ಬೆಂಗಳೂರು ಐಟಿ.ಕಾಂ ನಂತರ ಮುಂದೇನು?ನಡೆಯಿರಿ ಮೈಸೂರಿಗೆ..

ಬೆಂಗಳೂರು : ರಾಜ್ಯದ ನಂಬರ್‌ ಟೂ ನಗರಿ ಎಂದೇ ಗುರ್ತಿಸಿಕೊಂಡಿರುವ ಸಾಂಸ್ಕೃತಿಕ ರಾಜಧಾನಿ ಮೈಸೂರು, ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲೂ ಬೆಂಗಳೂರಿನ ನಂತರ ಎರಡನೇ ಸ್ಥಾನದಲ್ಲಿ ಗುರ್ತಿಸಿಕೊಂಡಿದೆ. ರಾಜ್ಯದ ವಾರ್ಷಿಕ ಐಟಿ ಹಬ್ಬ ಬೆಂಗಳೂರು ಐಟಿ.ಕಾಂ ಮಾದರಿಯಲ್ಲೇ ಮೈಸೂರು ಐಟಿ.ಕಾಂ ಕೂಡ ಮೂರು ವರ್ಷದಿಂದ ನಡೆಯುತ್ತಿರುವುದು ಸರಿಯಷ್ಟೇ. ಈ ವರ್ಷ ಕೂಡ ಬೆಂಗಳೂರು ಐಟಿ.ಕಾಂ ಬೆನ್ನಿಗೇ ಮೈಸೂರಿನಲ್ಲಿ ಐಟಿ ಗಮಲು ಹರಡಿದೆ.

ನವಂಬರ್‌ 22 ರಿಂದ 25 ರವರೆಗೆ ಮೈಸೂರು ಐಟಿಕಾಂ ಮೇಳ ಮೈಸೂರಿನ ನಜರಾಬಾದ್‌ನಲ್ಲಿರುವ ಚಾಮುಂಡಿ ವಿಹಾರ್‌ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆಯಲಿದೆ ಎಂದು ಮಾಹಿತಿ ತಂತ್ರಜ್ಞಾನ ನಿರ್ದೇಶಕ ಇ.ವಿ.ರಮಣ ರೆಡ್ಡಿ ಮತ್ತು ಮೈಸೂರು ಡೀಲರ್ಸ್‌ ಆಫ್‌ ಐಟಿಯ ಎಸ್‌.ವಿ.ವೆಂಕಟೇಶ್‌ ಜಂಟಿ ಸುದ್ದಿಗೋಷ್ಠಿಯಲ್ಲಿ ಶನಿವಾರ ಸುದ್ದಿಗಾರರಿಗೆ ತಿಳಿಸಿದರು.

ಮೈಸೂರು ಹಾಗೂ ಸುತ್ತಮುತ್ತಲಿನ ಜಿಲ್ಲೆಗಳಲ್ಲಿ ಐಟಿ ಮಾರುಕಟ್ಟೆಯನ್ನು ವಿಸ್ತರಿಸುವುದು ಹಾಗೂ ಐಟಿ ಬಂಡವಾಳ ಹೂಡಿಕೆದಾರರು ಹಾಗೂ ರಫ್ತುದಾರರು ಒಂದೆಡೆ ಕಲೆಯಲು ವೇದಿಕೆಯನ್ನು ಕಲ್ಪಿಸುವುದು ಮೈಸೂರು ಐಟಿಕಾಂ ಮೇಳದ ಪ್ರಮುಖ ಉದ್ದೇಶವಾಗಿದೆ.

ಸಾಫ್ಟ್‌ವೇರ್‌ ಕಂಪನಿಗಳು, ಹಾರ್ಡ್‌ವೇರ್‌ ಉದ್ದಿಮೆದಾರರು, ಮಲ್ಟಿಮೀಡಿಯಾ ಪಬ್ಲಿಷರ್‌ಗಳು, ಐಟಿ ತರಬೇತಿ ಸಂಸ್ಥೆಗಳು, ಇನ್ನಿತರ ಸಂಸ್ಥೆಗಳ ಮೈಸೂರು ಐಟಿ.ಕಾಂ ಷೋಕೇಸ್‌ ಆಗಲಿದೆ ಎಂದು ವೆಂಕಟೇಶ್‌ ತಿಳಿಸಿದರು.

(ಇನ್ಫೋ ವಾರ್ತೆ)