‘ಒಸಾಮನ ಬಳಿ ಪಾಕಿಸ್ತಾನದ ವಿಕಿರಣಶೀಲ ಬಾಂಬ್‌ಗಳಿವೆ,ಎಚ್ಚರ!’

ಇಸ್ಲಾಮಾಬಾದ್‌ : ತನ್ನ ಬಳಿ ಅಣ್ವಸ್ತ್ರ ಹಾಗೂ ರಾಸಾಯನಿಕ ಅಸ್ತ್ರಗಳಿವೆ ಎಂದು ಲ್ಯಾಡೆನ್‌ ಹೇಳಿಕೊಂಡ ಎರಡೇ ದಿನಗಳಲ್ಲಿ ಅದಕ್ಕೆ ಪುಷ್ಟಿ ದೊರೆತಿದೆ. ತಾವು ಲ್ಯಾಡೆನ್‌ನನ್ನು ಎರಡು ಬಾರಿ ಭೇಟಿಯಾಗಿರುವುದಾಗಿ ಕಳೆದ ತಿಂಗಳು ವಿಚಾರಣೆಗೊಳಗಾಗಿದ್ದ ಪಾಕಿಸ್ತಾನದ ವಿಜ್ಞಾನಿ ಬಷಿರುದ್ದೀನ್‌ ಮಹ್ಮೂದ್‌ ಒಪ್ಪಿಕೊಂಡಿದ್ದಾರೆ.

ನಾನು ಲ್ಯಾಡೆನ್‌ನನ್ನು ಭೇಟಿಯಾಗಿದ್ದುದು ನಿಜ. ಅದು ಆಫ್ಘನ್‌ ಪ್ರವಾಸ ಕೈಗೊಂಡಿದ್ದಾಗ. ಸೆಪ್ಟೆಂಬರ್‌ 11ರ ಅಮೆರಿಕಾ ದಾಳಿಗೆ ಮುನ್ನ ಎಂದು ಮಹ್ಮೂದ್‌ ಬೇಹುಗಾರಿಕಾ ದಳಗಳಿಗೆ ಹೇಳಿದ್ದಾರೆ. ಒಸಾಮ ಹಾಗೂ ಆತನ ಜಾಲ ಅಲ್‌-ಕ್ವೆದಾ ಜೊತೆ ಸಂಪರ್ಕ ಇಟ್ಟುಕೊಂಡಿದ್ದಾರೆ ಎಂಬ ಗುಮಾನಿ ಕಾರಣ ಮಹ್ಮೂದ್‌ ಜೊತೆಗೆ ಇನ್ನೂ ಇಬ್ಬರು ಪಾಕಿಸ್ತಾನಿ ವಿಜ್ಞಾನಿಗಳನ್ನು ವಿಚಾರಣೆಗೆ ಒಳಪಡಿಸಿದ್ದನ್ನು ಇಲ್ಲಿ ಸ್ಮರಿಸಬಹುದು.

ಒಸಾಮ ಹಾಗೂ ಆತನ ಸಂಘಟನೆ ಅಲ್‌-ಕ್ವೆದಾ ವಿಕಿರಣಶೀಲ ಬಾಂಬ್‌ಗಳನ್ನು ಹೊಂದಿರುವ ಅಪಾಯವಿದೆ ಎಂದು ಅಂತರರಾಷ್ಟ್ರೀಯ ಅಣು ಶಕ್ತಿ ಸಂಸ್ಥೆ (ಐಎಇಎ) ಎಚ್ಚರಿಸಿದೆ. ಈ ಬಾಂಬ್‌ಗಳು ಅಣು ಬಾಂಬ್‌ಗಿಂತ ತೀವ್ರವಾದವು. ಇವುಗಳನ್ನು ಸಿದ್ಧಪಡಿಸುವುದೂ ಸುಲಭ. ಗಾತ್ರದಲ್ಲೂ ಅತಿ ಚಿಕ್ಕದಾಗಿದ್ದು, ಶೇಖರಿಸಿಡುವುದು ಸುಲಭ. ಪಾಶ್ಚಿಮಾತ್ಯ ಪತ್ರಿಕೆಯಾಂದು ವರದಿ ಮಾಡಿರುವಂತೆ ಈ ಬಾಂಬ್‌ಗಳನ್ನು ಪಾಕಿಸ್ತಾನದಲ್ಲಿ ತಯಾರಿಸಲಾಗಿದೆ.

ಚಿಕ್ಕ ಗಾತ್ರದ ಬಾಂಬ್‌ ತಯಾರಿ ಶುರುಮಾಡಿದ್ದು ರಷ್ಯಾ. ಈ ತಂತ್ರಜ್ಞಾನವನ್ನು ಪಾಕಿಸ್ತಾನ ಕೂಡ ಅಳವಡಿಸಿಕೊಂಡಿದೆ. ಪಾಕಿಸ್ತಾನ ತಯಾರಿಸುವ ಬಾಂಬ್‌ಗಳ ತೀವ್ರತೆ, ಹಿರೋಷಿಮಾ ಮೇಲೆ ಅಮೆರಿಕಾ ಬಿಸುಟ ಬಾಂಬ್‌ಗಿಂತ ಹೆಚ್ಚಾಗಿರುವುದಿಲ್ಲ. ಆದರೆ ವಿಕಿರಣ ಸೂಸುವ ಬಾಂಬ್‌ಗಳ ದುಷ್ಪರಿಣಾಮದ ಅವಧಿ ಅನಂತ. ಒಸಾಮನ ಬಳಿ ಇರುವ ಬಾಂಬ್‌ಗಳು ರಷ್ಯಾದಿಂದ ರವಾನೆಯಾಗಿರುವುದಲ್ಲ, ಅವು ಪಾಕಿಸ್ತಾನದಿಂದ ತಲುಪಿವೆ. ಒಸಾಮ-ಪಾಕಿಸ್ತಾನದ ವಿಜ್ಞಾನಿಗಳ ಸಂಪರ್ಕ ಇದರಿಂದ ದೃಢವಾಗುತ್ತದೆ ಎಂದು ವಾಲ್‌ಸ್ಟ್ರೀಟ್‌ ಜರ್ನಲ್‌ ವರದಿ ಮಾಡಿದೆ.

(ಪಿಟಿಐ)