ಬ್ರಿಟೀಷರ ವಿರುದ್ಧ ಮೈಸೂರು ಹುಲಿ ಟಿಪ್ಪು ಕ್ಷಿಪಣಿ ಬಳಸಿದ್ದ !

ತೆನಾಲಿ : ಮೈಸೂರು ಹುಲಿ ಟಿಪ್ಪು ಸುಲ್ತಾನ್‌ ಶ್ರೀರಂಗಪಟ್ಟಣ ಯುದ್ಧದಲ್ಲಿ ಬ್ರಿಟೀಷರ ವಿರುದ್ಧ ಕ್ಷಿಪಣಿ ಹಾಗೂ ರಾಕೆಟ್‌ಗಳನ್ನು ಬಳಸಿದ್ದ . ಆ ಕ್ಷಿಪಣಿಯ ಮಾದರಿಗಳನ್ನು ಸಂರಕ್ಷಿಸಿ ಇಡಲಾಗಿದೆ ಎನ್ನುವ ವಿಷಯವನ್ನು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಒ)ಯ ಮಹಾ ನಿರ್ದೇಶಕ ಡಾ.ವಿ.ಕೆ.ಆತ್ರೆ ಬಹಿರಂಗ ಪಡಿಸಿದ್ದಾರೆ.

ವಿಜ್ಞಾನ, ತಂತ್ರಜ್ಞಾನ ಮತ್ತು ಯುದ್ಧಭೂಮಿ ಎನ್ನುವ ವಿಷಯದ ಬಗ್ಗೆ ಮಂಗಳವಾರ ಆಂಧ್ರಪ್ರದೇಶದ ತೆನಾಲಿಯಲ್ಲಿ ಆತ್ರೆ ಉಪನ್ಯಾಸ ನೀಡುತ್ತಿದ್ದರು. ಬ್ರಿಟೀಷರ ವಿರುದ್ಧ ಯುದ್ಧದಲ್ಲಿ ಕ್ಷಿಪಣಿ ಬಳಸಿದವರಲ್ಲಿ ಮೈಸೂರಿನ ದೊರೆ ಟಿಪ್ಪು ಸುಲ್ತಾನ್‌ ಮೊದಲಿಗ ಎಂದು ಕ್ಷಿಪಣಿ ತಂತ್ರಜ್ಞಾನ ಪ್ರಾಚೀನತೆಯನ್ನು ಕುರಿತು ಅವರು ಹೇಳಿದರು.

ಎರಡನೇ ಮಹಾಯುದ್ಧದಲ್ಲಿ ವಿ1 ಹಾಗೂ ವಿ2 ಮಾದರಿಯ ರಾಕೆಟ್‌ಗಳನ್ನು ಬ್ರಿಟೀಷರ ವಿರುದ್ಧ ಜರ್ಮನಿ ಬಳಸಿತ್ತು . ಈಗಿನ ಕ್ಷಿಪಣಿಗಳು ಪ್ರಾಚೀನ ಕ್ಷಿಪಣಿಗಳ ತಂತ್ರಜ್ಞಾನವನ್ನು ಅಭಿವೃದ್ಧಿ ಪಡಿಸಿದ ಮಾದರಿಗಳಾಗಿವೆ. ನಿಖರ ಗುರಿ ಮುಟ್ಟಬಲ್ಲ ಹಾಗೂ ಮೊಬೈಲ್‌ ನೆಲೆಗಳಿಂದ ಉಡಾಯಿಸಬಹುದಾದ ಕ್ಷಿಪಣಿಗಳು ದ್ವಿತೀಯ ಮಹಾಯುದ್ಧದ ನಂತರ ಸೇನಾ ವ್ಯೂಹದಲ್ಲಿ ಪ್ರಮುಖ ಪಾತ್ರ ವಹಿಸಿವೆ ಎಂದು ಆತ್ರೆ ಅಭಿಪ್ರಾಯಪಟ್ಟರು.

ಭವಿಷ್ಯದ ರಣರಂಗದಲ್ಲಿ ಮಾನವನ ಬದಲಿಗೆ ರೋಬೋಟ್‌, ಮಾನವ ರಹಿತ ವಾಹನಗಳು, ಬೌದ್ಧಿಕ ಕೌಶಲ್ಯವೇ ಪ್ರಮುಖ ಪಾತ್ರ ವಹಿಸುತ್ತದೆ. ಆದರೆ, ಯುದ್ಧದಲ್ಲಿ ಯಶಸ್ಸಿಗೆ ತಂತ್ರಜ್ಞಾನಕ್ಕಿಂತ ಮಾನವ ವಹಿಸುವ ಪಾತ್ರವೇ ಮುಖ್ಯವಾಗುತ್ತದೆ ಎಂದು ಅವರು ಹೇಳಿದರು.

ಆತ್ರೆ ನೆನಪಿಸಿಕೊಂಡ ಚರಿತ್ರಕಾರ ಟೊಯ್ನ್‌ಬಿ ಹೇಳಿಕೆ-

ಮೊದಲು ಹುಲಿಗಳಿಂದ ಮಾನವ ಆತ್ಮ ರಕ್ಷಣೆ ಮಾಡಿಕೊಳ್ಳಬೇಕಿತ್ತು . ಈಗ ಮಾನವನಿಂದ ಮಾನವ ಆತ್ಮ ರಕ್ಷಣೆ ಮಾಡಿಕೊಳ್ಳಬೇಕಾಗಿದೆ.

(ಪಿಟಿಐ)