ನೀರಾವರಿ, ವಿದ್ಯುತ್‌, ಆರೋಗ್ಯ.. ಕ್ಷೇತ್ರಗಳ ಸಹಾಯಧನಕ್ಕೆ ಕೃಷ್ಣಚಕ್ರ

ಬೆಂಗಳೂರು : ನೀರಾವರಿ, ವಿದ್ಯುತ್‌, ಆರೋಗ್ಯ ಮುಂತಾದ ಕ್ಷೇತ್ರಗಳ ಸಹಾಯಧನಕ್ಕೆ ಕತ್ತರಿ ಪ್ರಯೋಗ ಮಾಡುವ ಮೂಲಕ ರಾಜ್ಯ ಹಣಕಾಸು ಸ್ಥಿತಿಯನ್ನು ಸುಧಾರಿಸಲು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಉದ್ದೇಶಿಸಿದ್ದಾರೆ.

ಮಂಗಳವಾರ ವಿಧಾನಸಭೆಯಲ್ಲಿ ಮಾತನಾಡುತ್ತಿದ್ದ ಮುಖ್ಯಮಂತ್ರಿಗಳು ರಾಜ್ಯದ ಆರ್ಥಿಕ ಪರಿಸ್ಥಿತಿಯನ್ನು ಸುಧಾರಿಸಲು ಸರ್ಕಾರ ಕಾರ್ಯೋನ್ಮುಖವಾಗಿದೆ ಎಂದು ಘೋಷಿಸಿದರು. ಮುಂದಿನ 4 ವರ್ಷಗಳ ಅವಧಿಯಲ್ಲಿ ಪಡೆಯಬೇಕಾಗಿರುವ ಸಾಲ, ತೀರಿಸಬೇಕಾದ ಬಡ್ಡಿ ಹಾಗೂ ಸಂಪನ್ಮೂಲ ಕ್ರೋಢೀಕರಣ ಅರಿತು ತನ್ನ ಮುಂದಿನ ಹೆಜ್ಜೆಗಳನ್ನು ಸರ್ಕಾರ ನಿರ್ಣಯಿಸಲಿದೆ ಎಂದ ಅವರು, ಸದನದಲ್ಲಿ ಮಧ್ಯಮಾವಧಿ ಆರ್ಥಿಕ ಯೋಜನೆ (2000-2001 ರಿಂದ 2004-05) ಮಂಡಿಸಿದರು.

ಪ್ರತಿಪಕ್ಷದ ನಾಯಕ ಜಗದೀಶ್‌ ಶೆಟ್ಟರ್‌ ಅವರ ಪ್ರಶ್ನೆಗೆ ಉತ್ತರಿಸುತ್ತಿದ್ದ ಅವರು, ರಾಜ್ಯದ ಆರ್ಥಿಕ ಪರಿಸ್ಥಿತಿ ಸುಧಾರಣೆಗೆ ಸರ್ಕಾರ ಕಠಿಣ ಕ್ರಮಗಳನ್ನು ಕೈಗೊಳ್ಳುವ ಇಂಗಿತ ವ್ಯಕ್ತಪಡಿಸಿದರು. ಕೃಷ್ಣ ಅವರು ಪ್ರಕಟಿಸಿದಂತೆ ಹಣಕಾಸು ಸ್ಥಿತಿ ಸುಧಾರಣೆಗೆ ಸರ್ಕಾರ ಉದ್ದೇಶಿಸಿರುವ ಕ್ರಮಗಳೆಂದರೆ-

• ಸಾಲದ ಮೊತ್ತದ ಸ್ಥಿರೀಕರಣ ಹಾಗೂ ನಿರಂತರವಾಗಿ ಏರುತ್ತಿರುವ ಬಡ್ಡಿಗೆ ಕಡಿವಾಣ.
• ತೆರಿಗೆ ಪದ್ಧತಿಯಲ್ಲಿ ಮತ್ತಷ್ಟು ಸುಧಾರಣೆ.
• ನೀರಾವರಿ, ವಿದ್ಯುತ್‌, ಆರೋಗ್ಯ ವಲಯಗಳಿಗೆ ನೀಡುತ್ತಿರುವ ಸಹಾಯಧನದಲ್ಲಿ ಕಡಿತ.
• ತೆರವಾಗುವ ಹುದ್ದೆಗಳಿಗೆ ಮರು ನೇಮಕದ ಸಂಖ್ಯೆಯಲ್ಲಿ ಕಡಿತ. ಮುಂದಿನ 4 ವರ್ಷಗಳಲ್ಲಿ ನಿವೃತ್ತಿಯಿಂದ ತೆರವಾಗುವ ಹುದ್ದೆಗಳಲ್ಲಿ ಪ್ರತಿ ವರ್ಷ ಮೂರನೇ ಒಂದು ಭಾಗದಷ್ಟು ಹುದ್ದೆಗಳನ್ನು ರದ್ದು ಪಡಿಸಲಾಗುವುದು. ಇದರಿಂದಾಗಿ 2004 ರ ವೇಳೆಗೆ ಸರ್ಕಾರಿ ಸಿಬ್ಬಂದಿಯಲ್ಲಿ ಶೇ.12 ರಷ್ಟು ಕಡಿತವಾಗಲಿದೆ. ಆದರೆ, ಶಿಕ್ಷಣ, ಆರೋಗ್ಯ, ಪೊಲೀಸ್‌, ಅರಣ್ಯ ಮತ್ತು ವನ್ಯಜೀವಿ ಇಲಾಖೆಗಳ ನೇಮಕಾತಿಯಲ್ಲಿ ಯಾವುದೇ ಕಡಿತವಿಲ್ಲ .
• ಬಡತನ ರೇಖೆಗಿಂತ ಕೆಳಗಿರುವ ಜನರಿಗೆ ಮಾತ್ರ ಆಹಾರ ಸಹಾಯಧನ ನಿಗದಿ.

1998 ರಿಂದ ಈವರೆಗೆ ಸರ್ಕಾರ ಪಡೆದ ವಿದೇಶಿ ಸಾಲದ ವಿವರಗಳನ್ನು ಮುಖ್ಯಮಂತ್ರಿ ಸದನದ ಗಮನಕ್ಕೆ ತಂದರು.
1998-99 ರಲ್ಲಿ 313.60 ಕೋಟಿ ರು.
1999-2000 ರಲ್ಲಿ 460.65 ಕೋಟಿ ರು.
2000-2001 : 568.98 ಕೋಟಿ ರು.
ಮುಂದಿನ 4 ವರ್ಷಗಳಲ್ಲಿ ವಿಶ್ವಬ್ಯಾಂಕ್‌ 8800 ಕೋಟಿ ರು. ನೆರವು ನೀಡಲಿದೆ.

ಕಳೆದ ಮಾರ್ಚ್‌ ಅಂತ್ಯದವರೆಗೆ ಸರ್ಕಾರ ವಿವಿಧ ಮೂಲಗಳಿಂದ 18,090.53 ಕೋಟಿ ರುಪಾಯಿಗಳ ಸಾಲ ಸಂಗ್ರಹಿಸಿದ್ದು , ಪಡೆದಿರುವ ಸಾಲಕ್ಕೆ 1981.60 ಕೋಟಿ ರು. ಬಡ್ಡಿಯನ್ನು ಪಾವತಿಸಿದೆ ಎಂದು ಕೃಷ್ಣ ಹೇಳಿದರು.

(ಇನ್ಫೋ ವಾರ್ತೆ)