ಭಯೋತ್ಪಾದನೆ ತೊಡೆಯಲು ಅಮೆರಿಕಾಗೆ ನಿಸ್ವಾರ್ಥ ಸಹಕಾರ-ಮುಷರ್ರಫ್‌

ಇಸ್ಲಮಾಬಾದ್‌: ಭಯೋತ್ಪಾದಕತೆಯನ್ನು ನಿರ್ಮೂಲನೆಗೊಳಿಸಲು ಸಂಪೂರ್ಣ ಸಹಕಾರ ಕೊಡುವುದಾಗಿ ಅಮೆರಿಕದ ಅಧ್ಯಕ್ಷ ಜಾರ್ಜ್‌ ಬುಷ್‌ ಅವರಿಗೆ ಪಾಕಿಸ್ತಾನದ ಅಧ್ಯಕ್ಷ ಜನರಲ್‌ ಪರ್ವೇಜ್‌ ಮುಷರ್ರಫ್‌ ಗುರುವಾರ ಭರವಸೆ ನೀಡಿದ್ದಾರೆ. ಈ ಮುನ್ನ ಅಮೆರಿಕದ ಮೇಲೆ ದಾಳಿ ನಡೆಸಿದವರ ಬಗೆಗೆ ಮಾಹಿತಿ ನೀಡಲು ಪಾಕಿಸ್ತಾನದ ಸಹಕಾರ ಕೋರುವುದಾಗಿ ಬುಧವಾರ ರಾತ್ರಿ ಅಮೆರಿಕದ ಗೃಹ ಸಚಿವ ಕಾಲಿನ್‌ ಪೊವೆಲ್‌ ಹೇಳಿದ್ದರು.

ಜಗತ್ತನ್ನು ಭಯೋತ್ಪಾದಕತೆ ಪಿಡುಗಾಗಿ ಕಾಡುತ್ತಿದೆ. ಈ ಪಿಡುಗನ್ನು ತೊಡೆದುಹಾಕಲು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪ್ರಯತ್ನಗಳು ನಡೆಯಬೇಕು, ಎಲ್ಲ ದೇಶಗಳು ಕೈಗೂಡಿಸಬೇಕು ಎಂದು ಮುಷರ್ರಫ್‌ ತಮ್ಮ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಪಾಕಿಸ್ತಾನ ಭಯೋತ್ಪಾದಕತೆಯನ್ನು ಉಗ್ರವಾಗಿ ಖಂಡಿಸುತ್ತಿದ್ದು , ಅಮೆರಿಕ ಅಧ್ಯಕ್ಷರಿಗೆ ಭಯೋತ್ಪಾದಕತೆ ನಿರ್ಮೂಲನಗೊಳಿಸಲು ನಿಸ್ವಾರ್ಥ ಸಹಕಾರ ನೀಡುವುದಾಗಿ ಮುಷರ್ರಫ್‌ ಹೇಳಿದರು.

(ಪಿಟಿಐ)