ಶೃಂಗೇರಿ ಮಠದ ಬಳಿ ಹಿರಿಯ ನಾಗರಿಕರಿಗಾಗಿ‘ಭಾರತಿ ಸೇವಾ ಸದನ’

ಬೆಂಗಳೂರು : ಹಿರಿಯ ನಾಗರಿಕರಿಗಾಗಿ ಭಾರತಿ ಸೇವಾ ಸದನ ಎಂಬ ವೃದ್ಧಾಶ್ರಮ ಮುಂದಿನ ತಿಂಗಳಿನಿಂದ ಶೃಂಗೇರಿ ಮಠದ ಬಳಿ ಆರಂಭವಾಗಲಿದೆ.

ಶೃಂಗೇರಿ ಶಾರದಾಂಬೆ ದೇವಸ್ಥಾನದಿಂದ ಮೂರು ಕಿಲೋ ಮೀಟರ್‌ ದೂರದಲ್ಲಿರುವ ಈ ವೃದ್ಧಾಶ್ರಮ, ಸದ್ಯಕ್ಕೆ 32 ಮಂದಿಯನ್ನು ಭರಿಸುವ ಸಾಮರ್ಥ್ಯ ಹೊಂದಿದೆ. ಪ್ರಾರ್ಥನಾ ಮಂದಿರ, ಹೂದೋಟ, ಗ್ರಂಥಾಲಯ, ಯೋಗ ಮತ್ತು ಧ್ಯಾನಕ್ಕೆ ಬೇಕಾದ ಸೌಕರ್ಯಗಳು, ಒಳಾಂಗಣ ಮತ್ತು ಹೊರಾಂಗಣ ಕ್ರೀಡಾಂಗಣ ವ್ಯವಸ್ಥೆ ವೃದ್ಧಾಶ್ರಮದಲ್ಲಿದೆ.

ಪ್ರತ್ಯೇಕ ಕೋಣೆಗಳಲ್ಲಿ ಟೀವಿ ಮತ್ತು ಸ್ನಾನದ ಮನೆ ಇರುತ್ತದೆ. ಶೃಂಗೇರಿ ಸ್ವಾಮೀಜಿಗಳ ಧನ್ವಂತರಿ ಆಸ್ಪತ್ರೆಯ ಸಹಯೋಗದೊಂದಿಗೆ ಸಣ್ಣ ಕ್ಲಿನಿಕ್‌ ಕೂಡ ಆಶ್ರಮದ ಬಳಿಯಿದೆ. ತಿಂಗಳಿಗೆ ಎರಡು ಸಾವಿರ ರೂಪಾಯಿ ಶುಲ್ಕ ನೀಡಬೇಕಾಗುತ್ತದೆ. 2 ಲಕ್ಷ ರೂಪಾಯಿ ದೇಣಿಗೆ ನೀಡುವವರಿಗೆ ಆಶ್ರಮದಲ್ಲಿ ಮಾಸಿಕ ಶುಲ್ಕವಿರುವುದಿಲ್ಲ.

ಸದ್ಯದಲ್ಲಿಯೇ ಆಶ್ರಮವನ್ನು ವಿಸ್ತರಿಸಿ 96 ಮಂದಿ ಹಿರಿಯ ನಾಗರಿಕರನ್ನು ಸೇರಿಸಿಕೊಳ್ಳುವ ವ್ಯವಸ್ಥೆ ಮಾಡಲಾಗುವುದು. ಅಲ್ಲದೆ ಬೆಂಗಳೂರು ನಗರ ಮತ್ತು ಮಹಾರಾಷ್ಟ್ರದಲ್ಲಿಯೂ ಇಂತಹ ಆಶ್ರಮಗಳನ್ನು ತೆರೆಯುವ ಯೋಜನೆಯಿದೆ ಎಂದು ಆಶ್ರಮದ ಟ್ರಸ್ಟೀ ಎಂ. ಎಸ್‌.ಪೈ ಪ್ರಕಟಣೆಯಲ್ಲಿ ಹೇಳಿದ್ದಾರೆ.

(ಇನ್ಫೋ ವಾರ್ತೆ)