ಶೀಘ್ರವೇ ಖಾಸಗಿ ಎಫ್.ಎಂ.ನಲ್ಲಿ ಮೊಳಗಲಿವೆ ಕನ್ನಡ ಗೀತೆಗಳು
ಬೆಂಗಳೂರು : ರಾಷ್ಟ್ರದ ಪ್ರಪ್ರಥಮ ಖಾಸಗಿ ರೇಡಿಯೋ ಚಾನೆಲ್ ಶನಿವಾರ ಕನ್ನಡದ ಹೆಸರಾಂತ ನಾಯಕ ನಟ ಶಿವರಾಜ್ಕುಮಾರ್ ಅವರ ಸಂದರ್ಶನ ಕಾರ್ಯಕ್ರಮವನ್ನು ಪ್ರಸಾರ ಮಾಡುತ್ತಿದೆ. ಈ ಮೂಲಕ ಕನ್ನಡ ಕಾರ್ಯಕ್ರಮ ಪ್ರಸಾರಕ್ಕೆ ಅದು ಚಾಲನೆ ನೀಡಲಿದೆ.
ಕೆಲವೇ ದಿನಗಳಲ್ಲಿ ಕನ್ನಡ ಚಿತ್ರಗೀತೆಗಳು, ಸಂಗೀತ, ಭಾವಗೀತೆಗಳು ಸಹ ರೇಡಿಯೋ ಸಿಟಿಯಲ್ಲಿ ಮೊಳಗಲಿವೆ. ಕನ್ನಡ ಕಾರ್ಯಕ್ರಮಗಳನ್ನು ಬಿತ್ತರಿಸಲು ಪ್ರಯತ್ನ ನಡೆಸುತ್ತಿರುವುದಾಗಿ ಸ್ಟಾರ್ ರೇಡಿಯೋ ಸಿಟಿಯ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಜಾನ್ ಕ್ಯಾಟ್ಲೆಟ್ ಹಾಗೂ ಕಾರ್ಯಕ್ರಮ ನಿರ್ದೇಶಕ ವೇಲು ಶಂಕರ್ ಪ್ರತಿಕಾಗೋಷ್ಠಿಯಲ್ಲಿ ತಿಳಿಸಿದರು.
ಪ್ರಸ್ತುತ ದಿನದ 24 ಗಂಟೆಗಳ ಕಾಲವೂ ಹಿಂದಿ ಹಾಗೂ ಇಂಗ್ಲಿಷ್ ಸಂಗೀತ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುವ ರೇಡಿಯೋ ಸಿಟಿ ಕನ್ನಡಕ್ಕಾಗಿ ದಿನದಲ್ಲಿ ಇಂತಿಷ್ಟು ಸಮಯ ಎಂದು ನಿಗದಿ ಮಾಡಿಲ್ಲ ಎಂದು ಅವರು ಹೇಳಿದರು. ಕನ್ನಡ ಸಂಗೀತ ಪ್ರಸಾರ ಮಾಡಲು ಆಡಿಯೋ ಕ್ಯಾಸೆಟ್ ಕಂಪನಿಗಳ ಜತೆ ಕಾಪಿರೈಟ್ಗೆ ಸಂಬಂಧಿಸಿದಂತೆ ಮಾತುಕತೆ ನಡೆಸುತ್ತಿರುವುದಾಗಿಯೂ ಹೇಳಿದರು.
ರೇಡಿಯೋ ಸಿಟಿ 91 ಎಫ್.ಎಂ.ನಲ್ಲಿ ಹೊಸ ಕನ್ನಡ ಚಿತ್ರಗೀತೆಗಳು ಪ್ರಸಾರವಾದರೆ, ಸೀಮಿತ ಮಾರುಕಟ್ಟೆಯ ಕಾರಣ ತಮ್ಮ ಕ್ಯಾಸೆಟ್ ಹಾಗೂ ಸಿ.ಡಿ.ಗಳು ಮಾರಾಟವಾಗುವುದು ಕಷ್ಟ ಎಂದು ಆಡಿಯೋ ಕ್ಯಾಸೆಟ್ ಕಂಪನಿಗಳು ಹಿಂಜರಿಯುತ್ತಿವೆ. ಹೀಗಾಗಿ ಇಲ್ಲಿ ತಾಂತ್ರಿಕ ತೊಂದರೆ ಎದುರಾಗಿದೆ ಎಂದರು.