ವಾಜಪೇಯಿ ಅಮೆರಿಕಾ ಭೇಟಿ,ಉಭಯ ದೇಶ ಸಂಬಂಧ ವೃದ್ಧಿಗೆ ಒತ್ತು

ನವದೆಹಲಿ : ಭಾರತ ಹಾಗೂ ಅಮೆರಿಕಾ ವಿಶ್ವದ ಎರಡು ಅತಿದೊಡ್ಡ ಪ್ರಜಾಪ್ರಭುತ್ವ ದೇಶಗಳಾಗಿದ್ದು , ತಮ್ಮ ಅಮೆರಿಕಾ ಭೇಟಿಯಿಂದ ಉಭಯ ರಾಷ್ಟ್ರಗಳ ನಡುವಣ ಸಂಬಂಧ ವೃದ್ಧಿಸಲಿದೆ ಎಂದು ಪ್ರಧಾನಿ ವಾಜಪೇಯಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರ 10 ದಿನಗಳ ರಷ್ಯಾ ಹಾಗೂ ಅಮೆರಿಕ ಯಾತ್ರೆ ಭಾನುವಾರ (ನ.04)ದಿಂದ ಆರಂಭವಾಗಿದ್ದು , ಭಾನುವಾರ ಮಾಸ್ಕೋಗೆ ತೆರಳುವ ಮುನ್ನ ಸುದ್ದಿಗಾರರೊಂದಿಗೆ ಮಾತನಾಡಿದ ಪ್ರಧಾನಿ ಈ ವಿಷಯ ತಿಳಿಸಿದರು. ಭಯೋತ್ಪಾದಕತೆಯ ವಿರುದ್ಧ ಉಭಯ ರಾಷ್ಟ್ರಗಳು ಒಟ್ಟಿಗೆ ಹೋರಾಡುತ್ತವೆ ಎಂದು ಅವರು ಹೇಳಿದರು.

ಮಾಸ್ಕೋ ಘೋಷಣೆ ಸಂಭವ

ಆಪ್ಘನ್‌ ಹಾಗೂ ಅಮೆರಿಕ ಯುದ್ಧದ ಹಿನ್ನೆಲೆಯಲ್ಲಿ ವಾಜಪೇಯಿ ಅವರ ವಿದೇಶ ಯಾತ್ರೆ ವಿಶೇಷ ಮಹತ್ವ ಪಡೆದಿದೆ.

ರಷ್ಯಾದಲ್ಲಿ ನಾಲ್ಕು ದಿನ ಕಳೆಯುವ ವಾಜಪೇಯಿ, ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಅವರೊಂದಿಗೆ ಆಪ್ಘನ್‌ ಬಿಕ್ಕಟ್ಟು ಕುರಿತು ಚರ್ಚಿಸುವರು. ಇದೇ ಸಂದರ್ಭದಲ್ಲಿ ಭಯೋತ್ಪಾದಕತೆಯನ್ನು ನಿಗ್ರಹಿಸುವ ಮಾಸ್ಕೋ ಘೋಷಣೆಗೆ ವಾಜಪೇಯಿ ಹಾಗೂ ಪುಟಿನ್‌ ಸಹಿ ಹಾಕುವರು.

ರಷ್ಯಾ ಭೇಟಿಯ ನಂತರ ನವಂಬರ್‌ 7 ರಂದು ವಾಜಪೇಯಿ ಅಮೆರಿಕಾಗೆ ತೆರಳುವರು. ಆಪ್ಘನ್‌ ಯುದ್ಧ ಹಾಗೂ ಯುದ್ಧಾನಂತರದ ಆಪ್ಘನ್‌ ಸರ್ಕಾರದ ಬಗೆಗೆ ಅಮೆರಿಕಾದ ಅಧ್ಯಕ್ಷ ಜಾರ್ಜ್‌ ಬುಷ್‌ ಅವರೊಂದಿಗೆ ವಾಜಪೇಯಿ ಚರ್ಚಿಸುವರು. ನವಂಬರ್‌ 10 ರಂದು ನ್ಯೂಯಾರ್ಕ್‌ನಲ್ಲಿ ನಡೆಯುವ ವಿಶ್ವಸಂಸ್ಥೆ ಸಾಮಾನ್ಯಸಭೆ ಅಧಿವೇಶನವನ್ನು ಉದ್ದೇಶಿಸಿ ವಾಜಪೇಯಿ ಮಾತನಾಡುವರು.

ವಿದೇಶಾಂಗ ಸಚಿವ ಜಸ್ವಂತ್‌ಸಿಂಗ್‌ ನೇತೃತ್ವದಲ್ಲಿ ಉನ್ನತ ಮಟ್ಟದ ಭಾರತೀಯ ನಿಯೋಗ ಪ್ರಧಾನಿ ವಾಜಪೇಯಿ ಅವರೊಂದಿಗೆ ತೆರಳಿದೆ.

(ಇನ್ಫೋ ವಾರ್ತೆ)