ಲೋಡ್‌ಶೆಡ್ಡಿಂಗ್‌: ಬೆಂಗಳೂರಲ್ಲಿ ಶೇ.25, ಇತರಭಾಗದಲ್ಲಿ ಶೇ.40

ಬೆಂಗಳೂರು : ರಾಜ್ಯದಲ್ಲಿ ತಲೆದೋರಿರುವ ತೀವ್ರ ವಿದ್ಯುತ್‌ ಕ್ಷಾಮದ ಹಿನ್ನೆಲೆಯಲ್ಲಿ ಬುಧವಾರದಿಂದಲೇ ಜಾರಿಯಾಗುವಂತೆ ರಾಜ್ಯಾದ್ಯಂತ ಲೋಡ್‌ ಶೆಡ್ಡಿಂಗ್‌ ಜಾರಿಗೊಳಿಸಲಾಗಿದೆ. ರಾಜ್ಯದ ಇತರ ಭಾಗಗಳಲ್ಲಿ ಲೋಡ್‌ ಶೆಡ್ಡಿಂಗ್‌ ಪ್ರಮಾಣ ಶೇ.40 ರಷ್ಟಿದ್ದರೆ, ಬೆಂಗಳೂರಿನಲ್ಲಿ ಶೇ. 25 ರಷ್ಟಿರುತ್ತದೆ.

ಇದು ಅನಿವಾರ್ಯವಾಗಿ ತಂದಿರುವ ವ್ಯವಸ್ಥೆ ಎಂದು ಕೆಪಿಟಿಸಿಎಲ್‌ ಮೂಲಗಳು ತಿಳಿಸಿವೆ. ಜಲ ವಿದ್ಯುತ್‌ ಸ್ಥಾವರಗಳಿಂದ ಲಭ್ಯವಾಗುತ್ತಿದ್ದ ವಿದ್ಯುತ್‌ನಲ್ಲಿ ಸುಮಾರು 2630 ಮಿಲಿಯನ್‌ ಯೂನಿಟ್‌ನಷ್ಟು ಕೊರತೆ ಉಂಟಾಗಿದೆ. ಇದಲ್ಲದೆ ರಾಯಚೂರು ವಿದ್ಯುತ್‌ ಸ್ಥಾವರಿಂದ ಪೂರೈಕೆಯಾಗುತ್ತಿದ್ದ ವಿದ್ಯುತ್‌ ಪ್ರಮಾಣದಲ್ಲೂ ಗಣನೀಯ ಪ್ರಮಾಣದ ಇಳಿಕೆ ಉಂಟಾಗಿರುವುದರಿಂದ ಲೋಡ್‌ ಷೆಡ್ಡಿಂಗ್‌ ಅನಿವಾರ್ಯ ಎನ್ನುತ್ತವೆ ಕೆಪಿಟಿಸಿಎಲ್‌ ಮೂಲಗಳು.

ಕೆಪಿಟಿಸಿಎಲ್‌ ಅಧಿಕಾರಿಗಳು ಕೊನೆಯದಾಗಿ ಹೇಳುವ ಮಾತು- ವಿದ್ಯುತ್‌ ಉತ್ಪಾದನೆಯಲ್ಲಿ ಗಣನೀಯ ಏರಿಕೆ ಕಂಡುಬಂದು, ಪರಿಸ್ಥಿತಿ ಉತ್ತಮಗೊಂಡರೆ ಮಾತ್ರ ವಿದ್ಯುತ್‌ ಪೂರೈಕೆ ಸಹಜಸ್ಥಿತಿಗೆ ಮರಳಲಿದೆ. ಆ ದಿನ ಎಂದು ಬರುವುದೋ ಅನ್ನುವುದು ಮಾತ್ರ ಯಾರಿಗೂ ಗೊತ್ತಿಲ್ಲ .

(ಇನ್ಫೋ ವಾರ್ತೆ)