ಬೆಂಗಳೂರು ಏರ್‌ಪೋರ್ಟ್‌: ಸೀಮೆನ್ಸ್‌ ಪಾಲುದಾರಿಕೆ ನಿರೀಕ್ಷೆ

ಬೆಂಗಳೂರು : ದೇವನಹಳ್ಳಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ ಯೋಜನೆಯ ಕಾಮಗಾರಿ ಆರಂಭಿಸಲು ಸೀಮೆನ್ಸ್‌, ಝೂರಿಚ್‌ ಏರ್‌ಪೋರ್ಟ್‌ ಹಾಗೂ ಲಾರ್ಸನ್‌ ಮತ್ತು ಟೂಬ್ರೋ ಕಂಪೆನಿ ಸಮೂಹಗಳ ಪಾಲುದಾರಿಕೆಯನ್ನು ಸರಕಾರ ತಾತ್ಕಾಲಿಕವಾಗಿ ಒಪ್ಪಿಕೊಂಡಿದೆ.

ಈ ಕಂಪೆನಿ ಸಮೂಹಗಳ ಜೊತೆ ಕೊನೆಯ ಸುತ್ತಿನ ಮಾತುಕತೆ ಬಾಕಿ ಉಳಿದಿದ್ದು, ಸಚಿವ ಸಂಪುಟದಲ್ಲಿ ವಿವರವಾದ ಚರ್ಚೆ ನಡೆಸಿದ ತಕ್ಷಣ ಅಂತಿಮ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ವಾರ್ತಾ ಸಚಿವ ಬಿ.ಕೆ. ಚಂದ್ರರಶೇಖರ್‌ ಸೋಮವಾರ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಕಾಮಗಾರಿ ಕೈಗೆತ್ತಿಕೊಳ್ಳಲು ಪೈಪೋಟಿ ನಡೆಸುತ್ತಿದ್ದ ಹಾಕ್‌ ಟೀಫ್‌ ಮತ್ತು ಡೆಸಲ್‌ಡಾಲ್ಫ್‌ ಕಂಪೆನಿ ಸಮೂಹಗಳ ಪೈಕಿ ಸೀಮೆನ್ಸ್‌ ಸಮೂಹವನ್ನೇ ಆರಿಸಿಕೊಳ್ಳಲಾಯಿತು. ಪ್ರಸ್ತುತ, ಸೀಮೆನ್ಸ್‌ ಕಂಪೆನಿ ಜೊತೆಗೆ ವಿಮಾನ ನಿಲ್ದಾಣ ಅಭಿವೃದ್ಧಿ, ರಾಜ್ಯ ಸರಕಾರದ ನೆರವು ಮತ್ತು ಶೇರುದಾರರ ಒಪ್ಪಂದಗಳ ಬಗೆಗೆ ತಜ್ಞರು ಮಾತುಕತೆ ನಡೆಸಲಿದ್ದಾರೆ.

ಮೊದಲ ಹಂತದಲ್ಲಿ ವರ್ಷಕ್ಕೆ 3.7 ದಶಲಕ್ಷ ಪ್ರಯಾಣಿಕರ ಸಂಚಾರ ಮತ್ತು 1.40 ಲಕ್ಷ ಟನ್‌ ಸರಕು ಸಾಗಾಣಿಕೆ ಸಾಮರ್ಥ್ಯದ ವಿಮಾನ ನಿಲ್ದಾಣವನ್ನು ನಿರ್ಮಿಸಲು 1.180 ಕೋಟಿ ರೂಪಾಯಿ ವೆಚ್ಚದ ಯೋಜನೆ ಸೀಮೆನ್ಸ್‌ ಕಂಪೆನಿ ಸರಕಾರದ ಮುಂದಿಟ್ಟಿದೆ.

(ಇನ್ಫೋ ವಾರ್ತೆ)