ಕರ್ನಾಟಕದ ಮೊದಲ ಸೈಬರ್‌ ಆಪಾದಿತ ಯಾರು ಗೊತ್ತೆ?

ಬೆಂಗಳೂರು : ನಗರ ಪೊಲೀಸರು ರಾಜ್ಯದ ಮೊದಲ ಸೈಬರ್‌ ಆರೋಪಿಯನ್ನು ಬಂಧಿಸಿದ್ದಾರೆ. ಫೀನಿಕ್ಸ್‌ ಗ್ಲೋಬಲ್‌ ಸಲ್ಯೂಷನ್ಸ್‌ (ಇಂಡಿಯಾ) ಕಂಪನಿಯ ಕೆ.ಆರ್‌.ವಿಜಯ ಕುಮಾರ್‌ ಎಂಬಾತನೇ ಈ ಭಾಗ್ಯವಂತ!

ನವೆಂಬರ್‌ 12ರಂದು ಸೈಬರ್‌ ಠಾಣೆಯಲ್ಲಿ ದಾಖಲಾದ ದೂರಿನ ಬೆನ್ನು ಹತ್ತಿದ ಪೊಲೀಸರು ಆರೋಪಿ ವಿಜಯ ಕುಮಾರ್‌ನನ್ನು ಬಂಧಿಸಿದರು. ಇಲೆಕ್ಟ್ರಾನಿಕ್‌ ಎಂಜಿನಿಯರ್‌ ಆಗಿ ಕೆಲಸ ಮಾಡುತ್ತಿರುವ ಈತ ತಾನು ಕೆಲಸ ಮಾಡುವ ಕಂಪನಿಯ ಅಮೆರಿಕೆಯಲ್ಲಿರುವ ಪ್ರಧಾನ ಕಚೇರಿಗೆ ಬೆದರಿಕೆ ಇ-ಮೇಲ್‌ಗಳನ್ನು ಕಳಿಸುತ್ತಿದ್ದ. ಭಾರತದಲ್ಲಿರುವ ಶಾಖೆಗಳನ್ನು ಮುಚ್ಚಿ. ಇಲ್ಲವಾದರೆ ಪರಿಣಾಮ ನೆಟ್ಟಗಾಗದು ಎಂಬ ಬೆದರಿಕೆ ಇ-ಮೇಲ್‌ಗಳನ್ನು ಈತ ಅಮೆರಿಕೆಗೆ ಕಳಿಸುತ್ತಿದ್ದ.

ಮೊದಲು ಇ-ಮೇಲ್‌ಗಳನ್ನು ಅಷ್ಟೇನೂ ಗಂಭೀರವಾಗಿ ಪರಿಗಣಿಸಲಿಲ್ಲ. ಆದರೆ ಒಂದು ಇ-ಮೇಲ್‌ ಸರ್ವರ್‌ ಕೆಲಸವನ್ನು ಸ್ಥಗಿತಗೊಳಿಸಿತು. ಸರ್ವರ್‌ ಸರಿಪಡಿಸಿದ ನಂತರ ಮತ್ತೊಂದು ಇ-ಮೇಲ್‌ ಬಂತು. ಸರ್ವರ್‌ ಹಾಳಾಗಲು ನಾನೇ ಕಾರಣ. ಇನ್ನಾದರೂ ನನ್ನ ಸಾಮರ್ಥ್ಯ ತಿಳಿಯಿರಿ ಎಂಬ ಸಂದೇಶ ಅದರಲ್ಲಿತ್ತು. ಇದು ಹುಡುಗಾಟಿಕೆಯಲ್ಲ. ಗಂಭೀರ ಸ್ವರೂಪದ ಪುಂಡಾಟಿಕೆ ಎಂದು ಅರಿತ ಕಂಪನಿ ಸೈಬರ್‌ ಠಾಣೆಗೆ ದೂರಿತ್ತಿತು. ತನಿಖೆ ನಂತರ ಆ ವ್ಯಕ್ತಿ ವಿಜಯ ಕುಮಾರ್‌ ಎಂದು ಪೊಲೀಸರಿಗೆ ಗುಮಾನಿ ಬಂತು. ವಿಜಯ ಕುಮಾರ್‌ ಇದೀಗ ನ್ಯಾಯಾಂಗದ ವಶದಲ್ಲಿದ್ದಾನೆ.

(ಇನ್ಫೋ ವಾರ್ತೆ)

ಮುಖಪುಟ / ಕರ್ನಾಟಕ ಸಿಲಿಕಾನ್‌ ಕಣಿವೆ