ಶೀಘ್ರವೇ ನೀವು ಇಂಟರ್‌ನೆಟ್‌ ಮೂಲಕ ವಿಮಾ ಕಂತು ಕಟ್ಟಬಹುದು

ಬೆಂಗಳೂರು : ಜೀವವಿಮಾ ಪಾಲಿಸಿದಾರರಿಗೆ, ಇಂಟರ್‌ನೆಟ್‌ ಮೂಲಕ ಪ್ರೀಮಿಯಂ ಹಣವನ್ನು ಪಾವತಿ ಮಾಡಲು ಅತಿ ಶೀಘ್ರದಲ್ಲೇ ಅವಕಾಶ ಕಲ್ಪಿಸಲಾಗುವುದು ಎಂದು ಜೀವ ವಿಮಾ ನಿಗಮದ ರಾಷ್ಟ್ರೀಯ ಅಧ್ಯಕ್ಷ ಜಿ.ಎನ್‌. ಬಾಜಪೈ ಸೋಮವಾರ ತಿಳಿಸಿದ್ದಾರೆ.

ಕರ್ನಾಟಕ ವಾಣಿಜ್ಯ ಮತ್ತು ಕೈಗಾರಿಕೆಗಳ ಮಹಾಮಂಡಳದಲ್ಲಿ ವಾಣಿಜ್ಯೋದ್ಯಮಿಗಳ್ನು ಉದ್ದೇಶಿಸಿ ಮಾತನಾಡುತ್ತಿದ್ದ ಅವರು, ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಬರುವ ಸವಾಲುಗಳನ್ನು ಎದುರಿಸಲು ನಿಗಮ ಸಿದ್ಧವಾಗಿದೆ. ಗ್ರಾಹಕರ ಅನುಕೂಲಕ್ಕಾಗಿ ಹೊಸ ಹಾಗೂ ಅತ್ಯಾಧುನಿಕ ಸೌಲಭ್ಯ ಒದಗಿಸಲು ಮುಂದಾಗಿದೆ ಎಂದರು.

ಪ್ರಸಕ್ತ ಸನ್ನಿವೇಶದಲ್ಲಿ ನಿಗಮಕ್ಕೆ ತಾಂತ್ರಿಕತೆಯ ಕೊರತೆ ಇದೆ. ಹಾಲಿ 41 ನಗರಗಳಲ್ಲಿನ ವಿಮಾ ಕಚೇರಿಗಳಿಗೆ ಇಂಟರ್‌ನೆಟ್‌ ಸಂಪರ್ಕ ಕಲ್ಪಿಸಲಾಗಿದ್ದು, ಇನ್ನು ಒಂದು ವರ್ಷದೊಳಗೆ 100 ನಗರಗಳಿಗೆ ಈ ವ್ಯವಸ್ಥೆ ವಿಸ್ತರಿಸುವ ಗುರಿ ಹೊಂದಲಾಗಿದೆ ಎಂದರು.

ಪ್ರಸ್ತುತ ಜೀವ ವಿಮಾ ನಿಗಮವು 12 ಕೋಟಿ ಪಾಲಿಸಿದಾರರನ್ನು ಹೊಂದಿದೆ. 500 ತರಬೇತಿ ಕೇಂದ್ರಗಳನ್ನು ರಾಷ್ಟ್ರಾದ್ಯಂತ ಸ್ಥಾಪಿಸಲಾಗಿದೆ. ಅಧಿಕಾರಿಗಳ ವೃತ್ತಿ ಕೌಶಲ ಹೆಚ್ಚಿಸಲು ಹೈದರಾಬಾದ್‌ ಮೂಲದ ಅಂತಾರಾಷ್ಟ್ರೀಯ ವಾಣಿಜ್ಯ ಅಧ್ಯಯನ ಶಾಲೆಯಾಂದಿಗೆ ಒಪ್ಪಂದ ಮಾಡಿಕೊಳ್ಳುವ ಯೋಜನೆ ರೂಪಿಸಲಾಗುತ್ತಿದೆ.

ನಿಗಮದಿಂದ ಸಾರ್ವಜನಿಕ ವಲಯಗಳಿಗೆ 140 ಲಕ್ಷ ಕೋಟಿ ರುಪಾಯಿ, ಸಹಕಾರಿ ವಲಯಕ್ಕೆ 216 ಲಕ್ಷ ಕೋಟಿ ರುಪಾಯಿ ಹಾಗೂ ಗೃಹ ನಿರ್ಮಾಣ ಕ್ಷೇತ್ರಕ್ಕೆ 15 ಸಾವಿರ ಕೋಟಿ ರುಪಾಯಿ, ಸಾರಿಗೆ ಮತ್ತಿತರ ವಲಯಗಳಿಗೆ ಮೂರು ಸಾವಿರ ಕೋಟಿ ರುಪಾಯಿ ಒದಗಿಸಲಾಗಿದೆ ಎಂದು ಅವರು ಹೇಳಿದರು.