ಏಡ್ಸ್‌ಗೆ ಕಡಿವಾಣ : ಎಚ್‌ಐವಿ ಪ್ರಶ್ನೆಗೆ ಜಿಬಿ ವೈರಸ್‌ ಸಿ ಎಂಬ ಉತ್ತರ

ಉಡುಪಿ : ಏಡ್ಸ್‌ಗೆ ಕಾರಣವಾದ ಎಚ್‌ಐವಿ ಪ್ರಮಾಣ ತಗ್ಗಿಸಬಲ್ಲ ಇನ್ನೊಂದು ವೈರಸ್‌ ಇದೆ ಅನ್ನೋದು ನಿಮಗೆ ಗೊತ್ತೆ ? ಅದರ ಹೆಸರು ಜಿಬಿ ವೈರಸ್‌ ಸಿ.

ಯೂನಿವರ್ಸಿಟಿ ಆಫ್‌ ಇಯೋವಾ ಹಾಗೂ ಜರ್ಮನಿಯ ಹ್ಯಾನೋವರ್‌ ಮೆಡಿಕಲ್‌ ಸ್ಕೂಲ್‌ನಲ್ಲಿ ನಡೆಸಿರುವ ಹೊಸ ಅಧ್ಯಯನದಿಂದ ಎಚ್‌ಐವಿ ಪ್ರಮಾಣ ತಗ್ಗಿಸಲು ಸಾಧ್ಯವಿದೆ ಅನ್ನೋದು ಪತ್ತೆಯಾಗಿದೆ. ಈ ಎರಡೂ ಕಡೆ 560 ಏಡ್ಸ್‌ ಪೀಡಿತರ ದೇಹಕ್ಕೆ ಜಿಬಿ ವೈರಸ್‌ ಸಿ ಸೋಂಕು ತಗಲುವಂತೆ ಮಾಡಿದ ನಂತರ ಎಚ್‌ಐವಿ ಪ್ರಮಾಣ ಪ್ರತಿಶತ 99ರಷ್ಟು ಕಡಿಮೆಯಾಗಿದೆ!

ಹಳದಿ ಜ್ವರ, ಹೆಪಟೈಟಿಸ್‌ ಸಿ ಹಾಗೂ ಡೆಂಗ್ಯೂ ವರ್ಗಕ್ಕೇ ಸೇರುವ ಜಿಬಿ ವೈರಸ್‌ ಸಿ, ಏಡ್ಸ್‌ಗೆ ಕಾರಣವಾದ ವೈರಾಣುಗಳ ವೇಗಕ್ಕೆ ಕಡಿವಾಣ ಹಾಕಬಲ್ಲುದೇ ಎಂಬ ಸಂಶೋಧನೆಯೂ ಆಕಸ್ಮಿಕವಾಗಿಯೇ ನಡೆದದ್ದು. ಆದರೆ ಫಲಿತಾಂಶ ಒಳ್ಳೆಯದಾಗಿದೆ. ಜೊತೆಗೆ ಜಿಬಿ ವೈರಸ್‌ ಸಿಯಿಂದ ಬೇರೆ ಯಾವುದೇ ತೊಂದರೆಯಾಗುವುದಿಲ್ಲ ಎಂದೂ ತಿಳಿದುಬಂದಿದೆ.

ಮಣಿಪಾಲ್‌ ಅಕಾಡೆಮಿ ಆಫ್‌ ಹೈಯರ್‌ ಎಜುಕೇಷನ್‌ (ಮಾಹೆ) ನ ಉಪ ಕುಲಪತಿ ಹಾಗೂ ಹೆಸರಾಂತ ದೈಹಿಕ ತಜ್ಞ ಪ್ರೊ.ಬಿ.ಎಂ.ಹೆಗಡೆ ಉಡುಪಿಯಲ್ಲಿ ಇತ್ತೀಚೆಗೆ ಈ ಮಹತ್ವದ ವಿಷಯ ತಿಳಿಸಿದರು.

(ಇನ್ಫೋ ವಾರ್ತೆ)