ಸೆಮ್ಮಂಗುಡಿ ಅವರಿಗೆ ಲಕ್ಷ್ಮೀನಾರಾಯಣ ಅಂತರರಾಷ್ಟ್ರೀಯ ಪ್ರಶಸ್ತಿ

ಬೆಂಗಳೂರು : ಸಂಗೀತ ಕ್ಷೇತ್ರದ ಸಾಧನೆಗಾಗಿ ನೀಡುತ್ತಿರುವ ಲಕ್ಷ್ಮೀನಾರಾಯಣ ಅಂತರರಾಷ್ಟ್ರೀಯ ಪ್ರಶಸ್ತಿಗೆ ಈ ಬಾರಿ ಸೆಮ್ಮಂಗುಡಿ ಶ್ರೀನಿವಾಸ ಅಯ್ಯರ್‌ ಭಾಜನರಾಗಿದ್ದಾರೆ.

ಕರ್ನಾಟಕ ಶಾಸ್ತ್ರೀಯ ಶೈಲಿಯ ಪಿಟೀಲು ವಾದಕ ಡಾ.ಎಲ್‌.ಸುಬ್ರಹ್ಮಣ್ಯಂ ಹಾಗೂ ಅವರ ಪತ್ನಿ ಹಿನ್ನೆಲೆಗಾಯಕಿ ಕವಿತಾ ಸುಬ್ರಹ್ಮಣ್ಯಂ ಇತ್ತೀಚೆಗೆ ಸೆಮ್ಮಂಗುಡಿ ಅವರಿಗೆ ಈ ಪ್ರಶಸ್ತಿ ಪ್ರದಾನ ಮಾಡಿ ಗೌರವಿಸಿದರು. ನಗದು ಹಾಗೂ ನೆನಪಿನ ಕಾಣಿಕೆಯನ್ನು ಪ್ರಶಸ್ತಿ ಒಳಗೊಂಡಿದೆ.

ಸುಬ್ರ-ಹ್ಮಣ್ಯಂ ಅವರ ತಂದೆ ಪ್ರೊ.ಎಲ್‌.ಲಕ್ಷ್ಮೀನಾರಾಯಣ ಅವರ ಸ್ಮರಣಾರ್ಥ ನೀಡಲಾಗುವ ಈ ಪ್ರಶಸ್ತಿಯನ್ನು ವಿಜಿ ಗ್ಲೋಬಲ್‌ ಆರ್ಟ್ಸ್‌ ಕೊಡುಗೆಯಾಗಿ ನೀಡಿದೆ. ವಿಶ್ವಾದ್ಯಂತ ಲಕ್ಷ್ಮೀನಾರಾಯಣ ಗ್ಲೋಬಲ್‌ ಮ್ಯೂಸಿಕ್‌ ಫೆಸ್ಟಿವಲ್‌ ಸಂಯೋಜನೆ ಮಾಡುತ್ತಿದೆ ವಿಜಿ ಗ್ಲೋಬಲ್‌ ಆರ್ಟ್ಸ್‌.

ಭಾರತ ಸ್ವಾತಂತ್ರ್ಯ ಸುವರ್ಣ ಮಹೋತ್ಸವವಾದ 1997ರಲ್ಲಿ ಮೊದಲ ಲಕ್ಷ್ಮೀನಾರಾಯಣ ಅಂತರರಾಷ್ಟ್ರೀಯ ಪ್ರಶಸ್ತಿಯನ್ನು ಲಾರ್ಡ್‌ ಯಹೂದಿ ಮೆನನ್‌ ಅವರಿಗೆ ರಾಷ್ಟ್ರಪತಿ ಕೆ.ಆರ್‌.ನಾರಾಯಣ್‌ ಪ್ರದಾನ ಮಾಡಿದ್ದರು. ನಂತರ ಇದೇ ಪ್ರಶಸ್ತಿಗೆ ಪಂಡಿತ್‌ ವಿ.ಜಿ.ಜೋಗ್‌ ಭಾಜನರಾಗಿದ್ದರು.

ಲಕ್ಷ್ಮೀನಾರಾಯಣ ಗ್ಲೋಬಲ್‌ ಮ್ಯೂಸಿಕ್‌ ಫೆಸ್ಟಿವಲ್‌ನಲ್ಲಿ ಹಾಲಿವುಡ್‌ ಸೂಪರ್‌ಸ್ಟಾರ್‌ ಸ್ಟೀವನ್‌ ಸೀಗಲ್‌ ಗಿಟಾರ್‌ ನುಡಿಸಿದ್ದಾರೆ. ಲಾರ್ಡ್‌ ಯಹೂದಿ ಮೆನನ್‌, ಉಸ್ತಾದ್‌ ಬಿಸ್ಮಿಲ್ಲಾ ಖಾನ್‌, ಇಸ್ತಾದ್‌ ಅಲ್ಲಾ ರಖಾ, ಪಂಡಿತ್‌ ಕಿಶನ್‌ ಮಹಾರಾಜ್‌ ಮೊದಲಾದ ಸಂಗೀತ ದಿಗ್ಗಜರು ಇದರಲ್ಲಿ ಭಾಗವಹಿಸಿದ್ದಾರೆ.

(ಇನ್ಫೋ ವಾರ್ತೆ)