ದಕ್ಷಿಣಕನ್ನಡ: ಮರೆಯಾದ ಮಳೆ,ಬೆಟ್ಟುಗದ್ದೆಯಲ್ಲಿ ಸಾಗದ ಉಳುಮೆ

ಮಂಗಳೂರು : ಮಳೆ ಮರೆಯಾಗಿದೆ! ಜಡಿಮಳೆ ಸುರಿಯಬೇಕಾದ ಸಂದರ್ಭದಲ್ಲಿ ಮಳೆ ಹಿಂದೆ ಹೋಗಿದೆ. ಪರಿಣಾಮವಾಗಿ ದಕ್ಷಿಣಕನ್ನಡದಲ್ಲೀಗ ರಣರಣ ಬಿಸಿಲು. ಮಳೆಯನ್ನೇ ನಂಬಿದ ರೈತನ ಮೊಗದಲ್ಲಿ ಚಿಂತೆಯ ಎಳೆ.

ಈ ಬಾರಿ ನಿಗದಿತ ವೇಳೆಗೇ ಮೊದಲೇ ಮಳೆ ಸುರಿಯಲಾರಂಭಿಸಿತ್ತು . ಇದರಿಂದಾಗಿ ಈ ವರ್ಷ ‘ವರುಣ ಫಲ’ ಚೆನ್ನಾಗಿರಬಹುದೆನ್ನುವ ಸಂತೋಷದಲ್ಲಿ ರೈತರು ಉತ್ಸಾಹದಿಂದ ಕೃಷಿ ಕಾರ್ಯಗಳನ್ನು ಕೈಗೆತ್ತಿಕೊಂಡಿದ್ದರು. ಆದರೆ, ಕಳೆದೊಂದು ವಾರದಿಂದ ಮಳೆ ಕೈ ಕೊಟ್ಟಿದ್ದು , ಬೆಟ್ಟು ಗದ್ದೆಗಳಲ್ಲಿ ಉಳುಮೆ ಕಷ್ಟಸಾಧ್ಯವಾಗಿದೆ. ಅಡಿಕೆ ಬೆಲೆ ಕೈ ಕೊಟ್ಟಿದ್ದರಿಂದ ಭತ್ತ ಲಾಭ ತರಬಹುದು ಎಂದು ದಕ್ಷಿಣಕನ್ನಡ ಜಿಲ್ಲೆಯ ರೈತ ಈ ಭಾರಿ ಭತ್ತದ ಕೃಷಿಗಿಳಿದಿದ್ದಾನೆ. ಆದರೆ, ವಾತಾವರಣ...

ಸದ್ಯಕ್ಕೆ ಕುಡಿಯುವ ನೀರಿಗೇನೂ ದಕ್ಷಿಣಕನ್ನಡದಲ್ಲಿ ತೊಂದರೆಯಿಲ್ಲ . ಕಾಲಕ್ಕೆ ಮುನ್ನ ಸುರಿದಿದ್ದ ಮಳೆಯಿಂದಾಗಿ ಕೆರೆ, ಬಾವಿಗಳಲ್ಲಿ ನೀರಿದೆ. ಪಂಪ್‌ ಹೊಂದಿರುವ ರೈತರು ಕೃಷಿ ಕಾರ್ಯಗಳಲ್ಲೂ ತೊಡಗಿದ್ದಾರೆ. ಆಕಾಶವನ್ನು ನೋಡುತ್ತಲೇ ವ್ಯವಸಾಯ ಮಾಡುವ ಕೃಷಿಕನ ನೆಮ್ಮದಿಗೆ ಮಾತ್ರ ಸಂಚಕಾರ ಬಂದಿದೆ.

(ಮಂಗಳೂರು ಪ್ರತಿನಿಧಿಯಿಂದ)