ತಾಲಿಬಾನ್‌ ಉಗ್ರರ ದಾಳಿಯ ಭಯದಿಂದಾಗಿ ಮುಷರ್ರಫ್‌ಗೆ ಬಿಗಿ ಭದ್ರತೆ

ಇಸ್ಲಮಾಬಾದ್‌ : ಅಮೆರಿಕದ ಉದ್ದೇಶಿತ ದಾಳಿಗೆ ಪಾಕಿಸ್ತಾನ ಸರ್ಕಾರ ಬೆಂಬಲ ಘೋಷಿಸಿರುವ ಹಿನ್ನೆಲೆಯಲ್ಲಿ , ತಾಲಿಬಾನ್‌ ಭಯೋತ್ಪಾದಕರ ಸಂಭವನೀಯ ದಾಳಿಯ ಭಯದಿಂದಾಗಿ ಪಾಕಿಸ್ತಾನದ ಅಧ್ಯಕ್ಷ ಪರ್ವೇಜ್‌ ಮುಷರ್ರಫ್‌ ಅವರ ಭದ್ರತೆಯನ್ನು ಮತ್ತಷ್ಟು ಬಿಗಿಗೊಳಿಸಲಾಗಿದೆ. ಅಂತೆಯೇ ಇಸ್ಲಮಾಬಾದ್‌ನಲ್ಲಿನ ಅಮೆರಿಕದ ರಾಯಭಾರಿ ಮತ್ತಿತರ ರಾಜತಾಂತ್ರಿಕರಿಗೂ ಭದ್ರತೆಯನ್ನು ಬಿಗಿಗೊಳಿಸಲಾಗಿದೆ.

ಭಯೋತ್ಪಾದಕರ ಆತ್ಮಹತ್ಯಾ ದಳದ ಸದಸ್ಯರಿಂದ ಮುಷರ್ರಫ್‌ ಮತ್ತಿತರ ರಾಜತಾಂತ್ರಿಕ ಸಿಬ್ಬಂದಿಯನ್ನು ರಕ್ಷಿಸಲು ಈಗಾಗಲೇ ಯೋಜನೆಯನ್ನು ಸಿದ್ಧಪಡಿಸಲಾಗಿದೆ ಎಂದು ಕಾನೂನು ಅನುಷ್ಠಾನ ವಿಭಾಗದ ಹಿರಿಯ ಅಧಿಕಾರಿಯಾಬ್ಬರ ಹೇಳಿಕೆಯನ್ನುಲ್ಲೇಖಿಸಿ ಮಾಧ್ಯಮ ವರದಿಗಳು ಮಂಗಳವಾರ ತಿಳಿಸಿವೆ.

ಭದ್ರತೆಯ ಕುರಿತಾದ ಬ್ಲೂ ಬುಕ್‌ ಅನುಸಾರ ಇಸ್ಲಮಾಬಾದ್‌ನಲ್ಲಿ ಕಟ್ಟೆಚ್ಚರದ ಬಂದೋಬಸ್ತ್‌ ಕಲ್ಪಿಸಲಾಗಿದೆ. ಮುಷರ್ರಫ್‌ ಭದ್ರತಾ ದಳದ ಅಧ್ಯಕ್ಷರು ಪರಿಸ್ಥಿತಿಯ ಸೂಕ್ಷ್ಮ ಅವಲೋಕನ ನಡೆಸಿದ್ದಾರೆ ಎಂದು ಪಾಕಿಸ್ತಾನ ದೈನಿಕ ದಿ ಡೌನ್‌ ವರದಿ ಮಾಡಿದೆ.

(ಪಿಟಿಐ)