿರೋಧಿಸುವುದಾಗಿ ತಿಳಿಸಿದರು.

(ಪಿ.ಟಿ.ಐ)

ಮುಖಪುಟ / ಕೃಷ್ಣಗಾರುಡಿಯ ಕನ್ನಡಿ