ಬಳ್ಳಾರಿಯ ಎಂಎಸ್‌ಪಿಎಲ್‌ ಘಟಕಕ್ಕೆ ಪರಿಸರ ಪ್ರಶಸ್ತಿ

ಬಳ್ಳಾರಿ: ರಾಜ್ಯದ ಅತೀ ದೊಡ್ಡ ಕಬ್ಬಿಣ ಅದಿರು ರಫ್ತು ಘಟಕ ಎನಿಸಿಕೊಂಡಿರುವ ಎಂಎಸ್‌ಪಿಎಲ್‌ ಲಿಮಿಟೆಡ್‌ ಈ ಸಾಲಿನ ಅಭೇರಾಜ್‌ ಬಾಲದೋಟ ಪರಿಸರ ಪ್ರಶಸ್ತಿ ದೊರೆತಿದೆ.

ದೇಶದಲ್ಲಿ ಗಣಿಗಾರಿಕೆ ಮತ್ತು ಮಾರುಕಟ್ಟೆ ಕ್ಷೇತ್ರದಲ್ಲಿ ಐಎಸ್‌ಒ 9001 ಸರ್ಟಿಫಿಕೇಟ್‌ ಪಡೆದಿರುವ ಪ್ರಥಮ ಕಂಪೆನಿ ಎಂಬ ಹೆಗ್ಗಳಿಕೆಗೆ ಈ ಕಂಪೆನಿ ಪಾತ್ರವಾಗಿದೆ. ಅಭೇರಾಜ್‌ ಪ್ರಶಸ್ತಿಯು ಪ್ರತಿ ವರ್ಷ ಪರಿಸರದ ಬಗ್ಗೆ ಕಾಳಜಿ ಇರುವ ಅದಿರು ಗಣಿಗಾರಿಕಾ ಕಂಪೆನಿಗಳಿಗೆ ನೀಡಲಾಗುತ್ತಿದ್ದು, ಈ ಬಾರಿ ಎಂಎಸ್‌ಪಿಎಲ್‌ ಪ್ರಶಸ್ತಿಗೆ ಪಾತ್ರವಾಗಿದೆ.

ಹೊಸಪೇಟೆಯಲ್ಲಿರುವ ಈ ಅದಿರು ಕಂಪೆನಿಯು ವರ್ಷ ಕ್ಕೆ 2 ಮಿಲಿಯನ್‌ ಟನ್‌ ಕಬ್ಬಿಣದ ಅದಿರು ಉತ್ಪಾದಿಸುತ್ತದೆ. ಕಂಪೆನಿ ಆಧುನಿಕ ಗಣಿಗಾರಿಕಾ ಪದ್ಧತಿಯನ್ನು ಅಳವಡಿಸಿಕೊಂಡಿದ್ದು, 1990-91ನೇ ಸಾಲಿನಲ್ಲಿಯೂ ಅಭೇ ರಾಜ್‌ ಬಾಲದೋಟಾ ಪ್ರಶಸ್ತಿ ಪಡೆದಿತ್ತು.

ಹೊಸಪೇಟೆಯಲ್ಲಿ ಕಳೆದ ಐದು ದಶಕಗಳಿಂದಲೂ ಗಣಿಗಾರಿಕೆಯನ್ನು ನಡೆಸುತ್ತಿರುವ ಕಂಪೆನಿ ಯಾವುದೇ ಕಾನೂನಿಗೆ ಕಾಯದೇ, ಪರಿಸರ ಕಾಳಜಿ ದೋರಣೆಯನ್ನು ಅನುಸರಿಸಿಕೊಂಡುಬಂದಿದೆ ಎಂದು ಕಂಪೆನಿಯ ನಿರ್ವಹಣಾ ನಿರ್ದೇಶಕ ನರೇಂದ್ರಕುಮಾರ್‌ ಹೇಳುತ್ತಾರೆ. ಕೇಂದ್ರ ಗಣಿಗಾರಿಕಾ ಮಂತ್ರಿ ಸುಂದರಲಾಲ್‌ ಫಾತ್ವಾ ಅವರಿಂದ ನರೇಂದ್ರಕುಮಾರ್‌ ಶುಕ್ರವಾರ ಈ ಪ್ರಶಸ್ತಿ ಸ್ವೀಕರಿಸಿದರು. 1987ರಲ್ಲಿ ಕಂಪನಿಗೆ ರಾಷ್ಟ್ರೀಯ ಸುರಕ್ಷತಾ ಪ್ರಶಸ್ತಿಯೂ ದೊರೆತಿತ್ತು.

(ಇನ್ಫೋ ವಾರ್ತೆ)