ನನಗೆ ಮರ ಸುತ್ತೋದು ಅಂದ್ರೆ ತುಂಬಾ ಇಷ್ಟ - ಜಡೇಜ

ಮುಂಬಯಿ : ಆತ ಆರಾಮಾಗಿದ್ದಾರೆ. ಕಿಂಚಿತ್ತೂ ಕಳಕೊಂಡ ಪ್ರಜ್ಞೆ ಕಾಡುತ್ತಿಲ್ಲ. ಈಗಲೂ ಅದೇ ತುಂಟನಗು. ಕ್ರಿಕೆಟ್‌ನಿಂದ 5 ವರ್ಷ ಕಾಲ ನಿಷೇದಕ್ಕೆ ಒಳಗಾಗಿರುವ ಅಜಯ್‌ ಜಡೇಜ ವಿಷಯ ಇದು. ಈಗವರು ಬಾಲಿವುಡ್‌ ನಟ. ಯೂಸಫ್‌ ಖಾನ್‌ ಚೊಚ್ಚಲ ನಿರ್ದೇಶನದ, ಇನ್ನೂ ಹೆಸರಿಡದ ಚಿತ್ರದಲ್ಲಿ ಅಭಿನಯಿಸಲಿದ್ದಾರೆ.

ಕಳೆದ 3 ವರ್ಷಗಳಿಂದ ಸಿನಿಮಾ ಆಫರ್‌ಗಳು ಬರುತ್ತಿದ್ದವು. ಈಗ ನಟಿಸಲು ಸರಿಯಾದ ಸಮಯ ಅಂತ ಸಿನಿಮಾಗೆ ಕಾಲಿಟ್ಟೆ - ಜೆ.ಕೆ.ಟೈರ್ಸ್‌ ಆಯೋಜಿಸಿದ್ದ ಮೋಟಾರ್‌ ಕ್ರೀಡೆಯನ್ನು ಲೀ ಮೆರಿಡಿಯನ್‌ ಹೊಟೇಲಿನಲ್ಲಿ ಉದ್ಘಾಟಿಸಿ ಅವರು ಮಾತನಾಡುತ್ತಿದ್ದರು. ಕ್ರಿಕೆಟ್ಟು ನನ್ನ ಮೊದಲ ಪ್ರೇಮ. ನನ್ನ ಮೇಲೆ ಹೇರಿರುವ ನಿಷೇಧದ ವಿರುದ್ಧ ಶತಾಯಗತಾಯ ಹೋರಾಡುತ್ತೇನೆ ಅನ್ನುತ್ತಾರೆ ಜಡೇಜ.

ಆಕರ್ಷಕ ನಗೆ ಸೂಸುತ್ತಲೇ ಜಡೇಜಾ ಮಾತಾಡಿದರು...

ಜೂನ್‌ನಲ್ಲಿ ಸಿನಿಮಾ ಶೂಟಿಂಗ್‌ ಶುರುವಾಗುತ್ತೆ. 60 ದಿನ ಮಾತ್ರ ಭಾರತದಲ್ಲಿ ಶೂಟಿಂಗ್‌. ಆಮೇಲೆ ಲಂಡನ್‌ಗೆ ಹಾರುತ್ತೇವೆ. (ಸಿನಿಮಾ ಹೀರೋಯಿನ್‌ ಯಾರು ಎಂಬ ಪ್ರಶ್ನೆಗೆ...) ಹಿರೋಯಿನ್‌ ಯಾರು ಅನ್ನೋದು ಸೀಕ್ರೇಟ್‌. ನನಗಂತೂ ಮರ ಸುತ್ತೋದು ತುಂಬಾ ಇಷ್ಟ ; ಇದು ಎಲ್ಲರಿಗೂ ಇಷ್ಟ ಅಂತ ಅಂದ್ಕೊಂಡಿದೀನಿ.

(ಮೊದಲ ಸಿನಿಮಾ ಕಷ್ಟ ಅನ್ನಿಸೋದಿಲ್ಲವೇ? ) ನಾನು ಮಾಡಲಿಂಗ್‌ಗೆ ಈಗಾಗಲೇ ಕೆಮೆರಾ ಫೇಸ್‌ ಮಾಡಿದ್ದೀನಿ. ನಟನೆ ಎಲ್ಲರ ಜೀವನದ ಅಂಗ ಅಲ್ಲವೇ ? ಹೀಗಾಗಿ ಕೆಮೆರಾ ಎದುರಿಸೋದು ನನಗೆ ಕಷ್ಟ ಅಲ್ಲವೇ ಅಲ್ಲ. (ಸಿನಿಮಾ ಕಥೆ ಬಗ್ಗೆ ಹೇಳಿ..) ಇಬ್ಬರು ಸ್ನೇಹಿತರ ಕಥೆಯದು. ಆದರೆ, ರೊಮ್ಯಾಂಟಿಕ್‌ ಸಿನಿಮಾ ಹೌದೋ, ಅಲ್ಲವೋ ಗೊತ್ತಿಲ್ಲ.

ಮೊನ್ನೆ ತಾನೆ ಮದುವೆಯಾದ ಜಡೇಜ ಹೊಸ ಸಂಸಾರದೊಟ್ಟಿಗೆ ಸಂತಸದ ಕ್ಷಣಗಳ ಕಳೆಯುತ್ತಿದ್ದಾರೆ. ಐ ಎಂಜಾಯ್‌ ಬೀಯಿಂಗ್‌ ಮ್ಯಾರೀಡ್‌. ಸೋ ಫಾರ್‌ ಸೋ ಗುಡ್‌ ಅಂತಾರೆ. ಅಂದಹಾಗೆ, ಸಿನಿಮಾಗೋಸ್ಕರ ಡ್ಯಾನ್ಸ್‌ ಕ್ಲಾಸಿಗೂ ಸೇರಿದ್ದಾರೆ.

(ಯುಎನ್‌ಐ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...