ಪಾಕ್‌ನಲ್ಲಿ ಅಮೆರಿಕಾ ವಿರೋಧಿ ಪ್ರತಿಭಟನೆ: 58ಮಂದಿ ಬಂಧನ

ಜಾಕೋಬಾಬಾದ್‌ (ಪಾಕಿಸ್ತಾನ): ಪಾಕಿಸ್ತಾನದ ಜಾಕೋಬಾಬಾದ್‌ನಲ್ಲಿ ಅಮೆರಿಕಾ ವಿರೋಧಿ ಪ್ರತಿಭಟನೆ ಇನ್ನಷ್ಟು ತೀವ್ರಗೊಂಡಿದೆ. ಅಮೆರಿಕವು ಬಳಸುತ್ತಿರುವ ವಾಯುನೆಲೆಯ ಬಳಿ ಮಂಗಳವಾರ ಪ್ರತಿಭಟನೆ ನಡೆಸುವ ಪ್ರಯತ್ನವೂ ನಡೆಯಿತು. ಈ ಹಂತದಲ್ಲಿ ಪಾಕ್‌ ಪೊಲೀಸರು ಪ್ರತಿಭಟನಾಕಾರರ ಮೇಲೆ ಬೆತ್ತ ಪ್ರಹಾರ ನಡೆಸಿದ್ದಲ್ಲದೆ, ಸುಮಾರು 58 ಜನರನ್ನು ತಮ್ಮ ವಶಕ್ಕೆ ತೆಗೆದುಕೊಂಡರು.

ಈ ಪ್ರದೇಶದಲ್ಲಿ ಮುಂಜಾಗರೂಕತಾ ಕ್ರಮವಾಗಿ 3 ಸಾವಿರ ಪ್ಯಾರಾ ಮಿಲಿಟರಿ ಪಡೆ ಹಾಗೂ ಪೊಲೀಸರನ್ನು ನಿಯೋಜಿಸಲಾಗಿದೆ. ದಿನದಿಂದ ದಿನಕ್ಕೆ ಈ ಪ್ರದೇಶದಲ್ಲಿ ಅಮೆರಿಕಾ ವಿರೋಧಿ ಅಲೆ ತೀವ್ರವಾಗುತ್ತಿದ್ದು, ಹಿಂಸಾ ಮಾರ್ಗ ಹಿಡಿಯುತ್ತಿದೆ. ಇಲ್ಲಿನ ವಾಯುನೆಲೆಗೆ ಪ್ರತಿಭಟನಾಕಾರರು ಮುತ್ತಿಗೆ ಹಾಕಬಹುದು ಎಂಬ ಶಂಕೆಯ ಹಿನ್ನೆಲೆಯಲ್ಲಿ ಬಿಗಿ ಭದ್ರತೆ ಏರ್ಪಡಿಸಲಾಗಿದೆ. ಜಮಾತೆ ಇ ಇಸ್ಲಾಮಿ ಸಂಘಟನೆ ಈ ಪ್ರತಿಭಟನೆಯ ಮುಂದಾಳತ್ವ ವಹಿಸಿದೆ. ಬೃಹತ್‌ ರ್ಯಾಲಿಗೂ ಅದು ಕರೆ ನೀಡಿದೆ.

ಈ ಪ್ರದೇಶದಲ್ಲಿ ಅಂಗಡಿ ಮುಂಗಟ್ಟುಗಳು ಮುಚ್ಚಿದ್ದು, ಪ್ಯಾರಾ ಮಿಲಿಟರಿ ಪಡೆ ನಾಗರಿಕರಿಗೆ ಸ್ಥೈರ್ಯ ತುಂಬಲು, ರಸ್ತೆಗಳಲ್ಲಿ ಪಥ ಸಂಚಲನ ನಡೆಸಿತು. ಬಿನ್‌ ಲಾಡೆನ್‌ ವಿರುದ್ಧ ಹಾಗೂ ತಾಲಿಬಾನ್‌ ಆಡಳಿತದ ವಿರುದ್ಧ ಅಮೆರಿಕಾ ಸಾರಿರುವ ಯುದ್ಧಕ್ಕೆ ನೆರವು ನೀಡುತ್ತಿರುವ ಪಾಕಿಸ್ತಾನ ಆಡಳಿತದ ವಿರುದ್ಧ ಜಾಕೋಬಾಬಾದ್‌ನಲ್ಲಿ ಪ್ರತಿಭಟನೆ ನಡೆಯುತ್ತಿದೆ.

ಚಾರಿಕಾರ್‌ (ಆಫ್ಘಾನಿಸ್ತಾನ) ವರದಿ: ಮಿಲಿಟರಿ ಆಡಳಿತ ತಾಲಿಬಾನ್‌ನ ಬಿಗಿ ಹಿಡಿತ ಇರುವ ಕಂದಹಾರ್‌ನ ಮೇಲೆ ಮಂಗಳವಾರ ಅಮೆರಿಕಾ ಜೆಟ್‌ ವಿಮಾನಗಳು ದಾಳಿ ಮುಂದುವರಿಸಿದ್ದು, ತೈಲ ಸಂಗ್ರಹಾಗಾರವನ್ನು ಧ್ವಂಸ ಮಾಡಿವೆ. ಕಾಬೂಲ್‌ ನಗರದ ಮೇಲೂ ಬೆಳಗ್ಗಿನಿಂದಲೇ ಬಾಂಬ್‌ ದಾಳಿ ನಡೆಯುತ್ತಿದೆ.

ಈ ಮಧ್ಯೆ ಕಾಬೂಲ್‌ ಉತ್ತರ ಭಾಗದಲ್ಲಿ ಮಂಗಳವಾರ ನಡೆದ ರಾಕೆಟ್‌ ಪ್ರತಿದಾಳಿಯಲ್ಲಿ ಇಬ್ಬರು ನಾಗರಿಕರು ಸಾವನ್ನಪ್ಪಿದ್ದು, ಕನಿಷ್ಠ 10 ಮಂದಿ ಗಾಯಗೊಂಡಿದ್ದಾರೆ. ಮಂಗಳವಾರ ಬೆಳಗ್ಗೆ 11.30ರಲ್ಲಿ ಸಿಡಿದ ಎರಡು ರಾಕೆಟ್‌ಗಳ ಪೈಕಿ ಒಂದು ರಾಕೆಟ್‌ ಜನನಿಬಿಡ ಮಾರುಕಟ್ಟೆ ಬೀದಿಯಲ್ಲಿ ತರಕಾರಿ ವ್ಯಾಪಾರಿ ಮೊಹಮ್ಮದ್‌ ಹಸೂಲ್‌ (55) ಹಾಗೂ ಮತ್ತೊಬ್ಬ ಅಪರಿಚಿತನನ್ನು ಬಲಿ ತೆಗೆದುಕೊಂಡಿದೆ. ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ.

(ಎಎಫ್‌ಪಿ)