ಕಂಪ್ಯೂಟರ್‌ ಇಲ್ಲದೆ ಇ- ಮೇಲ್‌ : ‘ಐ ಸ್ಟೇಷನ್‌’ ಮಾರುಕಟ್ಟೆಗೆ

ಬೆಂಗಳೂರು : ಕಂಪ್ಯೂಟರ್‌ ಅವಶ್ಯಕತೆ ಇಲ್ಲದೆ ಇ- ಮೇಲ್‌ ಮಾಡಬಹುದಾದ ವಿನೂತನ ಸಾಧನ ‘ಐ ಸ್ಟೇಷನ್‌’ ಈಗ ರಾಜ್ಯದ ಮಾರುಕಟ್ಟೆಯಲ್ಲಿ ಲಭ್ಯ. ದೇಶದಲ್ಲೇ ವಿನೂತನವಾಗಿರುವ ಈ ಸಾಧನ ಮಾರುಕಟ್ಟೆಗೆ ಬರುವುದರೊಂದಿಗೆ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕರ್ನಾಟಕ ಮತ್ತೊಂದು ಮೈಲುಗಲ್ಲು ಸಾಧಿಸಿದಂತಾಗಿದೆ.

ಐ ಸ್ಟೇಷನ್‌ ಕುರಿತ ವಿವರಗಳನ್ನು ಇನೆಬಲರ್ಸ್‌ ಸಂಸ್ಥೆಯ ಮುಖ್ಯ ಕಾರ್ಯ ನಿರ್ವಾಹಕ ಅಧಿಕಾರಿ ಜಾನ್‌ ಅರವಮುತ್ತನ್‌ ಸೋಮವಾರ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು. ರಾಜ್ಯದ ಹಳ್ಳಿಗಳಲ್ಲಿ ಐ ಸ್ಟೇಷನ್‌ ಸಾಧನ ಅಳವಡಿಸಲು ರಾಜ್ಯ ಸರ್ಕಾರ ಉದ್ದೇಶಿಸಿದ್ದು, ಮಂಡ್ಯ ಜಿಲ್ಲೆಯ 70 ಹಳ್ಳಿಗಳಲ್ಲಿ ಐ ಸ್ಟೇಷನ್‌ ಘಟಕಗಳನ್ನು ಸರ್ಕಾರ ಸ್ಥಾಪಿಸಲಿದೆ. ಶಿವಮೊಗ್ಗ ಹಾಗೂ ಮಂಗಳೂರಿನ ಜಿಲ್ಲಾಧಿಕಾರಿಗಳು ಕೂಡ ಐ ಸ್ಟೇಷನ್‌ ಬಗೆಗೆ ಆಸಕ್ತಿ ತೋರಿಸಿದ್ದಾರೆ ಎಂದು ಅವರು ಹೇಳಿದರು.

ವಿಶ್ವದ ಯಾವುದೇ ಮೂಲೆಗೆ ಕಂಪ್ಯೂಟರ್‌ ಅಗತ್ಯವಿಲ್ಲದೆ ಇ-ಮೇಲ್‌ ಮಾಡಬಹುದಾದ ಈ ಸಾಧನ ಪ್ರೀಮಿಯರ್‌ ಹಾಗೂ ಕ್ಲಾಸಿಕ್‌ ಎನ್ನುವ ಎರಡು ಮಾಡೆಲ್‌ಗಳಲ್ಲಿ ಲಭ್ಯ. ಪ್ರೀಮಿಯರ್‌ನ ಬೆಲೆ 7990 ರು.ಗಳಾದರೆ, ಕ್ಲಾಸಿಕ್‌ನ ಬೆಲೆ 6990 ರುಪಾಯಿ. ಮಾಸಿಕ 100 ರುಪಾಯಿ ಶುಲ್ಕ ಪಾವತಿಸುವ ಮೂಲಕ ಐ ಸ್ಟೇಷನ್‌ ಸಾಧನವನ್ನು ಬಳಸಬಹುದು.

(ಇನ್ಫೋ ವಾರ್ತೆ)