ಕೋಫಿ ಅನ್ನಾನ್‌ ಹಾಗೂ ವಿಶ್ವ ಸಂಸ್ಥೆಗೆ ನೊಬೆಲ್‌ ಶಾಂತಿ ಪ್ರಶಸ್ತಿ

ಓಸ್ಲೋ: ನಾರ್ವೆಯನ್‌ ನೊಬೆಲ್‌ ಪ್ರಶಸ್ತಿ ಆಯ್ಕೆ ಸಮಿತಿಯು ಈ ವರ್ಷದ ನೊಬೆಲ್‌ ಶಾಂತಿ ಪ್ರಶಸ್ತಿಯನ್ನು ಜಾಗತಿಕ ಶಾಂತಿಗಾಗಿ ಯತ್ನಿಸುತ್ತಿರುವ ವಿಶ್ವಸಂಸ್ಥೆ ಹಾಗೂ ವಿಶ್ವ ಸಂಸ್ಥೆಯ ಮಹಾನ್‌ ಕಾರ್ಯದರ್ಶಿ ಕೋಫಿ ಅನ್ನಾನ್‌ಗೆ ನೀಡಲು ನಿರ್ಧರಿಸಿದೆ.

ನಾರ್ವೇಯನ್‌ ನೊಬೆಲ್‌ ಸಂಸ್ಥೆ ಶುಕ್ರವಾರ ಈ ವಿಷಯವನ್ನು ಪ್ರಕಟಿಸಿದೆ. ಕೋಫಿ ಅನ್ನಾನ್‌ ತಮ್ಮ ವೃತ್ತಿ ಬದುಕಿನ ಸಮಯವನ್ನು ವಿಶ್ವಸಂಸ್ಥೆಗಾಗಿ ಮುಡಿಪಾಗಿರಿಸಿದವರು. ಮಾನವ ಹಕ್ಕುಗಳ ಬಗೆಗಿನ ಕಾಳಜಿಗೂ ಹೆಚ್ಚಿನ ಒತ್ತುಕೊಟ್ಟು, ಜಾಗತಿಕ ಭದ್ರತೆ ಮತ್ತು ಶಾಂತಿ ಭದ್ರತೆ ಕಾಪಾಡುವ ವಿಶ್ವ ಸಂಸ್ಥೆಯ ಉದ್ದೇಶವನ್ನು ಅರ್ಥೈಸಿಕೊಂಡು ಮುನ್ನಡೆದವರು. ಎಚ್‌ಐವಿ, ಏಯ್ಡ್ಸ್‌, ಅಂತರರಾಷ್ಟ್ರೀಯ ಭಯೋತ್ಪಾದನೆ ವಿಷಯನ್ನು ನಿರ್ವಹಿಸುವಲ್ಲಿ ಅನ್ನಾನ್‌ ವಿಶೇಷ ಆಸಕ್ತಿ ವಹಿಸಿದ್ದಾರೆ ಎಂದು ನೊಬೆಲ್‌ ಸಂಸ್ಥೆ ತನ್ನ ಪ್ರಕಟಣೆಯಲ್ಲಿ ಹೇಳಿದೆ.

ವಿಶ್ವಸಂಸ್ಥೆಯು ಸಾಕಷ್ಟು ಸಾಧನೆಗಳ ಇತಿಹಾಸವನ್ನು ಪಡೆದಿದೆ. ಏಳು ಬೀಳುಗಳನ್ನೂ ಕಂಡಿದೆ. ವಿಶ್ವಸಂಸ್ಥೆಗೆ ಶಾಂತಿ ಪ್ರಶಸ್ತಿ ಲಭಿಸುತ್ತಿರುವುದು ಇದೇ ಮೊದಲ ಸಲ.

(ಇನ್ಫೋ ವಾರ್ತೆ)