ವಿಗ್ರಹಚೋರರ ಸೆರೆ, 5 ಕೋಟಿ ರು. ಬೆಲೆಯ ವಿಗ್ರಹಗಳ ವಶ

ಬೆಂಗಳೂರು : ನಗರದ ಪೊಲೀಸರು ಮತ್ತೊಮ್ಮೆ ತಮ್ಮ ಶೌರ್ಯ- ಸಾಮರ್ಥ್ಯವನ್ನು ಸಂದೇಹಕ್ಕೆಡೆಯಿಲ್ಲದಂತೆ ನಿರೂಪಿಸಿದ್ದಾರೆ. ಅವರ ಸಾಮರ್ಥ್ಯಕ್ಕೆ ನಮಸ್ಕಾರ! ವಿಷಯ ಇಷ್ಟು -
ನಾಲ್ವರು ಕುಖ್ಯಾತ ವಿಗ್ರಹ ಚೋರರನ್ನು ಬಂಧಿಸಿರುವ ನಗರ ಅಪರಾಧ ದಳದ ಪೊಲೀಸರು, ಆರೋಪಿಗಳಿಂದ ಸುಮಾರು 5 ಕೋಟಿ ರುಪಾಯಿಗೂ ಹೆಚ್ಚು ಮೌಲ್ಯದ 5 ಪಂಚಲೋಹ ವಿಗ್ರಹಗಳನ್ನು ವಶಪಡಿಸಿಕೊಂಡಿದ್ದಾರೆ.

ಜೆ.ಪಿ. ನಗರ 8 ನೇ ಘಟ್ಟದ ನಿವಾಸಿಗಳಾದ ನರಸಿಂಹರಾಜ (33) ಹಾಗೂ ಡಿ. ಮೂರ್ತಿ (28) ಮತ್ತು ಗೌರಿಬಿದನೂರಿನವರಾದ ಜೆ.ಎನ್‌. ಶಂಕರರಾವ್‌ (38) ಹಾಗೂ ಸಿ. ಕೃಷ್ಣಪ್ಪ (38) ಅವರು ಪೊಲೀಸರಿಗೆ ಸಿಕ್ಕಿಬಿದ್ದಿರುವ ವಿಗ್ರಹ ಚೋರರು. ಈ ವಿಷಯವನ್ನು ನಗರ ಪೊಲೀಸ್‌ ಕಮೀಷನರ್‌ ಟಿ. ಮಡಿಯಾಳ್‌ ಬುಧವಾರ ಸುದ್ದಿಗಾರರಿಗೆ ತಿಳಿಸಿದರು.

ವಿಗ್ರಹಗಳು 1 ಸಾವಿರದ 400 ವರ್ಷಗಳಿಗಿಂತಲೂ ಹೆಚ್ಚು ಪ್ರಾಚೀನತೆ ಹೊಂದಿವೆ ಎಂದು ನಂಬಲಾಗಿದೆ. ಚಂದ್ರ ಮೌಳೇಶ್ವರ, ಲಕ್ಷ್ಮಿ, ಸತ್ಯ ನಾರಾಯಣ ಸ್ವಾಮಿ ಹಾಗೂ ಪಂಚಮುಖಿ ಗಣಪತಿಗಳ ಪಂಚಲೋಹದ ವಿಗ್ರಹಗಳನ್ನು ಆರೋಪಿಗಳಿಂದ ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಜುಲೈ 3 ರಂದು ನರಸಿಂಹಮೂರ್ತಿ ಹಾಗೂ ಶಂಕರ ರಾವ್‌ ಅವರನ್ನು ಕಾಟನ್‌ ಪೇಟೆಯಲ್ಲಿ ಬಂಧಿಸಿ, ಅವರಿಂದ ದೊರೆತ ಸುಳಿವಿನ ಮೂಲಕ ಉಳಿದಿಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ.

(ಇನ್ಫೋ ವಾರ್ತೆ)