ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಕೆಂಪೇಗೌಡರ ಹೆಸರಿಟ್ಟಾಗಿದೆ !

ಬೆಂಗಳೂರು : ದೇವನಹಳ್ಳಿ ಬಳಿ ತಲೆ ಎತ್ತಲಿರುವ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಕಾಮಗಾರಿಯೇ ಇನ್ನೂ ಆರಂಭವೇ ಆಗಿಲ್ಲ. ಆದರೆ, ಮುಖ್ಯಮಂತ್ರಿ ಕೃಷ್ಣ 2004ರ ಡಿಸೆಂಬರ್‌ ಹೊತ್ತಿಗೆ ಇಲ್ಲಿ ವಿಮಾನ ಹಾರಾಡಲಿದೆ ಎಂದಿದ್ದಾರೆ. ಈ ಮಧ್ಯೆ ಈ ನಿಲ್ದಾಣಕ್ಕೆ ಯಾವ? ಯಾರ ಹೆಸರಿಡಬೇಕು ಎಂಬುದೇ ದೊಡ್ಡ ವಿವಾದವಾಗಿ ಪರಿಣಮಿಸುತ್ತಿದೆ.

ಕ್ರಾಂತಿಕಾರಿ ಬಸವಣ್ಣ, ಆದಿ ಶಂಕರಾಚಾರ್ಯ, ಡಾ. ಅಂಬೇಡ್ಕರ್‌, ರಾಜೀವ್‌ ಗಾಂಧೀ, ಇಂದಿರಾಗಾಂಧಿ ಅವರ ಹೆಸರು ಕೇಳಿಬರುತ್ತಿದ್ದರೆ, ಒಂದು ಹೆಜ್ಜೆ ಮುಂದೆ ಹೋಗಿರುವ ಕೆಂಪೇಗೌಡ ನಾಗರಿಕ ಸಮಿತಿ ಈ ವಿಮಾನ ನಿಲ್ದಾಣಕ್ಕೆ ಈಗಾಗಲೇ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಎಂದು ನಾಮಕರಣವನ್ನೇ ಮಾಡಿಬಿಟ್ಟಿದೆ.

ಯಲಹಂಕದ ಮುಖ್ಯ ವೃತ್ತದಲ್ಲಿರುವ ಎತ್ತರದ ಹೊನಲು ಬೆಳಕಿನ ಕಂಬದ ಪಕ್ಕದಲ್ಲಿ ಬೃಹತ್‌ ಗಾತ್ರದ ಫಲಕವನ್ನೂ ಹಾಕಿಬಿಟ್ಟಿದೆ. , ಫಲಕದಲ್ಲಿ ವಿಮಾನದ ಚಿತ್ರ, ಸುಸ್ವಾಗತ, ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ, ದೇವನಹಳ್ಳಿ, ಬೆಂಗಳೂರು ಉತ್ತರ ಎಂದು ದಪ್ಪಕ್ಷರದಲ್ಲಿ ಕನ್ನಡ ಹಾಗೂ ಇಂಗ್ಲಿಷ್‌ ಭಾಷೆಯಲ್ಲಿ ಬರೆಯಲಾಗಿದೆ. ಈ ಫಲಕದ ಕೆಳಭಾಗದಲ್ಲಿ ಸಮಿತಿಯ ಕಾರ್ಯದರ್ಶಿ ಕೆ.ವಿ. ನಂಜುಂಡಪ್ಪ, ಉಪಾಧ್ಯಕ್ಷರಾದ ನಾಗರಾಜ್‌, ಅಧ್ಯಕ್ಷ ದೊಡ್ಡ ಬಸವರಾಜು ಅವರ ಹೆಸರುಗಳೂ ಇವೆ.

ಸರಕಾರಕ್ಕೆ ಬಿಸಿತುಪ್ಪ : ಕೂಸು ಹುಟ್ಟುವ ಮೊದಲೇ ಕುಲಾವಿ ಹೊಲಿಸಿದರು ಎಂಬಂತೆ ಇನ್ನೂ ನಿಲ್ದಾಣ ಕಾಮಗಾರಿಯೇ ಆರಂಭವಾಗದಿರುವಾಗ ವಿಮಾನ ನಿಲ್ದಾಣಕ್ಕೆ ಹೆಸರಿಡುವುದು ಹೇಗೆ? ಅದಕ್ಕೆ ಇದು ಸೂಕ್ತ ಕಾಲವಲ್ಲ ಎಂಬುದು ರಾಜ್ಯ ಸರಕಾರದ ಅಧಿಕಾರಿಗಳ ಅನಿಸಿಕೆ. ಆದರೆ, ಕೆಂಪೇಗೌಡ ಸಮಿತಿ ಈಗಾಗಲೇ ನಾಮಕರಣ ಮಾಡಿ, ಫಲಕವನ್ನೂ ಹಾಕಿದೆ.

ಈ ಫಲಕ ತೆಗೆದರೆ ಸರಕಾರ ನಾಡಪ್ರಭು ಕೆಂಪೇಗೌಡರಿಗೆ ಅಪಮಾನ ಮಾಡಿದಂತೆ ಆಗುತ್ತದೆ. ಒಕ್ಕಲಿಗರ ಆಕ್ರೋಶಕ್ಕೂ ಒಳಗಾಗಬೇಕಾದ ಪರಿಸ್ಥಿತಿ ಬರುತ್ತದೆ. ತೆಗೆಯದಿದ್ದರೆ, ಬಸವಣ್ಣ ಹಾಗೂ ಅಂಬೇಡ್ಕರ್‌ ಹೆಸರಿಡುವಂತೆ ಒತ್ತಾಯಿಸುತ್ತಿರುವವರ ವಿರೋಧವನ್ನೂ ಸರಕಾರ ಎದುರಿಸಬೇಕಾಗುತ್ತದೆ. ಒಟ್ಟಿನಲ್ಲಿ ಸರಕಾರ ಅಡಕತ್ತರಿಗೆ ಸಿಲುಕಿದೆ.

ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ನಾಮಕರಣ ವಿವಾದ ಎಲ್ಲಿಗೆ ಹೋಗಿ ಮುಟ್ಟುತ್ತದೋ ಗೊತ್ತಿಲ್ಲ. ಸದ್ಯಕ್ಕಂತೂ ಇದು ಬಿಸಿ ತುಪ್ಪ. ಉಗುಳಿದರೆ, ತುಪ್ಪ ನಷ್ಟವಾಗತ್ತೆ, ಉಗುಳದಿದ್ದರೆ ಗಂಟಲೇ ಸುಡುತ್ತದೆ. ಸರಕಾರ ಈಗ ಏನು ಮಾಡುತ್ತದೋ ಕಾದು ನೋಡಬೇಕಷ್ಟೇ?

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...