ಅಮೇರಿಕಾ ಆರ್ಥಿಕ ಕುಸಿತದ ಲಾಭ ಪಡೆಯಲು ಎಸ್‌.ಎಂ. ಕೃಷ್ಣ ಕರೆ

ಬೆಂಗಳೂರು : ಅಮೇರಿಕಾ ಆರ್ಥಿಕ ಕುಸಿತವನ್ನು ರಾಜ್ಯದ ಮಾಹಿತಿ ತಂತ್ರಜ್ಞಾನದ ಕಂಪನಿಗಳು ಲಾಭವನ್ನಾಗಿ ಪರಿವರ್ತಿಸಿಕೊಳ್ಳಲು ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಕರೆ ಕೊಟ್ಟಿದ್ದಾರೆ.

ಬೆಂಗಳೂರು- ಮೈಸೂರು ರಸ್ತೆಯ ಗ್ಲೋಬಲ್‌ ವಿಲೇಜ್‌ನಲ್ಲಿ ಗುರುವಾರ ಕ್ಷೇಮ ಟೆಕ್ನಾಲಜಿ ಪಾರ್ಕ್‌ ಉದ್ಘಾಟಿಸಿ ಮಾತನಾಡುತ್ತಿದ್ದ ಕೃಷ್ಣ , ರಾಜ್ಯದ ಐಟಿ ಕಂಪನಿಗಳು ಹೊಸ ಸವಾಲನ್ನು ಅರಗಿಸಿಕೊಂಡು ಮುನ್ನಡೆಯಬೇಕಾಗಿದೆ ಎಂದರು. ಅಮೇರಿಕಾದ ಆರ್ಥಿಕ ಕುಸಿತದ ಲಾಭವನ್ನು ನಾವು ಬಳಸಿಕೊಳ್ಳಲೇಬೇಕು. ಐಟಿ ಕ್ಷೇತ್ರದಲ್ಲಿ ರಾಜ್ಯದ ಕಂಪನಿಗಳು ವಿಶ್ವ ಮಟ್ಟದಲ್ಲಿ ಸ್ಥಾನ ಪಡೆಯಬೇಕು ಎಂದು ಅವರು ಹೇಳಿದರು.

ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಬೆಂಗಳೂರು ಅತೀವ ಪ್ರಗತಿ ಸಾಧಿಸಿದ್ದು , ದೇಶದೊಳಗೆ ಮಾತ್ರವಲ್ಲದೆ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಐಟಿ ಕ್ಷೇತ್ರದಲ್ಲಿ ಹೆಚ್ಚುಗಾರಿಕೆ ಹೊಂದಿರುವುದಾಗಿ ಕೃಷ್ಣ ಸಂತೋಷಿಸಿದರು. ಇತ್ತೀಚಿನ ಸಮೀಕ್ಷೆಯಾಂದು ನ್ಯೂಯಾರ್ಕ್‌ಗಿಂತ ಬೆಂಗಳೂರು ಐಟಿ ಕ್ಷೇತ್ರದಲ್ಲಿ ಮುಂದಿದೆ ಎಂದು ತಿಳಿಸಿರುವುದನ್ನು ಹಾಗೂ ಐಟಿ ಕ್ಷೇತ್ರದಲ್ಲಿ ಬೆಂಗಳೂರಿನ ಬೆಳವಣಿಗೆಯನ್ನು ವಿಶ್ವಸಂಸ್ಥೆ ಗುರ್ತಿಸಿರುವುದನ್ನು ಮುಖ್ಯಮಂತ್ರಿ ನೆನಪಿಸಿಕೊಂಡರು. ಈ ಹೆಗ್ಗಳಿಕೆಯನ್ನು ನಾವು ಉಳಿಸಿಕೊಳ್ಳಬೇಕಾಗಿದೆ ಎಂದು ಅವರು ಹೇಳಿದರು.

ರೈತರ ಹಕ್ಕುಪತ್ರಗಳ ಕಂಪ್ಯೂಟರೀಕರಣ
ಮಾರ್ಚ್‌ 2002 ರೊಳಗೆ ರಾಜ್ಯದ ಎಲ್ಲ 175 ತಾಲ್ಲೂಕುಗಳ ರೈತರ ಜಮೀನಿಗೆ ಸಂಬಂಧಿಸಿದ ಹಕ್ಕುಪತ್ರಗಳನ್ನು ಕಂಪ್ಯೂಟರೀಕರಣಗೊಳಿಸಲಾಗುವುದು ಎಂದು ಕೃಷ್ಣ ಪ್ರಕಟಿಸಿದರು.

ನಾಡ ಕಚೇರಿಯಿಂದ ಜಿಲ್ಲಾಧಿಕಾರಿಗಳ ಕಚೇರಿವರೆಗೆ ಅರ್ಜಿ ಸಲ್ಲಿಸಿ ನಮ್ಮ ರೈತಾಪಿ ಜನರ ಕೈಗಳು ಬಿದ್ದು ಹೋಗಿವೆ ಎಂದು ತೀವ್ರ ವಿಷಾದದಿಂದ ಹೇಳಿದ ಅವರು, ಇನ್ನು ಮುಂದೆ ಅರ್ಜಿ ಸಲ್ಲಿಸಿ ಕಾಯುವ ಗೋಳು ರೈತರಿಗೆ ಇರುವುದಿಲ್ಲ ಎಂದರು.

(ಇನ್ಫೋ ವಾರ್ತೆ)