ವಿಶ್ವದ ಎತ್ತರದ ಖಗೋಳ ವೀಕ್ಷಣಾಲಯಇದೋ ಇನ್ನೇನು ಸಿದ್ಧ

ಬೆಂಗಳೂರು : ಭಾರತದ ಖಗೋಳ ಶಾಸ್ತ್ರದ ಇತಿಹಾಸದಲ್ಲಿ ಹೊಸ ಮೈಲುಗಲ್ಲು ದಾಖಲಾಗುವ ದಿನ ಹತ್ತಿರವಾಗಿದೆ. ಅಬ್ಬಬ್ಬಾ ಎಂದರೆ ಇನ್ನೆರಡೇ ತಿಂಗಳು, ವಿಶ್ವದ ಅತಿ ಎತ್ತರದ ಖಗೋಳ ವೀಕ್ಷಣಾಲಯ ಲಡಾಖ್‌ನಲ್ಲಿ ಕಾರ್ಯಾರಂಭ ಮಾಡಲಿದೆ. ಸಮುದ್ರ ಮಟ್ಟಕ್ಕಿಂತ 15 ಸಾವಿರ ಅಡಿಗಳ ಎತ್ತರದಲ್ಲಿ ರುವುದು ಈ ವೀಕ್ಷಣಾಲಯದ ಅಗ್ಗಳಿಕೆ.

ಖಂಡಿತವಾಗಿಯೂ ಇನ್ನೆರಡು ತಿಂಗಳಲ್ಲಿ ಕಾರ್ಯಾರಂಭ ಮಾಡುವುದು ಖಚಿತ- ಎನ್ನುತ್ತಾರೆ ಬೆಂಗಳೂರಿನಲ್ಲಿರುವ ಭಾರತೀಯ ಆಸ್ಟ್ರೋ ಫಿಸಿಕ್ಸ್‌ ಸಂಸ್ಥೆ (ಐಐಎ) ಯ ಹಿರಿಯ ವಿಜ್ಞಾನಿ. ಪ್ರಸ್ತುತ, ಹೆಚ್ಚು ನಿಖರತೆ ಹಾಗೂ ಪರಿಷ್ಕರಣ ಕಾರ್ಯಗಳು ನಡೆಯುತ್ತಿವೆ. ಜಮ್ಮು ಮತ್ತು ಕಾಶ್ಮೀರದಲ್ಲಿನ ಹನ್ಲೆಯಲ್ಲಿರುವ ಈ ರಾಷ್ಟ್ರೀಯ ವೀಕ್ಷಣಾಲಯ ಈಗಾಗಲೇ ಎರಡು ಮೀಟರ್‌ ದೊಡ್ಡದಾದ ಆಪ್ಟಿಕಲ್‌ ಟೆಲಿಸ್ಕೋಪ್‌ ಹೊಂದಿದೆ.

ಐಐಎ ವಿಜ್ಞಾನಿಗಳ ಪ್ರಕಾರ- ಟೆಲಿಸ್ಕೋಪನ್ನು ಇನ್ಸ್ಯಾಟ್‌ ಉಪಗ್ರಹದ ಮೂಲಕ ಆಪರೇಟ್‌ ಮಾಡಲಾಗುವುದು. ಹೊಸಕೋಟೆಯಲ್ಲಿರುವ ವಿಜ್ಞಾನ ಹಾಗೂ ತಂತ್ರಜ್ಞಾನ ಸಂಶೋಧನೆ ಹಾಗೂ ಶಿಕ್ಷಣ ಕೇಂದ್ರದ ಮೂಲಕ ಉಪಗ್ರಹದ ಸಂಪರ್ಕ ಕಾರ್ಯ ಸಾಧ್ಯವಾಗಲಿದೆ. ಟೆಲಿಸ್ಕೋಪ್‌ ಒದಗಿಸುವ ದತ್ತಾಂಶಗಳ ಡೌನ್‌ಲೋಡ್‌ ಹಾಗೂ ವಿಶ್ಲೇಷಣೆ ಕೂಡ ಹೊಸಕೋಟೆಯ ಕೇಂದ್ರದಲ್ಲೇ ನಡೆಯಲಿದೆ.

ಹನ್ಲೆ ಹಾಗೂ ಹೊಸಕೋಟೆ ನಡುವಣ ಉಪಗ್ರಹ ಸಂಪರ್ಕ ಜಾಲವನ್ನು ಜಮ್ಮು ಮತ್ತು ಕಾಶ್ಮೀರ ಮುಖ್ಯಮಂತ್ರಿ ಫರೂಕ್‌ ಅಬ್ದುಲ್ಲಾ ಜೂನ್‌ 2 ರಂದು ಔಪಚಾರಿಕವಾಗಿ ಉದ್ಘಾಟಿಸುವರು. ಅದೇ ಹೊತ್ತಿಗೆ ಹೊಸಕೋಟೆ ಹಾಗೂ ಹನ್ಲೆ ನಡುವಿನ ಸಂಪರ್ಕ ಜಾಲವನ್ನು ಪ್ರಸಿದ್ಧ ವಿಜ್ಞಾನಿ ಪ್ರೊ. ಬಿ.ವಿ. ಶ್ರೀಕಂಠನ್‌ (ಐಐಎ ಗವರ್ನಿಂಗ್‌ ಕೌನ್ಸಿಲ್‌ ಅಧ್ಯಕ್ಷ) ಉದ್ಘಾಟಿಸುವರು.

ಟೆಲಿಸ್ಕೋಪ್‌ ಒದಗಿಸುವ ದತ್ತಾಂಶಗಳಿಂದ ಗ್ರಹ ತಾರೆ, ಗ್ಯಾಲಾಕ್ಸಿ , ಸೂಪರ್‌ನೋವಾ, ಗಾಮಾ ರೇ, ಕಾಸ್ಮೋಲಜಿ ಮುಂತಾದ ವಿಷಯಗಳಿಗೆ ಸಂಬಂಧಿಸಿದಂತೆ ವಿಶ್ಲೇಷಣೆ- ಪ್ರಯೋಗ ನಡೆಸಲು ಸಹಕಾರಿಯಾಗುವುದು.

(ಇನ್ಫೋ ವಾರ್ತೆ)